“കണ്ണടച്ച് ഇരുട്ടാക്കിയിട്ട് കാര്യമില്ല, കർണാടകയിൽ മാത്രമല്ല കേരളത്തിലെ പല സ്കൂളുകളിലും ഹിജാബ് നിരോധനമുണ്ട്. സ്വകാര്യ ഉടമസ്ഥതയിലുള്ള സ്കൂളുകളിൽ മാത്രമല്ല, സർക്കാർ ശമ്പളം നൽകുന്ന പല എയ്ഡഡ് സ്കൂളുകളിലും ഹിജാബ് ധരിച്ച് ക്ലാസ്സിൽ ഇരിക്കാൻ അനുവാദമില്ല.”
“ഹിജാബ് നിരോധിച്ചിട്ടുണ്ട് എന്ന ഒറ്റക്കാരണത്താൽ പല മികച്ച എയ്ഡഡ് സ്കൂളുകളിലും അഡ്മിഷൻ എടുക്കാതെ താരതമ്യേന അടിസ്ഥാന സൗകര്യങ്ങൾ കുറവായ സ്കൂളുകളിൽ അഡ്മിഷൻ എടുക്കേണ്ടി വന്ന മുസ്‌ലിം വിദ്യാർഥിനികളെ എനിക്ക് നേരിട്ടറിയാം. ഇതു സംബന്ധമായ വിവരശേഖരണം ഞാൻ ഹരിതയുടെ പ്രസിഡണ്ട് ആയിരുന്ന കാലത്ത് നടത്തിയിട്ടുണ്ട്.”
“കർണാടകയിലെ പെൺകുട്ടികൾക്ക് കേരളത്തിലിരുന്ന് പിന്തുണ നൽകാൻ ഭരണാധികാരികൾക്ക് എളുപ്പമാണ്. കേരളത്തിലെ പല എയ്ഡഡ് സ്കൂളുകളിലുമുള്ള ഹിജാബ് നിരോധനം എടുത്തു കളഞ്ഞാണ് കേരളത്തിലെ ഭരണാധികാരികൾ ഭരണഘടനാ അവകാശത്തോട് കൂറ് പുലർത്തേണ്ടത്. കേവലം അഭിവാദ്യമർപ്പിക്കലോ പിന്തുണ നൽകലോ അല്ല ശക്തമായ ഭരണ നടപടികളാണ് നമുക്ക് ആവശ്യം.” ഫാത്തിമ പറഞ്ഞു.
അതേസമയം ഹിജാബ് വിഷയത്തിൽ കർണാടക ഹൈക്കോടതി ഉത്തരവിട്ടിരുന്നു. ഡ്രസ് കോഡ് ഏർപ്പെടുത്തിയിരിക്കുന്ന പ്രീ യൂണിവേഴ്സിറ്റി കോളേജുകളിൽ ഇനിയൊരു അറിയിപ്പ് ഉണ്ടാകുന്നതുവരെ മതപരമായ ചിഹ്നങ്ങൾ ധരിച്ച് എത്താൻ പാടില്ലെന്നാണ് ഹൈക്കോടതി ഉത്തരവ്.
“ഇനിയൊരു ഉത്തരവ് ഉണ്ടാകുന്നതുവരെ ക്ലാസ് മുറികളിൽ എല്ലാ വിദ്യാർത്ഥികളും മതമോ വിശ്വാസമോ പരിഗണിക്കാതെ കാവി ഷാളുകൾ, ഹിജാബ്, മത പതാകകൾ എന്നിവ കൊണ്ടുവരുന്നത് ഒഴിവാക്കുക.” “കോളേജ് അധികൃതർ യൂണിഫോം നിർദ്ദേശിച്ചിട്ടുള്ള സ്കൂളുകൾക്ക് മാത്രമാണ് ഈ ഉത്തരവ് ബാധകം.” എന്നാണ് കോടതി ഉത്തരവിട്ടിരിക്കുന്നത്.
