മുഖ്യമന്ത്രി പിണറായി വിജയന്റെ വാക്കുകൾ…
പിടി തോമസിന് എന്നും തനതായ നിലപാടുകളുണ്ടായിരുന്നു. ചിലപ്പോഴെങ്കിലുമൊക്കെ അത് വ്യക്തിനിഷ്ഠമായി വന്നിരിക്കാം. എങ്കിലും അതൊക്കെ അദ്ദേഹത്തിന്റെ ഉറച്ച നിലപാട് തന്നെയായിരുന്നു. അതിനോട് യോജിക്കുന്നവരും വിയോജിക്കുന്നവരുമുണ്ടാവാം. ഏതായാലും നിലപാടുകളിൽ വിട്ടുവീഴ്ച ചെയ്യാതെ വാദമുഖങ്ങൾ ഉയർത്തുന്നതിലെ കരുത്ത് പിടി തോമസിനെ വ്യത്യസ്തനാക്കി. വിദ്യാർത്ഥി രാഷ്ട്രീയത്തിലൂടെ പൊതുരംഗത്തേക്ക് കടന്നുവന്ന അദ്ദേഹം നാല് തവണ നിയസഭയിലും ഒരു തവണ ലോക്സഭയിലും പ്രവർത്തിച്ചു. സഭകളിൽ ജനകീയ പ്രശ്നങ്ങൾ ഉന്നയിക്കാൻ അദ്ദേഹം അതീവ താത്പര്യം കാണിച്ചു. പശ്ചിമഘട്ടം ഉൾപ്പെടെയുള്ള കാര്യങ്ങളിൽ ഒരുപക്ഷേ തന്റെ പാർട്ടിക്കും തന്റെ മുന്നണിക്കും സ്വീകാര്യമല്ലാത്ത നിലപാടിൽ അദ്ദേഹത്തെ നമ്മൾ കണ്ടിട്ടുണ്ട്.
Also Read :
എഴുത്തും വായനയും എന്നും അദ്ദേഹത്തിന് പ്രിയപ്പെട്ടതായിരുന്നു. സാംസ്കാരിക പ്രവർത്തനങ്ങളെ രാഷ്ട്രീയ പ്രവർത്തനത്തിനൊപ്പം കൊണ്ടു പോകുന്ന സവിശേഷമായ ശൈലിയായിരുന്നു അദ്ദേഹത്തിന്റേത്. ആ ശൈലിയുടെ സ്വാഭാവികപരിണിതിയാകാം അന്ത്യയാത്രയ്ക്ക് വയലാറിന്റെ ഗാനം അകമ്പടിയാവണമെന്ന അദ്ദേഹത്തിന്റെ ആഗ്രഹം.
രാഷ്ട്രീയത്തിൽ മതം ഇടപെടുന്നത് അപകടകരമാണെന്ന് ചിന്തിക്കുകയും ആ ചിന്ത മുൻനിർത്തി സ്വന്തം സംസ്കാരം മതനിരപേക്ഷമായിരിക്കണമെന്ന് നിർബന്ധം പിടിക്കുകയും ചെയ്തു പി.ടി തോമസ്. കഴിഞ്ഞ വർഷം ഒക്ടോബറിലാണ് സഭയിൽ അവസാനമായി എത്തിയത്. അന്നും തനിക്ക് ശരിയെന്ന് തോന്നിയ കാര്യങ്ങളിൽ പിടി തോമസ് ശക്തമായ വാദം ഉന്നയിച്ചു. യോജിക്കുകയോ, വിയോജിക്കുകയോ ചെയ്യാം, എന്നാൽ കേട്ടില്ലെന്ന് നടിക്കാൻ ആർക്കും സാധ്യമല്ലെന്ന തരത്തിൽ തന്നെയായിരുന്നു ആ ശബ്ദം. കേരളത്തിന്റെ രാഷ്ട്രീയ പൊതുമണ്ഡലത്തെ ആകെ വേദനിപ്പിക്കുന്നതാണ് അദ്ദേഹത്തിന്റെ വിയോഗം.
പ്രതിപക്ഷ നേതാവ് വിഡി സതീശന്റെ വാക്കുകൾ…
പി.ടി തോമസിന്റെ അവിശ്വസനീയമായ വേര്പാടും പി.ടി ഇല്ലാത്ത നിയമസഭയും യുഡിഎഫിന് ഉള്ക്കൊള്ളാനാകില്ല. ഭൂമിയില് ജീവിച്ച് കൊതി തീരാതെയാണ് അദ്ദേഹം നമ്മളില് നിന്നും വേര്പെട്ടു പോയത്. ഒരു കാലത്ത് മനുഷ്യന് ചെന്നെത്താന് ബുദ്ധിമുട്ടിയിരുന്ന ഇടുക്കിയിലെ ഒരു ഉള്നാടന് ഗ്രാമത്തില് നിന്നും കടന്നു വന്ന് കേരളത്തിലെ സാമൂഹിക രാഷ്ട്രീയ രംഗത്ത് ഇടിമുഴക്കങ്ങളുണ്ടാക്കിയിട്ടാണ് പി.ടി തോമസ് കടന്നു പോയത്. നിലപാടുകളിലെ കാര്ക്കശ്യമാണ് പി.ടിയെ വ്യത്യസ്തനാക്കിയിരുന്നത്. കാര്യങ്ങള് പഠിച്ച് മനസിലാക്കി തനിക്കുണ്ടാകുന്ന ബോധ്യങ്ങളിലേക്ക് മറ്റുള്ളവരെ കൊണ്ടുവരാനും ആ ബോധ്യങ്ങളില് ഉറച്ചു നില്ക്കാനും അദ്ദേഹം എന്നും കരുത്ത് കാട്ടിയിട്ടുണ്ട്.
വിദ്യാര്ഥി യുവജന പ്രസ്ഥാനങ്ങളിലെ അഗ്നിയായിരുന്നു പി.ടി തോമസ്. വിദ്യാര്ഥി രാഷ്ട്രീയ കാലത്തെ തീ അവസാന ശ്വാസം വരെ കാത്തു സൂക്ഷിച്ചിരുന്നു. ഏറ്റെടുക്കുന്ന നിയോഗങ്ങള് പൂര്ണതയിലെത്തിക്കാനുള്ള പ്രതിബന്ധത പുലര്ത്തിയിരുന്നു. രാഷ്ട്രീയ കാര്യങ്ങളില് മാത്രമല്ല പാരിസ്ഥിതിക പ്രശ്നങ്ങളിലും പി.ടിക്ക് ഉറച്ച നിലപാടുകളുണ്ടായിരുന്നു. ആ നിലപാടുകള് പിന്നീട് വിവാദങ്ങളായി മാറിയിട്ടുണ്ട്. എന്നാല് അതിലൊന്നും വീട്ടുവീഴ്ച ചെയ്യാതെ, തളര്ന്നു പോകാതെ, പിന്തിരിഞ്ഞോടാതെ, അതിനെ മറികടക്കാനുള്ള ആര്ജ്ജവത്തോടെ എന്നും നിലനിന്നു.
Also Read :
കിട്ടാവുന്ന രേഖകള് മുഴുവന് സമാഹരിച്ച് തന്റെ വാദമുഖങ്ങളെ സമ്പന്നമാക്കുവാന് ഗവേഷണം നടത്തുകയും പഠനം നടത്തുകയും ചെയ്യുമായിരുന്നു. സാമൂഹിക രാഷ്ട്രീയ രംഗത്തു മാത്രമല്ല സാംസ്കാരിക രംഗത്തും അദ്ദേഹം സജീവമായിരുന്നു. അദ്ദേഹത്തിന്റെ നേതൃത്വത്തില് രൂപീകരിച്ച ‘മാനവ സംസ്കൃതി’യുടെ പ്രവര്ത്തനങ്ങളും സാംസ്കാരിക പ്രവര്ത്തകരുമായുള്ള ബന്ധവും പരന്ന വായനയും എഴുതാനുള്ള ആഗ്രഹവുമൊക്കെ സാംസ്കാരിക രംഗത്തും അദ്ദേഹത്തെ വ്യത്യസ്തനാക്കി.
പി.ടി ഒരു പോരാളിയായിരുന്നു. എല്ലാ പോരാട്ടങ്ങളുടെയും മുന്നില് നിന്നു കൊണ്ട് കുന്ത മുനയായി മാറിക്കൊണ്ടിരുന്ന പോരാളിയായിരുന്നു. 2010ല് ഇതര സംസ്ഥാന ലോട്ടറി മാഫിയയ്ക്കെതിരായ പോരാട്ടം നടത്തുമ്പോള് ഡല്ഹിയിലെ കരുത്ത് പി.ടി തോമസായിരുന്നു. എന്റെ ജ്യേഷ്ഠ സഹോദരന് കൂടിയാണ് പി.ടി. ഞാന് തേവര എസ്.എച്ച് കോളജില് യൂണിറ്റ് പ്രസിഡന്റായിരുന്നപ്പോള് കെ.എസ്.യു സംസ്ഥാന പ്രസിഡന്റായിരുന്നു അദ്ദേഹം. വാത്സല്യത്തോടെ രാഷ്ട്രീയ രംഗത്തേക്ക് അദ്ദേഹം കൈപിടിച്ചുകൊണ്ടു വന്നവരില് ഒരാള് കൂടിയാണ് ഞാനെന്നത് അഭിമനത്തോടെ ഓര്ക്കുന്നു.
വ്യത്യസ്തമായി ചിന്തിക്കുകയും പ്രവര്ത്തിക്കുകയും ആര്ജ്ജവത്തോടെ അത് നടപ്പാക്കുകയും ചെയ്തിരുന്ന ഒരാളാണ്. കേരള സമൂഹത്തില് ജാതിമത ചിന്തകള്ക്ക് അതീതമായി മതേതരത്വത്തിന്റെ കൊടിക്കൂറ ഉയര്ത്തിപ്പിടിക്കാന് എന്നും ശ്രമിച്ചിരുന്ന ഒരാള് കൂടിയായിരുന്നു പി.ടി. വരാനിരിക്കുന്ന നാളുകളില് ഞങ്ങളുടെ വഴികളിലെ പ്രകാശഗോപുരമായി അദ്ദേഹം നില നില്ക്കുമെന്ന് ഉറപ്പുണ്ട്. പ്രിയങ്കരനായ ജ്യേഷ്ഠ സഹോദരന്റെ ഓര്മ്മകള്ക്ക് മുന്നില് ആദരവുകളര്പ്പിക്കുന്നു.
