ബേസൽ
പി വി സിന്ധുവിന് സീസണിലെ രണ്ടാം കിരീടം. സ്വിസ് ഓപ്പൺ ബാഡ്മിന്റണിൽ തായ്-ലൻഡിന്റെ ബുസാനൻ ഒങ്ബാംറുങ്ഫാനെ തോൽപ്പിച്ച് സിന്ധു ചാമ്പ്യനായി. പുരുഷവിഭാഗത്തിൽ മലയാളിതാരം എച്ച് എസ് പ്രണോയിയുടെ സ്വപ്നം പൂവണിഞ്ഞില്ല. കിരീടപ്പോരിൽ വീണു.
സ്വിസ് ഓപ്പണിൽ തുടർച്ചയായ രണ്ടാം ഫെെനലിന് ഇറങ്ങിയ സിന്ധു തായ്-ലൻഡ് താരത്തെ നേരിട്ടുള്ള ഗെയിമുകൾക്കാണ് തോൽപ്പിച്ചത് (21–16, 21–18). കഴിഞ്ഞവർഷം സ്പെയ്നിന്റെ കരോളിന മരിനോട് തോൽക്കുകയായിരുന്നു.
ബുസാനിനെതിരെ 17 തവണ കളിച്ചപ്പോൾ 16ലും ജയം സിന്ധുവിനായി. ഈ സീസണിൽ സയ്യദ് മോഡി ബാഡ്മിന്റൺ ടൂർണമെന്റിലും സിന്ധു ചാമ്പ്യനായി. പുരുഷൻമാരിൽ പൊരുതി മുന്നേറിയ പ്രണോയ് ഫെെനലിൽ ഇന്തോനേഷ്യയുടെ ജൊനാതൻ ക്രിസ്റ്റിയോടാണ് തോറ്റത് (12–21, 18–21).
