ബെവ്റിജസ് കോര്പ്പറേഷൻ പത്തനംതിട്ട മാനേജര് റെൻസി ഇസ്മായിലാണ് താൻ സുകുമാരക്കുറുപ്പിനെ കണ്ടെന്ന സംശയവുമായി രംഗത്തെത്തിയത്. താൻ അടുത്തിടെ ഒരു ട്രാവൽ ബ്ലോഗിലാണ് സുകുമാരക്കുറുപ്പ് എന്നു സംശയിക്കുന്ന ആളെ കണ്ടതെന്ന് റെൻസി പറയുന്നു. ഇദ്ദേഹം നല്കിയ വിവരങ്ങള് അനുസരിച്ച് കേരളത്തിലും ഇതരസംസ്ഥാനങ്ങളിലും അന്വേഷണം വ്യാപിപ്പിക്കാനാണ് ക്രൈം ബ്രാഞ്ച് പദ്ധതിയിടുന്നത്. സന്യാസിമാരുടേതു പോലെ കാഷായവേഷവും രുദ്രാക്ഷമാലയും ധരിച്ചയാള്ക്ക് നരച്ച താടിയും ഉണ്ടായിരുന്നു. ഇക്കാര്യങ്ങള് ചൂണ്ടിക്കാട്ടി ഇദ്ദേഹം മുഖ്യമന്ത്രിയ്ക്ക് അടക്കം പരാതി നൽകി. ഇതിൻ്റെ അടിസ്ഥാനത്തിലാണ് വീണ്ടും അന്വേഷണം തുടങ്ങിയതെന്ന് റിപ്പോര്ട്ടിൽ പറയുന്നു. അന്വേഷണത്തിൻ്റെ ഭാഗമായി ഇന്നലെ പത്തനംതിട്ടയിലെത്തിയ ക്രൈം ബ്രാഞ്ച് സംഘം റെൻസി ഇസ്മായിലിൻ്റെ മൊഴിയും രേഖപ്പെടുത്തി.
Also Read:
മുൻപ് ഗുജറാത്തിൽ അധ്യാപകനായി ജോലി ചെയ്യവോയാണ് റെൻസി ഇസ്മായിൽ ഒരു ആശ്രമത്തിലെ അന്തേവാസിയായ സ്വാമിയെ പരിചയപ്പെടുന്നത്. ശങ്കരഗിരി ഗിരി എന്ന പേരാണ് റിപ്പോര്ട്ടിൽ പരാമര്ശിക്കുന്നത്. തുടര്ന്ന് സുകുമാരക്കുറുപ്പിൻ്റെ ചിത്രങ്ങള് മാധ്യമങ്ങളിലൂടെ കണ്ടതോടെ താൻ കണ്ട സ്വാമി സുകുമാരക്കുറുപ്പാകാം എന്ന് ഇദ്ദേഹം സംശയിക്കുകയായിരുന്നു. തുടര്ന്ന് ഉടൻ തന്നെ ഇക്കാര്യം പോലീസിൻ്റെ ശ്രദ്ധയിൽപ്പെടുത്തിയെങ്കിലും കാര്യമായ നടപടിയുണ്ടായില്ലെന്നാണ് റെൻസി പറയുന്നത്.
എന്നാൽ രണ്ട് മാസം മുൻപ് ഒരു യാത്രാ വ്ളോഗ് കണ്ടതോടെയാണ് സംശയം ശക്തിപ്പെട്ടത്. ഹരിദ്വാറിലെ യാത്രാവിവരണം അടങ്ങുന്ന വീഡിയോയിൽ ഇതേ വ്യക്തിയെയാണ് കണ്ടതെന്നു ചൂണ്ടിക്കാട്ടിയ റെൻസി വീണ്ടും പരാതിയുമായി പോലീസിനെ സമീപിക്കുകയായിരുന്നു.
Also Read:
1984വെ ചാക്കോ വധക്കേസിലെ പ്രതിയായ സുകുമാരക്കുറുപ്പിനെ കണ്ടെത്താൻ ഇതുവരെ പോലീസിനു കഴിഞ്ഞിട്ടില്ല. കൊലപാതകത്തിനു ശേഷം ഒളിവിൽ പോയ ഇയാള്ക്കു വേണ്ടി ഇന്ത്യയിലെ പല സംസ്ഥാനങ്ങളിലും അന്വേഷണം വ്യാപിപ്പിച്ചെങ്കിലും ഫലമുണ്ടായില്ല. സുകുമാരക്കുറുപ്പിനെ കണ്ടെന്ന വെളിപ്പെടുത്തലുമായി മുൻപും പലരും രംഗത്തെത്തിയിട്ടുണ്ട്. അടുത്തിടെ ദുൽഖര് സൽമാൻ അഭിനയിച്ച കുറുപ്പ് എന്ന സിനിമയുമായി ബന്ധപ്പെട്ട് ചാക്കോ വധക്കേസ് വീണ്ടും മാധ്യമങ്ങളിൽ ഇടം പിടിച്ചിരുന്നു. 1984 ജനുവരി 21ന് മാവേലിക്കര പോലീസാണ് കേസ് രജിസ്റ്റര് ചെയ്തത്. നിലവിൽ ക്രൈം ബ്രാഞ്ച് ആലപ്പുഴ യൂണിറ്റിനാണ് കേസന്വേഷണത്തിൻ്റെ ചുമതല.
