അമരാവതി> ആന്ധ്രപ്രദേശിൽ ട്രെയിനിടിച്ച് ഏഴ് പേർ മരിച്ചു. ശ്രീകാകുളം ജില്ലയിലെ ബാദുവയിൽ തിങ്കളാഴ്ച രാത്രിയാണ് സംഭവം. ഗുവാഹത്തി എക്സ്പ്രസ് ട്രെയിനിലെ യാത്രക്കാരാണ് കൊണാർക് എക്സ്പ്രസ് ട്രെയിൻ ഇടിച്ചു മരിച്ചത്.
സാങ്കേതിക തകരാറിനെത്തുടർന്ന് ട്രെയിൻ നിർത്തിയപ്പോൾ ട്രാക്കിലേക്ക് ഇറങ്ങി നിന്നവരെ എതിർദിശയിലേക്ക് വരികയായിരുന്ന കൊണാർക് എക്സ്പ്രസ് ഇടിക്കുകയായിരുന്നു. അപകടത്തിൽപ്പെട്ടവർ സംഭവസ്ഥലത്തു വെച്ചു തന്നെ മരിച്ചു.
മരിച്ചവരെ ഇതുവരെ തിരിച്ചറിഞ്ഞിട്ടില്ല. പോസ്റ്റ്മോർട്ടം നടപടികൾ ഉൾപ്പെടെ പുരോഗമിക്കുകയാണ്. സംഭവത്തിൽ മുഖ്യമന്ത്രി ജഗൻ മോഹൻ റെഡ്ഡി ദുഃഖം രേഖപ്പെടുത്തി.
