തിരുവനന്തപുരം: സി.പി.എമ്മിന്റെ ക്രൂരമായ മർദനത്തെ തുടർന്നാണ് കിഴക്കമ്പലം പഞ്ചായത്തിലെ ട്വന്റി 20 പ്രവർത്തകൻ ദീപു കൊല്ലപ്പെട്ടതെന്ന് പ്രതിപക്ഷ നേതാവ് വി.ഡി.സതീശൻ.
ജനാധിപത്യപരമായ രീതിയിൽ പ്രതിഷേധിക്കാൻ എല്ലാവർക്കും അവകാശമുണ്ട്. വിളക്കണയ്ക്കൽ സമരത്തിന് ആഹ്വനം നൽകിയതിന്റെ പേരിലാണ് പട്ടിജാതി കോളനിയിൽ കടന്നു കയറി സി.പി.എം പ്രദേശിക നേതാക്കളുടെ സാന്നിധ്യത്തിൽ ട്വന്റി 20 പ്രവർത്തകൻ ദീപുവിനെ മർദിച്ചത്. മർദനത്തെ തുടർന്ന് ആശുപത്രിയിൽ പ്രവേശിപ്പിച്ച അന്നുതന്നെ വെന്റിലേറ്ററിൽ പ്രവേശിപ്പിച്ചു. എം.എൾ.എയ്ക്കെതിരെ വിളക്കണയ്ക്കൽ സമരം നടത്തിയതിന് ക്രൂരമായ ആക്രമണമാണ് സി.പി.എം നടത്തിയതെന്നും സതീശൻ പറഞ്ഞു.
സംസ്ഥാനത്ത് പട്ടികജാതി വിഭാഗത്തിൽപ്പെട്ടവർക്കെതിരെ വ്യാപക ആക്രമം അഴിച്ചുവിടുകയാണ്. കേരള സർവകലാശാലയിലെ തെരഞ്ഞെടുപ്പിന് പിന്നാലെ യൂണിവേഴ്സിറ്റി കേളജിൽ ആക്രമണം നടത്തി. ആർട് ക്ലബ് സെക്രട്ടറി സ്ഥാനത്തേക്ക് കെ.എസ്.യു പ്രതിനിധി എതിരില്ലാതെ തെരഞ്ഞെടുക്കപ്പെട്ടതാണ് ആക്രമണത്തിന് കാരണം. ചവറ, ശാസ്താംകോട്ട കോളജുകളും എസ്.എഫ്.ഐ ആക്രമണത്തെ തുടർന്ന് അടച്ചിട്ടിരിക്കുകയാണ്. കോൺഗ്രസ് ബ്ലോക്ക് പ്രസിഡന്റിന്റെ വീടിനു നേരെ കല്ലെറിഞ്ഞു. ആരും ചോദ്യം ചെയ്യാൻ പാടില്ലെന്ന ധിക്കാരമാണ് സി.പി.എമ്മിന്.
പിണറായി സർക്കാരിന് തുടർ ഭരണം ലഭിച്ചതോടെ സി.പി.എം പോഷക സംഘടനാ നേതാക്കൾക്കുണ്ടായ ധാർഷ്ട്യത്തിന്റെ ഏറ്റവും ഒടുവിലത്തെ ഉദാഹരണമാണ് ദീപു എന്ന ചെറുപ്പക്കാരൻ. അതിനെ ന്യായീകരിക്കാൻ ശ്രമിക്കേണ്ട. ദീപുവിനെ സി.പി.എം പ്രവർത്തകർ തല്ലിക്കൊന്നതാണ്. വെന്റിലേറ്ററിൽ കിടക്കുന്നയാൾ പ്രതികൾക്കെതിരെ മൊഴി നൽകിയില്ലെന്ന സ്ഥലം എം.എൽ.എയുടെയും സി.പി.എമ്മിന്റെയും വാദം ബാലിശമാണെന്നും സതീശൻ പ്രതികരിച്ചു.
