ദമാസ്കസ്
വടക്കുപടിഞ്ഞാറൻ സിറിയയിലെ ഇന്ദ് ലിബില് അമേരിക്കൻ സൈന്യത്തിന്റെ വ്യോമാക്രമണത്തിൽ ഐഎസ് തലവൻ അബു ഇബ്രാഹിം അൽ ഹാഷിമി അൽ ഖുറേഷി കൊല്ലപ്പെട്ടെന്ന് അമേരിക്കൻ പ്രസിഡന്റ് ജോ ബൈഡൻ. ട്വിറ്ററിലൂടെയായിരുന്നു ബൈഡന്റെ പ്രഖ്യാപനം. വ്യാഴം പുലർച്ചെ നടത്തിയ ആക്രമണത്തിൽ ഖുറേഷി ചാവേറായി പൊട്ടിത്തെറിക്കുകയായിരുന്നെന്ന് അമേരിക്കൻ സൈന്യവും വ്യക്തമാക്കി. പൊട്ടിത്തെറിയിൽ ഖുറേഷിയുടെ കുടുംബാംഗങ്ങളും കൊല്ലപ്പെട്ടെന്നും സൈന്യം അവകാശപ്പെട്ടു.
2019ൽ അമേരിക്ക നടത്തിയ സമാന ആക്രമണത്തിൽ ഖുറേഷിയുടെ മുൻഗാമി അബു ബക്കർ അൽ ബാഗ്ദാദി കൊല്ലപ്പെട്ടിരുന്നു. തുടർന്നാണ് ഖുറേഷി നേതൃസ്ഥാനത്ത് എത്തിയത്. ഇന്ദ് ലിബിലെ ജനവാസകേന്ദ്രത്തിൽ അമേരിക്ക നടത്തിയ ആക്രമണത്തിൽ മൂന്ന് സ്ത്രീകളും നാല് കുട്ടികളും ഉൾപ്പെടെ 13 പേർ കൊല്ലപ്പെട്ടതായി സിറിയൻ മനുഷ്യാവകാശ സംഘടന റിപ്പോർട്ട് ചെയ്തിരുന്നു. അമേരിക്ക അഞ്ചുപ്രാവശ്യം വ്യോമാക്രമണം നടത്തി. ഐ എസ് തിരിച്ചടിച്ചതോടെ ഏറ്റുമുട്ടൽ മൂന്നു മണിക്കൂർ നീണ്ടു.
