തിരുവനന്തപുരം> മദ്യപാനത്തിനിടെ ഗുണ്ടകൾ തമ്മിലുണ്ടായ അടിപിടിയിൽ ഗുരുതരപരിക്കേറ്റ ഗുണ്ടാനേതാവ് മെൻറൽ ദീപു മരിച്ചു. ഫെബ്രുവരി 2നാണ് മർദ്നമേറ്റത്. കൊലക്കേസ് ഉൾപ്പെടെ നിരവധി കേസുകളിൽ പ്രതിയാണ് മെൻറൽ ദീപു.
വസ്തു വിൽപനയുമായി ബന്ധപ്പെട്ട വാക്കേറ്റത്തെ തുടർന്ന് കുപ്പികൊണ്ട് ദീപുവിനെ തലയ്ക്കും നെഞ്ചിലും ഇടിക്കുകയായിരുന്നുവെന്ന് പൊലീസ് പറയുന്നു. മറ്റൊരു കേസിൽ ജയിലിലായിരുന്ന ദീപു അടിയേൽക്കുന്നതിന് രണ്ട് ദിവസം മുമ്പാണ് ജാമ്യത്തിൽ ഇറങ്ങിയത്. കാട്ടായിക്കോണത്തിന് സമീപം ചന്തക്കവലയിൽ അടിയേറ്റ് രക്തം വാർന്ന് കിടന്ന ദീപുവിനെ പൊലീസാണ് ആശുപത്രിയിൽ എത്തിച്ചത്.
സംഭവത്തിൽ അയിരൂപ്പാറ കുട്ടൻ എന്ന സുനിൽകുമാർ(46)ഇടക്കരിക്കകം ലിബിൻ രാജ്(32), കാട്ടായിക്കോണം മോജിത്എന്ന പ്രവീൺകുമാർ(32)എന്നിവർ അറസ്റ്റിലാണ്. പ്രധാനപ്രതിയെന്ന് കരുതുന്ന സ്റ്റീഫൻ ഒളിവിലാണ്. മണ്ണുമാഫിയാ സംഘത്തിലുള്ളവരാണ് പിടിയിലായിട്ടുള്ളത്. അടിക്കിടെ കിളിമാനുർ സ്വദേശി ശ്രീകുമാറിനെ ദിപു കുടക്കമ്പി കൊണ്ട് കുത്തിയ കേസും പൊലീസ് അന്വേഷിക്കുന്നുണ്ട്.
