സ്കൂളുകളുകൾ പൂർണമായി തുറക്കുന്നതിൻ്റെ ഭാഗമായി ഒരുക്കങ്ങൾ പൂർത്തിയായി. ശുചീകരണ പ്രവർത്തനങ്ങൾ തുടരുകയാണ്. കുട്ടികൾക്ക് യൂണിഫോം നിർബന്ധമാക്കില്ലെന്നും മന്ത്രി പറഞ്ഞു. കുട്ടികൾ യൂണിഫോം ധരിച്ച് സ്കൂളിൽ എത്തണമെന്നതിൽ സർക്കാരിന് കടുംപിടുത്തമില്ല. വിദ്യാർഥികളെ തിരിച്ചറിയുന്നതിനും ബസിൽ കൺസെഷൻ ലഭിക്കുന്നതിനുമാണ് യൂണിഫോം വേണമെന്ന അഭിപ്രായമുണ്ടായത്. ഹാജർ നിർബന്ധമാക്കില്ല. വിദ്യാർഥികൾ സ്കൂളിൽ എത്തുന്ന കാര്യത്തിൽ മാതാപിതാക്കളാണ് തീരുമാനമെടുക്കേണ്ടെതെന്നും മന്ത്രി വ്യക്തമാക്കി.
തിങ്കളാഴ്ച മുതൽ 47 ലക്ഷത്തോളം വിദ്യാർഥികൾ സ്കൂളിലെത്തും. ഒന്ന് മുതൽ പത്തുവരെ 38 ലക്ഷത്തിൽപരം വിദ്യാർഥികളും ഹയർ സെക്കൻഡറി വിഭാഗത്തിൽ ഏഴര ലക്ഷത്തോളം വിദ്യാർഥികളും വൊക്കേഷണൻ ഹയർ സെക്കൻഡറി വിഭാഗത്തിൽ 66,000 വിദ്യാർഥികളുമാണുള്ളത്. പ്രീ പ്രൈമറി സ്കൂളുകളിലും വിദ്യാർഥികളെത്തും. പ്രീപ്രൈമറി വിഭാഗത്തിൽ തിങ്കൾ മുതൽ വെള്ളിവരെ ദിവസങ്ങളിൽ ഓരോ ദിവസവും അമ്പത് ശതമാനം കുട്ടികളെ ഉൾപ്പെടുത്തി ഉച്ചവരെ ക്ലാസുകൾ ഉണ്ടാകും. പ്രീ മൈറി മുതൽ എട്ടാം ക്ലാസുവരെയുള്ള ഉച്ചഭക്ഷണ പദ്ധതിയിൽ ഉൾപ്പെട്ടിട്ടുള്ള എല്ലാ വിദ്യാർഥികൾക്കും ഉച്ചഭക്ഷണം വിതരണം ചെയ്യും.
പ്രതിദിന കൊവിഡ് കേസുകളിൽ കുറവ് വന്നതോടെ സംസ്ഥാനത്തെ സ്കൂളുകൾ പഴയ രീതിയിലേക്ക് തിരിച്ച് പോകുകയാണ്. കേരളത്തിൽ ഇന്ന് 6757 പേര്‍ക്ക് കൊവിഡ് സ്ഥിരീകരിച്ചതോടെ 75,017 പേരാണ് രോഗം സ്ഥിരീകരിച്ച് ഇനി ചികിത്സയിലുള്ളത്. 63,23,697 പേര്‍ ഇതുവരെ കൊവിഡില്‍ നിന്നും മുക്തി നേടി. വിവിധ ജില്ലകളിലായി 1,80,392 പേരാണ് ഇപ്പോള്‍ നിരീക്ഷണത്തിലുള്ളത്. 1,76,266 പേര്‍ വീട്/ ഇന്‍സ്റ്റിറ്റിയൂഷണല്‍ ക്വാറന്റൈനിലും 4126 പേര്‍ ആശുപത്രികളിലും നിരീക്ഷണത്തിലാണ്. 632 പേരെയാണ് പുതുതായി ആശുപത്രിയില്‍ പ്രവേശിപ്പിച്ചത്. സംസ്ഥാനത്തെ ആകെ കൊവിഡ് മരണം 64,053 ആയി ഉയർന്നു.
