നാടകത്തിലൂടെ സിനിമാ രംഗത്തേക്ക് എത്തിയ ലളിത മലയാളത്തിലും തമിഴിലുമായി അഞ്ഞൂറിലേറെ സിനിമകളിൽ അഭിനയിച്ചിട്ടുണ്ട്. മികച്ച സഹനടിക്കുള്ള ദേശീയ ചലച്ചിത്ര പുരസ്കാരം രണ്ടുവട്ടം സ്വന്തമാക്കിയ അവർ നാല് പ്രാവശ്യം സംസ്ഥാന ചലച്ചിത്ര പുരസ്കാരത്തിന് അർഹയായി. കേരള സംഗീത നാടക അക്കാദമിയുടെ ചെയർപേഴ്സനായിരുന്നു കെപിഎസി ലളിത. പ്രശസ്ത സംവിധായകൻ ഭരതനാണ് ഭർത്താവ്. ശ്രീക്കുട്ടി, സംവിധായകനും നടനുമായ സിദ്ധാർഥ് ഭരതൻ എന്നിവർ മക്കളാണ്.
അഭിനയകലയുടെ ലാളിത്യം എന്നാണ് പലരും കെപിഎസി ലളിതയെ വിശേഷിപ്പിക്കുന്നത്. നാടകങ്ങളിലൂടെയെത്തി സിനിമയിൽ സജീവമായ അവര്‍ ഇന്ത്യയിലെ തന്നെ ഏറ്റവും മികച്ച നടിമാരുടെ ലിസ്റ്റ് എടുത്താൽ മുൻപന്തിയിൽ തന്നെയുണ്ടാകും. ഹാസ്യം, ദുഃഖരംഗങ്ങൾ തുടങ്ങി കൊടുക്കുന്ന ഏത് വേഷവും ഏറ്റം മികവിൽ എത്തിക്കാൻ കഴിയുന്ന മലയാളസിനിമയുടെ അമ്മ വാല്‍സല്യം ഇനി ഓർമ്മ മാത്രം. കഥാപാത്രങ്ങൾ എടുത്ത് പറയുകയാണെങ്കിൽ 1969-ൽ കൂട്ടുകുടുംബത്തിലെ സരസ്വതി മുതൽ 2021-ൽ ഹോമിലെ അന്നമ്മ വരെ എത്രയെത്ര കഥാപാത്രങ്ങല്‍. അഞ്ഞൂറിലേറെ സിനിമകളുടെ ഭാഗമായിട്ടുണ്ട്.
കെപിഎസിയുടെ നാടകങ്ങളിലൂടെ കലാരംഗത്ത് സജീവമായ ലളിത തോപ്പിൽ ഭാസിയുടെ കൂട്ടുകുടുംബത്തിലൂടെയാണ് സിനിമാ രംഗത്തേക്ക് എത്തിയത്. ആലപ്പുഴയിലെ കായംകുളം എന്ന സ്ഥലത്ത് കടയ്ക്കത്തറൽ വീട്ടിൽ കെ അനന്തൻ നായരുടെയും ഭാർഗവി അമ്മയുടെയും മകളായി 1947 ലാണ് ലളിതയുടെ ജനനം. പത്ത് വയസുള്ളപ്പോൾ തന്നെ നാടകരംഗത്ത് സജീവമായിരുന്നു. ഗീതയുടെ ബലി ആയിരുന്നു ആദ്യ നാടകം. പിന്നീടാണ് കെപിഎസിയിലേക്ക് എത്തിയത്.
