തൃശൂർ> ചക്കയെ ചൊല്ലിയുള്ള കുടുംബ വഴക്കിന് പിന്നാലെ വീടിന് തീയിട്ട യുവാവ് അറസ്റ്റിലായി. തൃശൂർ അവിണിശേരി ചെമ്പാലിപ്പുറത്ത് വീട്ടിൽ സജേഷിനെ (46) ആണ് അറസ്റ്റിലായത്. സഹോദരിയുടെ വീട്ടിൽ നിന്നും എത്തിച്ച ചക്കയെ തുടർന്ന് പിതാവുമായുള്ള തർക്കത്തെ തുടർന്നാണ് യുവാവ് വീടിന് തീവെച്ചത്.
സജേഷിന്റെ കുട്ടികളുടെ പുസ്തകങ്ങളും എസ്എസ്എൽസി പരീക്ഷയെഴുതാനുള്ള ഹാൾ ടിക്കറ്റുകളും സർട്ടിഫിക്കറ്റുകളും വസ്ത്രങ്ങളുമടക്കം കത്തിനശിച്ചു. സജേഷിന്റെ ഭാര്യ വിദേശത്താണ്. സജേഷ് പത്താം ക്ലാസിലും എട്ടാം ക്ലാസിലും പഠിക്കുന്ന രണ്ട് പെൺകുട്ടികക്കൊപ്പമാണ് താമസിക്കുന്നത്.
ഞായറാഴ്ച സഹോദരി ഭർത്താവ് സജേഷിന്റെ വീട്ടിൽ ചക്ക എത്തിച്ചിരുന്നു. ഇതിന്റെ പേരിൽ സജേഷും സഹോദരി ഭർത്താവും തമ്മിൽ തർക്കത്തിലാവുകയും കയ്യാങ്കളി നടക്കുകയും ചെയ്തു. പിന്നീട് രാത്രിയാണ് സജേഷ് വീടിന് തീവെച്ച്. സജേഷിന്റെ വീടിന് സമീപത്തുള്ളവരാണ് വീടിന് തീവെച്ച വിവരം അറിയിച്ചത്. അഗ്നി രക്ഷാ സേനാംഗങ്ങൾ ഇടനെത്തി തീയണയ്ക്കുകയായിരുന്നു. അറസ്റ്റ് രേഖപ്പെടുത്തിയ സജേഷിനെ റിമാൻഡ് ചെയ്തു.
