താൻ ആലുവയിലെ ജയിലിലെത്തി ദിലീപിനെ സന്ദര്‍ശിച്ചപ്പോള്‍ കണ്ടത് കരളലിയിക്കുന്ന കാഴ്ചയായിരുന്നുവെന്ന് ആര്‍ ശ്രീലേഖ മനോരമ ന്യൂസിന് അനുവദിച്ച അഭിമുഖത്തിൽ പറഞ്ഞു. ദിലീപിന് എഴുന്നേൽക്കാൻ പോലും കഴിയുന്നുണ്ടായിരുന്നില്ല. സ്ക്രീനിൽ കണ്ട ദിലീപ് തന്നെയാണോ ഇതെന്നു സംശയം തോന്നിക്കുന്ന തരത്തിലുള്ള രൂപമായിരുന്നുവെന്നും അത്രത്തോളം വികൃതമായിരുന്നുവെന്നും അവര്‍ പറഞ്ഞു. ഈ സാഹചര്യത്തിൽ അദ്ദേഹത്തിന് ആവശ്യമായ സൗകര്യം ഒരുക്കുക മാത്രമാണ് ചെയ്തതെന്നും ഇത് ഏതൊരു സാധാരണക്കാരനും ചെയ്തു കൊടുക്കുന്ന സഹായം മാത്രമാണെന്നും അവര്‍ കൂട്ടിച്ചേര്‍ത്തു.
Also Read:
അക്കാലത്ത് തനിക്കെതിരെ ഏറെ വ്യാപ്രചാരണങ്ങളുണ്ടായെന്നും ശ്രീലേഖ ചൂണ്ടിക്കാട്ടി. ദിലീപ് അറസ്റ്റിലായ സമയത്ത് താൻ തിരുവനന്തപുരത്തായിരുന്നുവെന്നും എന്നാൽ പിന്നീട് ഒരു പരിപാടിയ്ക്കായി കോഴിക്കോട്ട് എത്തിയപ്പോഴാണ് മാധ്യമപ്രവര്‍ത്തകര്‍ ദിലീപിന് പ്രത്യേക സൗകര്യങ്ങള്‍ ചെയ്തു കൊടുത്തിട്ടുണ്ടോ എന്നു ചോദിച്ചതെന്നും അവര്‍ ചൂണ്ടിക്കാട്ടി. ഇല്ലെന്ന് മറുപടി നല്‍കി. ഇതിനു ശേഷം മാത്രമാണ് താൻ ദിലീപിനെ ആലുവ സബ് ജയിലിലെത്തി സന്ദര്‍ശിച്ചത്.
ജയിലിലെത്തിയപ്പോള്‍ ദിലീപ് മൂന്നുനാലു തടവുകാരുടെ ഇടയിൽ തറയിൽ പായ വിരിച്ചു കിടക്കുകയായിരുന്നുവെന്ന് ശ്രീലേഖ പറഞ്ഞു. ദിലീപിനെ തട്ടിവിളിച്ചപ്പോള്‍ എഴുന്നേൽക്കാൻ പോലും കഴിയുമായിരുന്നില്ലെന്നും വിറയ്ക്കുന്നുണ്ടായിരുന്നുവെന്നും അവര്‍ പറഞ്ഞു. അഴിയിൽ പിടിച്ച് എഴുന്നേറ്റു നിന്നെങ്കിലും വീണുപോയെന്നും അവര്‍ പറഞ്ഞു. സ്ക്രീനിൽ കണ്ട ആളുതന്നെയാണോ എന്നു സംശയം തോന്നുന്ന തരത്തിലുള്ള രൂപമായിരുന്നുവെന്നും ഇതു കണ്ടു മനസലിഞ്ഞതോടെയാണ് സഹായിക്കാൻ തീരുമാനിച്ചതെന്നും അവര്‍ വ്യക്തമാക്കി.
Also Read:
ദിലീപിനെ കൊണ്ടുവന്ന് ജയിൽ സൂപ്രണ്ടിൻ്റെ മുറിയിലിരുത്തി. എന്നാൽ ദിലീപിനു സംസാരിക്കാനോ ഭക്ഷണം കഴിക്കാനാ സാധിക്കുന്നുണ്ടായിരുന്നില്ല. കുടിക്കാൻ ഒരു കരിക്കു കൊടുത്തു. ദയയുടെ പുറത്താണ് അതു ചെയ്തതെന്നും ആരെയും ഇത്രയധികം ദ്രോഹിക്കാൻ പാടില്ലെന്നും ശ്രീലേഖ പറഞ്ഞു. ദിലീപിൻ്റെ സ്ഥിതി കണക്കിലെടുത്ത് പ്രത്യേകമായി രണ്ട് പായയും ഒരു ബ്ലാങ്കറ്റും കൊടുക്കുകയും ചെയ്തു. ചെവിയുടെ ബാലൻസിൻ്റെ പ്രശ്നം ഉണ്ടായിരുന്നതു കൊണ്ട് ഡോക്ടറെ വിളിച്ചു വരുത്തി ഇക്കാര്യം പരിശോധിച്ചു.
വിചാരണത്തടവുകാരനായതിനാൽ ദിലീപിനു വീട്ടിൽ നിന്നു ഭക്ഷണം എത്തിക്കുന്നതിൽ തടസ്സമില്ലെന്നും ഏതൊരു സാധാരണക്കാരനായാലും ഈ പരിഗണന ലഭിക്കുമായിരുന്നുവെന്നും അവര്‍ പറഞ്ഞു. എന്നാൽ ഈ സംഭവമെല്ലാം നടക്കുന്നതിനു മുൻപാണ് താൻ ദിലീപിനെ സഹായിച്ചെന്ന ആരോപണം നേരിട്ടതെന്നും അവര്‍ ചൂണ്ടിക്കാട്ടി.
പ്രധാനപ്പെട്ട വ്യക്തികള്‍ ജയിലിൽ കിടക്കുമ്പോള്‍ പണം കൊടുത്ത് ഉദ്യോഗസ്ഥരെ സ്വാധീനിക്കുന്നതും അവര്‍ക്ക് ഉദ്യോഗസ്ഥര്‍ സഹായങ്ങള്‍ ചെയ്തു കൊടുക്കുന്നതുമായ സംഭവങ്ങള്‍ ഉണ്ടായിട്ടുണ്ട്. എന്നാൽ ദിലീപിൻ്റെ കാര്യത്തിൽ ഇങ്ങനെ ഉണ്ടായിട്ടില്ലെന്ന് ആര്‍ ശ്രീലേഖ പറഞ്ഞു. ദിലീപിനു നല്‍കിയത് മാനുഷിക പരിഗണന മാത്രമാണെന്ന് അവര്‍ പറഞ്ഞു. താനൊരു പോലീസ് ഉദ്യോഗസ്ഥയായതിനാൽ ദിലീപ് അഭിനയിച്ചതാണോ അല്ലയോ എന്നു മനസ്സിലാക്കാൻ സാധിക്കും. ദിലീപിന് എസി മുറിയോ വിഐപി പരിഗണനയോ നല്‍കിയിട്ടില്ല. മാനുഷിക പരിഗണന മാത്രമാണ് കാണിച്ചതെന്നും ശ്രീലേഖ വ്യക്തമാക്കി.
അതേസമയം, ആക്രമിക്കപ്പെട്ട നടി തന്‍റെ മുന്നിൽ വന്നിട്ടില്ലെന്നും അവരെപ്പറ്റി മാധ്യമങ്ങളിലൂടെ മാത്രമാണ് അറിവുള്ളതെന്നും മുൻ ഡിജിപി പറഞ്ഞു. അവരെ പൂര്‍ണമായി പിന്തുണയ്ക്കുന്നു. എന്നാൽ കേസിൻ്റെ പേരിൽ ആരെ അറസ്റ്റ് ചെയ്താലും അവര്‍ക്ക് മാനുഷിക പരിഗണന ലഭിക്കേണ്ടതുണ്ടെന്നും അവര്‍ കൂട്ടിച്ചേര്‍ത്തു.
