എന്തുകൊണ്ടാണ് സിം കാർഡുകൾക്ക് പ്രത്യേക ആകൃതി? ചിന്തിച്ചിട്ടുണ്ടോ?

ഇന്ന് മൊബൈൽ ഫോൺ നമ്മുടെ ജീവിതത്തിന്റെ അവിഭാജ്യമായ ഘടകമാണ്. മൊബൈൽ ഫോൺ ഉപയോഗിക്കാത്ത ഒരു ദിവസത്തെപ്പറ്റി നിങ്ങൾക്ക് ചിന്തിക്കാനാവുമോ? ഫോൺ ചെയ്യുക എന്ന പ്രധാന ജോലി മാത്രമല്ല ഇന്ന് സ്മാർട്ട്ഫോണുകളുടെ ചുമതല. വീഡിയോ കോൾ ചെയ്യാനും, സിനിമയും പാട്ടും ആസ്വദിക്കാനും, ഇൻസ്റ്റന്റ് മേസ്സേജിങ്ങിനും, ബാങ്കിങിനും, ബില്ലടക്കാനും, ഭക്ഷണം ഓർഡർ ചെയ്യാനുമെന്ന് വേണ്ട, സകല കാര്യത്തിനും ഇന്ന് സ്മാർട്ട്ഫോണാണ് പലർക്കും ആശ്രയം. ചിലരുടെ ബിസിനസ്സ് പോലും മുന്നോട്ട് പോവുന്നത് സ്മാർട്ട്ഫോൺ ഉപയോഗിച്ചാണ്.

സ്മാർട്ട്ഫോണിലെ ഒരു അവിഭാജ്യഘടകമാണ് സിം കാർഡുകൾ. ഒരു വാഹനത്തിന് എൻജിൻ പോലെയാണ് സ്മാർട്ട്ഫോണിന് സിം കാർഡ്. എന്നാൽ കുറച്ച വർഷങ്ങൾക്ക് മുൻപ് വരെ CDMA സ്മാർട്ട്ഫോണുകളായിരുന്നു പ്രചാരത്തിൽ. ഒരൊറ്റ ടെലികോം ഓപ്പറേറ്ററുടെ സേവനം മാത്രമാണ് സിം ആവശ്യമില്ലാത്ത ഇത്തരം ഫോണുകളിൽ ലഭിക്കുക. എന്നാൽ പിന്നീട് GSM ഫോണുകൾ വന്നതോടെയാണ് സിം കാർഡുകൾ എത്തിയത്.

സിം കാർഡുകൾക്ക് മുൻപ് ചതുര ആകൃതിയിലാണ് ക്രമീകരിച്ചിരിക്കുന്നത്. ഒരറ്റത്ത് ഒരു ചെറിയ ഭാഗം അടർന്നു വീണ പോലെ കാണാം. എന്തിനാണ് ഇങ്ങനെ ഒരു ഭാഗം കുറിച്ചിരിക്കുന്നത് എന്ന് നിങ്ങൾക്കറിയാമോ? സിം കാർഡ് കൃത്യമായി സിം ട്രേയിൽ സ്ഥാപിക്കാനാണ് ഇത്തരമൊരു ഭാഗം മുറിച്ചിരിക്കുന്നത്. മുൻപ് സിം കാർഡുകൾ ദീർഘചതുരാകൃതിയിലായിരുന്നു. അപ്പോൾ പക്ഷെ ഉപഭോക്താക്കൾക്ക് സിം കാർഡ് ഫോണിൽ സ്ഥാപിക്കുമ്പോൾ ഏത് വശം മുകളിൽ വരണം എന്നത് സംബന്ധിച്ചും ഏത് വശമാണ് ഫോണിന്റെ അകത്തേക്ക് ആദ്യം കയറേണ്ടത് എന്നത് സംബന്ധിച്ചും സംശയം ജനിപ്പിച്ചിരുന്നു. ഈ പ്രശ്നം പരിഹരിക്കാനാണ് സിം കാർഡിന് പ്രത്യേക ആകൃതി അവതരിപ്പിച്ചത്.

പിൻ കുറിപ്പ് : മെമ്മറിയും മൈക്രോ കൺട്രോളറുമുള്ള ഒരു ഇലക്ട്രോണിക് ചിപ്പാണ് സിം കാർഡ്. കാർഡിൽ കോണ്ടാക്ടുകൾ സേവ് ചെയ്യാനും മറ്റും സാധിക്കും. 15 എംഎം നീളവും 25 എംഎം വീതിയും 0.76 എംഎം കനവുമാണ് ഒരു സിം കാർഡിന്.