കൊച്ചി> നടൻ ദിലീപിനെതിരെ വെളിപ്പെടുത്തലുകൾ നടത്തിയ സംവിധായകൻ ബാലചന്ദ്രകുമാർ പീഡിപ്പിച്ചെന്ന യുവതിയുടെ പരാതിയിൽ എളമക്കര പൊലീസ് കേസെടുത്തു. കൊച്ചി സിറ്റി പൊലീസ് കമീഷണർ സി എച്ച് നാഗരാജുവിനാണ് കണ്ണൂർ സ്വദേശിനി പരാതി നൽകിയത്. 2010ൽ എറണാകുളം പുതുക്കലവട്ടത്തെ ഗാനരചയിതാവിന്റെ വീട്ടിൽ ബാലചന്ദ്രകുമാർ പീഡിപ്പിച്ചെന്നാണ് പരാതി.
ജോലി വാഗ്ദാനം ചെയ്ത് വിളിച്ചുവരുത്തിയശേഷം ബലാത്സംഗം ചെയ്തെന്ന് പരാതിയിൽ പറയുന്നു. പൊലീസിൽ അറിയിക്കുമെന്ന് പറഞ്ഞപ്പോൾ പീഡനദൃശ്യം കാണിച്ച് ഭീഷണിപ്പെടുത്തി. ബാലചന്ദ്രകുമാറിനെ പിന്നീട് കണ്ടിട്ടില്ലെന്നും മാധ്യമങ്ങൾവഴി വീണ്ടും കണ്ടതോടെയാണ് തിരിച്ചറിഞ്ഞതെന്നും പരാതിയിൽ പറയുന്നുണ്ട്. പീഡനത്തിന് ഇരയായതായി നേരത്തേ ചില ഓൺലൈൻ മാധ്യമങ്ങൾവഴി യുവതി വെളിപ്പെടുത്തിയിരുന്നു.
