പൂർണ്ണമായും കൊവിഡ് മാനദണ്ഡങ്ങൾ പാലിച്ചാണ് ക്ലാസുകൾ പ്രവർത്തിക്കുക. കഴിഞ്ഞ ദിവസം ചേർന്ന കൊവിഡ് അവലോകന യോഗത്തിലാണ് പത്ത്, പ്ലസ് വൺ, പ്ലസ് ടു ക്ലാസുകൾ തുറക്കാൻ തീരുമാനിച്ചത്.
പരീക്ഷയ്ക്കു മുമ്പ് പാഠഭാഗങ്ങൾ തീർക്കുന്നതിനാണ് ക്ലാസുകൾ വൈകിട്ടുവരെ നടത്തുന്നത്. ഒന്നു മുതൽ ഒമ്പത് വരെയുള്ള ക്ലാസുകൾ 14 നാണ് തുറക്കുക. കൂടാതെ കിൻഡർഗാർട്ടനുകളും തുറക്കും. ഈ ക്ലാസുകളും രാവിലെ മുതൽ വൈകുന്നേരം നടത്തുന്ന കാര്യം വിദ്യാഭ്യാസ വകുപ്പിന്റെ പരിഗണനയിലാണ്. ജനുവരി 21 മുതൽ ഈ ക്ലാസുകൾ ഓൺലൈനിലേക്ക് മാറ്റിയിരുന്നു.
അതേസമയം കോളേജുകൾ ഏഴാം തിയതി മുതലാണ് തുറക്കുന്നത്. ബിരുദ, ബിരുദാനന്തര ബിരുദ ക്ലാസ്സുകളും ഫെബ്രുവരി ഏഴിനാണ് ആരംഭിക്കുന്നത്. പരീക്ഷകള്‍ മുടക്കമില്ലാതെ നടത്തും.
കൊവിഡ് സ്ഥിരീകരണ നിരക്ക് കുറഞ്ഞതോടെയാണ് സ്കൂളുകൾ തുറക്കാൻ തീരുമാനമായത്. നിലവിൽ കൊവിഡ് വ്യാപനം രൂക്ഷമായ സി കാറ്റഗറിയിൽ ഒരു ജില്ല പോലുമില്ല. നേരത്തെ കൊവിഡ് വ്യാപനം രൂക്ഷമായിരുന്ന കൊല്ലം, തിരുവനന്തപുരം, പത്തനംതിട്ട, ആലപ്പുഴ, ഇടുക്കി, കോട്ടയം, വയനാട്, പാലക്കാട്, കണ്ണൂർ, എറണാകുളം, തൃശൂർ ജില്ലകൾ ബി കാറ്റഗറിയിലാണ്. ഇതോടെയാണ് സ്കൂളുകൾ തുറക്കുന്നത് അടക്കമുള്ള ഇളവുകളിലേക്ക് തീരുമാനം എത്തിയത്.
