മലമ്പുഴ > മല കയറുന്നതിനിടെ കാൽ വഴുതിവീണ് ചെങ്കുത്തായ പാറയിടുക്കിൽ കുടുങ്ങിയ യുവാവിനെ രക്ഷിക്കാനുള്ള ശ്രമം തുടരുന്നു. യുവാവിനെ രക്ഷിക്കാനായി ഊട്ടി വെല്ലിങ്ടണ്ണിൽ നിന്നെത്തിയ സംഘം രാത്രി 11.45ന് ചെറാട് മലയിലെ കാട്ടിലേക്ക് കയറി. സംഘത്തിൽ പർവതാരോഹകർ ഉൾപ്പെടെ 14 പേരുണ്ട്. യുവാവിന് ഭക്ഷണം എത്തിക്കുകയാണ് സംഘത്തിന്റെ പ്രഥമ പരിഗണന.
രക്ഷാപ്രവർത്തകർ ജില്ലാ കലക്ടർ മൃൺമയി ജോഷി, ജില്ലാ പൊലീസ് മേധാവി ആർ വിശ്വനാഥ് എന്നിവരുമായി കൂടിക്കാഴ്ച നടത്തി. പുലർച്ചയോടെ യുവാവിന് അടുത്തേക്ക് എത്തി ഭക്ഷണം നൽകും. രാവിലെ തന്നെ യുവാവിനെ നിലത്തിറക്കാനാണ് പദ്ധതി. പുലർച്ചെ 1.15ഓടെ ബെംഗലൂരുവിൽ നിന്നുള്ള കരസേനാ സംഘവും രക്ഷാപ്രവർത്തനത്തിനെത്തി.
