തിരുവനന്തപുരം
കുരുന്നുകൾക്ക് കളിച്ചുല്ലസിക്കാനും മികവിൽ മിന്നാനും സ്മാർട്ട് അങ്കണവാടികൾ. സംസ്ഥാനത്തെ ആദ്യ സ്മാർട്ട് അങ്കണവാടി പൂജപ്പുരയിൽ തുറന്നു. കുട്ടികളുടെ സമഗ്രമായ ശാരീരിക, മാനസിക വികാസം ഉറപ്പുവരുത്തും വിധമാണ് സ്മാർട്ട് അങ്കണവാടികളുടെ രൂപകൽപ്പനയും പ്രവർത്തനവും.
പഠനമുറി, വിശ്രമമുറി, ഭക്ഷണ മുറി, അടുക്കള, സ്റ്റോർ റൂം, ഇൻഡോർ ഔട്ട്ഡോർ കളിസ്ഥലം, ടിവി, ഹാൾ, പൂന്തോട്ടം തുടങ്ങിയ എല്ലാ സൗകര്യങ്ങളുമുണ്ടാകും. സ്ഥല പരിമിതി അനുസരിച്ച് പത്ത്, ഏഴ്, അഞ്ച് സെന്റുകളിലാണിവ നിർമിക്കുക. 155 സ്മാർട്ട് അങ്കണവാടിക്ക് നിർമാണാനുമതി നൽകി. ആറ് മാസത്തിനുള്ളിൽ ഇവ യാഥാർഥ്യമാക്കും.
മുഴുവൻ അങ്കണവാടികൾക്കും
സ്വന്തം കെട്ടിടം: മന്ത്രി വീണാ ജോർജ്
അടുത്ത സാമ്പത്തിക വർഷം അവസാനിക്കും മുമ്പ് സംസ്ഥാനത്തെ എല്ലാ അങ്കണവാടികൾക്കും സ്വന്തമായി കെട്ടിടം സാധ്യമാക്കാനാണ് ലക്ഷ്യമെന്ന് വനിതാ ശിശുവികസന മന്ത്രി വീണാ ജോർജ്. 33,115 അങ്കണവാടിയിൽ 24,360 എണ്ണം സ്വന്തം കെട്ടിടത്തിലും 6498 വാടക കെട്ടിടത്തിലുമാണ്. ഈ വർഷത്തോടെ എല്ലാ അങ്കണവാടികളും വൈദ്യുതീകരിക്കുമെന്നും മന്ത്രി പറഞ്ഞു. പൂജപ്പുരയിൽ സംസ്ഥാനത്തെ ആദ്യത്തെ സ്മാർട്ട് അങ്കണവാടി കെട്ടിടം ഉദ്ഘാടനം ചെയ്യുകയായിരുന്നു മന്ത്രി.
അങ്കണവാടികളുടെ അടിസ്ഥാന സൗകര്യത്തിലും കരിക്കുലത്തിലും വലിയ മാറ്റങ്ങൾ വരുത്തി. കരിക്കുലം ജെൻഡർ ഓഡിറ്റിങ് നടത്തി പരിഷ്കരിച്ച് ലിംഗ സമത്വം ഉറപ്പാക്കാൻ നടപടി സ്വീകരിച്ചതായും മന്ത്രി പറഞ്ഞു. കുട്ടികളുടെ മാനസികവും ബൗദ്ധികവുമായ വികാസത്തിന് സ്മാർട്ട് അങ്കണവാടികൾ സഹായിക്കുമെന്ന് ചടങ്ങിൽ അധ്യക്ഷനായ വിദ്യാഭ്യാസ മന്ത്രി വി ശിവൻകുട്ടി പറഞ്ഞു. മേയർ ആര്യ രാജേന്ദ്രൻ, കോർപറേഷൻ ക്ഷേമ സ്റ്റാൻഡിങ് കമ്മിറ്റിയംഗം എസ് സലീം, വനിതാ ശിശുവികസന ഡയറക്ടർ ജി പ്രിയങ്ക എന്നിവർ സംസാരിച്ചു.
