സ്വപ്നയ്ക്ക് ജോലി നൽകിയത് നിയമ വിരുദ്ധമാണെന്നും തനിക്കോ ബോർഡിനോ ഇതിൽ പങ്കില്ലെന്നും എച്ച്ആർഡിഎസിന്റെ കോർപറേറ്റ് സോഷ്യൽ റെസ്പോൺസിബിലിറ്റി ചെയർമാനും ബിജെപി നേതാവുമായ എസ് കൃഷ്ണകുമാർ പറഞ്ഞു. സ്വപ്നയുടെ നിയമനം റദ്ദാക്കുകയാണെന്നും ശമ്പളം നൽകിയിട്ടുണ്ടെങ്കിൽ അത് തിരിച്ചു പിടിക്കുമെന്നും അദ്ദേഹം പറഞ്ഞതായി മനോരമ ഓൺലൈൻ റിപ്പോർട്ട് ചെയ്തു.
മലയാളികൾ അടക്കമുള്ള ബിജെപി, ആർഎസ്എസ് നേതാക്കളാണ് എൻജിഒയുടെ വിവിധ സ്ഥാനങ്ങൾ വഹിക്കുന്നത്. എച്ച്ആർഡിഎസ് സെക്രട്ടറി അജി കൃഷ്ണനാണ് നിയമനത്തിനു പിന്നിലെന്നും അവരുടെ നിയമനത്തിന് ബോർഡിന്റെയോ ചെയർമാന്റെയോ അംഗീകാരം ലഭിച്ചിട്ടില്ലെന്നും കൃഷ്ണകുമാർ പറയുന്നു.
അജി കൃഷ്ണനെതിരായി കേരള രജിസ്ട്രാർ ഓഫ് സൊസൈറ്റീസിന് പരാതി നൽകിയിട്ടുണ്ട്. ഇതിന്റെ പകർപ്പ് മുഖ്യമന്ത്രി, ചീഫ് സെക്രട്ടറി, പോലീസ് മേധാവി, പാലക്കാട് കളക്ടർ എന്നിവർക്ക് അയച്ചിട്ടുണ്ടെന്നും കൃഷ്ണകുമാർ വ്യക്തമാക്കി. അജി കൃഷ്ണൻ, ജോയി മാത്യു എന്നിവർ സൊസൈറ്റിയുടെ നിയന്ത്രണം പിടിച്ചെടുത്തെന്നും ഫണ്ട് നിയമവിരുദ്ധമായ കാര്യങ്ങൾക്ക് ചെലവിട്ടതായും അദ്ദേഹം ആരോപിച്ചു.
43000 രൂപ പ്രതിമാസ ശമ്പളത്തിലായിരുന്നു സ്വപ്ന സുരേഷിന്റെ നിയമനം. തെറ്റ് ചെയ്യാതെ ജയിലിൽ എത്തിയ സ്ത്രീകൾക്കു വേണ്ടി പ്രവർത്തിക്കാനാകും. കേസും ജോലിയുമായി കൂട്ടിക്കുഴയ്ക്കാൻ ആഗ്രഹിക്കുന്നില്ല. തന്റെ പോസിറ്റീവും നെഗറ്റീവുമായ കാര്യങ്ങൾ പരിഗണിച്ചാണ് തനിക്ക് ജോലി നൽകിയതെന്നും ജോലിയിൽ പ്രവേശിച്ചതിനു പിന്നാലെ സ്വപ്ന പറഞ്ഞു.
