വിവാഹ വാർത്തയ്ക്കു പിന്നാലെ മേയർ ആര്യ രാജേന്ദ്രനെതിരെ സൈബർ ആക്രമണം

തിരുവനന്തപുരം: എംഎൽഎയുമായുള്ള തിരുവനന്തപുരം മേയർ ആര്യ രാജേന്ദ്രന്റെ വിവാഹ വാർത്ത പുറത്തുവന്നതിനു പിന്നാലെ ആര്യക്കു നേരെ സൈബർ ആക്രമണം. ആര്യയുടെ കോളേജ് ജീവിതവും സൗഹൃദവും വലിച്ചിഴച്ചാണ് കോൺഗ്രസ് നേതാവ് ബിന്ദു കൃഷ്ണ അടക്കമുള്ളവ‍ര്‍ സൈബര്‍ ആക്രമണവുമായി രംഗത്തെത്തിയിരിക്കുന്നത്. സംഘപരിവാ‍ര്‍ നിയന്ത്രണത്തിലുള്ള ഫേസ്ബുക്ക് പേജുകളും ആക്രമണവുമായി രംഗത്തുണ്ട്.

ആര്യയുടേയും സച്ചിന്റേയും വിവാഹ വാ‍ര്‍ത്ത പ്രസിദ്ധീകരിച്ച വിവിധ മാധ്യമങ്ങളുടെ വാ‍ര്‍ത്താ ലിങ്കുകൾക്ക് താഴെയും വിവിധ ഫേസ്ബുക്ക് പേജുകൾ കേന്ദ്രീകരിച്ചുമാണ് ആര്യയുടെ കോളേജ് കാലത്തെ ചിത്രങ്ങൾ കോൺഗ്രസ്, സംഘപരിവാ‍ര്‍ അണികൾ പ്രചരിപ്പിക്കുന്നത്. കോൺഗ്രസ് നേതാവ് അഡ്വ ബിന്ദു കൃഷ്ണ തന്റെ ഔദ്യോഗിക ഫേസ്ബുക്ക് പേജിലിട്ട പോസ്റ്റു കേന്ദ്രീകരിച്ചും വ്യക്തിഹത്യ നടക്കുന്നുണ്ട്.

Also Read:

“എല്ലാം പെർഫക്ട് ഓക്കെ. ബട്ട്, ആ അനുപമയ്ക്കെതിരെ അസഭ്യവർഷം നടത്തിയ സഖാക്കന്മാർ ഇവിടെ കമോൺ. തൊട്രാ പാക്കലാം.” എന്നാണ് ബിന്ദു കൃഷ്ണയുടെ പോസ്റ്റ്. നിരവധി കോൺഗ്രസ് പ്രവർത്തകരാണ് മേയറെ പരിഹസിച്ച് പോസ്റ്റിൽ കമന്റ് ഇട്ടിരിക്കുന്നത്.

മേയറുടേയും എംഎൽഎയുടേയും വിവാഹം സംബന്ധിച്ച് ഇരുവരുടേയും കുടുംബങ്ങൾ തമ്മിൽ ധാരണയായിരുന്നു. വിവാഹ തീയതി പ്രഖ്യാപിച്ചിട്ടില്ല. ബാലസംഘം, എസ്എഫ്ഐ പ്രവർത്തന കാലത്ത് ഇരുവരും തമ്മിൽ പരിചയമുണ്ട്.

Also Read:

തങ്ങൾ ഒരേ രാഷ്ട്രീയത്തിൽ വിശ്വസിക്കുന്നവരാണെന്നും രണ്ട് പേർക്കും കുടുംബവും രാഷ്ട്രീയവുമാണ് പ്രധാനമെന്നും ആര്യ പറഞ്ഞിരുന്നു. വിവാഹം സമയമെടുത്ത് ആലോചിക്കേണ്ട കാര്യമാണെന്നും തങ്ങൾ ഇരുവരും പരസ്പരം ആലോചിച്ച ശേഷം കുടുംബത്തെ വിവരം അറിയിക്കുകയായിരുന്നുവെന്നും ആര്യ പറഞ്ഞു.

രാജ്യത്തെ ഏറ്റവും പ്രായം കുറഞ്ഞ മേയറാണ് ആര്യ രാജേന്ദ്രൻ. നിയമസഭയിലെ പ്രയം കുറഞ്ഞ എംഎൽഎയാണ് സച്ചിൻ ദേവ്. കോഴിക്കോട് സ്വദേശിയായ സച്ചിൻ ദേവ് എസ്എഫ്ഐ അഖിലേന്ത്യ ജോയിന്റ് സെക്രട്ടറിയാണ്. തിരുവനന്തപുരമാണ് ആര്യയുടെ സ്വദേശം.