രാജ്യസഭയിലേക്ക് മത്സരിക്കാൻ ആഗ്രഹമുണ്ടെന്ന് കെ വി തോമസ്; തീരുമാനിക്കേണ്ടത് പാർട്ടി

തിരുവനന്തപുരം: രാജ്യസഭയിലേക്ക് മത്സരിക്കാൻ ആഗ്രഹമുണ്ടെന്ന് കോൺഗ്രസ് നേതാവ് കെ വി തോമസ്. തനിക്ക് പരിചയ സമ്പത്തുണ്ടെന്നും തീരുമാനം എടുക്കേണ്ടത് പാർട്ടിയാണെന്നും തോമസ് പറഞ്ഞു. എ കെ ആന്റണിക്ക് രാജ്യസഭയിൽ തുടരാൻ താത്പര്യമില്ലെന്ന് അറിയിച്ചതിനെത്തുടർന്ന് രാജ്യസഭാ സീറ്റിനായുള്ള നീക്കം ആരംഭിച്ചിരിക്കുകയാണ് കോൺഗ്രസ് നേതാക്കൾ.

മുൻ കേന്ദ്ര മന്ത്രിയും കെപിസിസി പ്രസിഡന്റുമായിരുന്ന മുല്ലപ്പള്ളി രാമചന്ദ്രൻ, ഇടതുപക്ഷ ബന്ധം അവസാനിപ്പിച്ച് മടങ്ങിയെത്തിയ ചെറിയാൻ ഫിലിപ്പ്, മുൻ കേന്ദ്ര മന്ത്രി കെ വി തോമസ്, മുതിർന്ന നേതാവ് പന്തളം സുധാകരൻ, മുൻ കെപിസിസി പ്രസിഡന്റ് വി എം സുധീരൻ, മുൻ എംഎൽഎ വി ടി ബൽറാം അടക്കമുള്ളവരുടെ പേരുകൾ സ്ഥാനത്തേക്ക് പരിഗണിക്കപ്പെടുന്നവരുടെ പട്ടികയിലുണ്ട്. മാർച്ച് 31നാണ് ആറ് സംസ്ഥാനങ്ങളിൽ നടക്കുന്നത്.

തെരഞ്ഞെടുപ്പ് പ്രഖ്യാപിച്ചതിന് പിന്നാലെ ഇനി രാജ്യസഭയിലേക്ക് മത്സരിക്കാനില്ലെന്ന് എ കെ ആന്റണി വ്യക്തമാക്കിയിരുന്നു. ഇതുവരെ നൽകിയ അവസരങ്ങൾക്ക് കോൺഗ്രസ് അധ്യക്ഷ സോണിയ ഗാന്ധിയോട് നന്ദിയുണ്ടെന്നും ആൻറണി അറിയിച്ചു.

ഇടതുബന്ധം അവസാനിപ്പിച്ച് മടങ്ങിയെത്തിയ ചെറിയാൻ ഫിലിപ്പിന് കോൺഗ്രസ് സീറ്റ് നൽകുമോയെന്നുള്ളത് കണ്ടറിയേണ്ടതാണ്. വർഷങ്ങളായി യുഡിഎഫിൽ തുടർന്നിട്ടും പാർലമെന്ററി അവസരങ്ങൾ ലഭിക്കാത്ത സിഎംപി ജനറൽ സെക്രട്ടറി സി പി ജോണിന് രാജ്യസഭയിലേക്ക് അവസരം നൽകണമെന്ന ആവശ്യവും ഉയരുന്നുണ്ട്.

കേരളത്തിലേ മൂന്ന് സീറ്റുകൾക്ക് പുറമെ പഞ്ചാബ് (5), അസം (2), ഹിമാചൽപ്രദേശ് (1), ത്രിപുര (1), നാഗാലാൻഡ് (1) എന്നിങ്ങനെയാണ് വിവിധ സംസ്ഥാനങ്ങളിൽ ഒഴിവുവരുന്ന സീറ്റുകൾ. കേരളത്തിൽ നിന്ന് എ കെ ആൻറണി, എം വി ശ്രേയാംസ്കുമാർ , കെ സോമപ്രസാദ് എന്നിവരുടെ കാലാവധിയാണ് അവസാനിക്കുന്നത്.