മുംബൈ: വരാപ്പുഴ പീഡനക്കേസ് പ്രതിയെ അടിച്ചുകൊന്ന് കിണറ്റിൽ തള്ളി. കണ്ണൂർ പയ്യന്നൂർ ചെറുപുഴ രാമപുരതൊഴുവൻ വിനോദ് കുമാറാണ് കൊല്ലപ്പെട്ടത്. മഹാരാഷ്ട്ര റായ്ഗഡിലെ കാശിദ് ഗ്രാമത്തിലെ കിണറ്റിൽ നിന്ന് തിങ്കളാഴ്ചയാണ് മൃതദേഹം കണ്ടെത്തിയത്. കല്ലുകെട്ടി താഴ്ത്തിയ നിലയിലായിരുന്നു മൃതദേഹം.
കൊലപാതകവുമായി ബന്ധപ്പെട്ട് രണ്ടുപേരെ മഹാരാഷ്ട്ര പോലീസ് കസ്റ്റഡിയിലെടുത്തു. ഇതിൽ ഒരാൾക്ക് പ്രായപൂർത്തിയായിട്ടില്ല. ഒരു റിസോർട്ടിൽ ജോലി ചെയ്തുവരികയായിരുന്നു . മദ്യപാനത്തിനിടെയുണ്ടായ തർക്കമാണ് കൊലപാതകത്തിലേക്ക് നയിച്ചതെന്ന് പോലീസ് പറഞ്ഞു. മൃതദേഹം മഹാരാഷ്ട്രയിൽ സംസ്കരിച്ചു.
നിരവധി കേസുകളിൽ പ്രതിയാണ് വിനോദ് കുമാർ. മഹാരാഷ്ട്രയിൽ റിസോർട്ടിൽ ജോലിചെയ്തുവരികയായിരുന്നുവെന്നാണ് റിപ്പോർട്ട്. 2011 മാർച്ചിലാണ് സംസ്ഥാനത്തെ ആദ്യ വനിതാ ഗുണ്ട ശോഭാ ജോണിനൊപ്പം വരാപ്പുഴ പീഡന കേസിൽ വിനോദ് കുമാർ പ്രതി ചേർക്കപ്പെട്ടത്.
കേസിൽ ശോഭാ ജോണിനേയും മുൻ ആർമി ഓഫീസർ ജയരാജൻ നായരേയും കുറ്റക്കാരാണെന്നു കണ്ടെത്തി കോടതി ശിക്ഷിച്ചിരുന്നു. വിനോദ് കുമാർ അടക്കം അഞ്ച് പേരെ തെളിവില്ലാത്തതിനാൽ വിചാരണ കോടതി വിട്ടയച്ചു.
