കൊച്ചി> ദുൽഖർ സൽമാനെ കേന്ദ്രകഥാപാത്രമാക്കി പ്രശസ്ത കൊറിയോഗ്രാഫർ ബൃന്ദ മാസ്റ്റർ സംവിധാനം ചെയ്യുന്ന ചിത്രം ‘ഹേ സിനാമിക’യിലെ പുതിയ പാട്ട് പുറത്തിറങ്ങി. ദുല്ഖറും അതിഥി റാവുവുമാണ് ഗാനരംഗത്തില് പ്രണയജോഡികളായെത്തുന്നത്.
മദന്കര്ക്കിയുടെ വരികള്ക്ക് ഗോവിന്ദ് വസന്താണ് സംഗീതം നല്കിയിരിക്കുന്നത്. ഗോവിന്ദ് വസന്ത് തന്നെയാണ് ഗാനം ആലപിച്ചിരിക്കുന്നത്. തമിഴ്, മലയാളം, തെലുഗു, കന്നഡ, ഹിന്ദി ഭാഷകളിലാണ് ചിത്രം റിലീസ് ചെയ്യുന്നത്. ‘കണ്ണും കണ്ണും കൊളളയടിത്താല്’ എന്ന സിനിമയ്ക്കു ശേഷം ദുല്ഖര് സല്മാന് നായകനാവുന്ന തമിഴ് സിനിമ കൂടിയാണ് ഹേ സിനാമിക.
ഗാനത്തിന്റെ പ്രൊമോഷന് വീഡിയോയുമായി വ്യാഴാഴ്ച ബോളിവുഡ് താരം രണ്ബീര് കപൂറും എത്തി. താന് ദുല്ഖറിന്റെ ഫാനാണെന്ന് പറഞ്ഞ താരം ഹേ സിനാമികയ്ക്ക് പിന്നിലുള്ള ടീമിന് ആശംസകളും അറിയിച്ചു.
രണ്ടു നായികമാര് ഉള്ള ചിത്രത്തില് നക്ഷത്ര നാഗേഷ്, മിര്ച്ചി വിജയ്, താപ്പ, കൗശിക്, അഭിഷേക് കുമാര്, പ്രദീപ് വിജയന് കോതണ്ഡ രാമന്, ഫ്രാങ്ക്, സൗന്ദര്യാ, ജെയിന് തോംപ്സണ്, നഞ്ഞുണ്ടാന്, രഘു, സംഗീത, ധനഞ്ജയന്, യോഗി ബാബു തുടങ്ങിയവര് അഭിനയിക്കുന്നു. ജിയോ സ്റ്റുഡിയോയും ഗ്ലോബല് വണ് സ്റ്റുഡിയോയും വയാകോം മോഷന് പിക്ചേഴ്സും ചേര്ന്ന് നിര്മ്മിച്ചിരിക്കുന്ന ചിത്രം കേരളത്തില് വിതരണം ചെയ്യുന്നത് ദുല്ഖറിന്റെ സ്വന്തം പ്രൊഡക്ഷന് ബാനര് ആയ വേഫേറര് ഫിലിംസ് ആണ്.
