അബുദബി> വാണിജ്യ വ്യവസായ രംഗത്തെ സഹകരണം കൂടുതല് ശക്തിപ്പെടുത്തുന്നതിന്റെ ഭാഗമായി അബുദാബി ചേംബറിന്റെ ഉന്നത തല സംഘം കേരളം സന്ദര്ശിക്കും. യുഎഇ സന്ദര്ശിക്കുന്ന മുഖ്യമന്ത്രി പിണറായി വിജയന് അബുദാബി ചേംബര് ചെയര്മാന് അബ്ദുള്ള മുഹമ്മദ് അല് മസ്രോയിയുമായി നടത്തിയ കൂടിക്കാഴ്ചയിലാണ് തീരുമാനം. കോവിഡ് വ്യാപനം കുറയുന്ന മുറയ്ക്ക് കേരളത്തിലെത്താനാണ് അബുദാബി ചേംബറിന്റെ തീരുമാനം. കേരളവുമായി ദീര്ഘകാലമായി പുലര്ത്തിവരുന്ന വാണിജ്യവ്യവസായ ബന്ധം ശക്തമായി തുടരുമെന്നും കൂടുതല് സഹകരണം കേരള സന്ദര്ശന ഘട്ടത്തില് സാധ്യമാകുമെന്നാണ് കരുതുന്നതെന്നും ചേംബര് ചെയര്മാന് അഭിപ്രായപ്പെട്ടു.
കേരളത്തില് നിലനില്ക്കുന്ന നിക്ഷേപസാധ്യതകളെ പൂര്ണ്ണമായി ഉപയോഗിക്കാന് അബുദാബി ചേംബറിന്റെ സഹകരണവും പിന്തുണയും മുഖ്യമന്ത്രി അഭ്യര്ത്ഥിച്ചു. നിക്ഷേപകര്ക്ക് അനുകൂലമായ നിലപാടാണ് സര്ക്കാരിനുള്ളത്. ഇതിനു വേണ്ട നടപടികള് വ്യവസായ വകുപ്പിന്റെ നേതൃത്വത്തില് നടപ്പാക്കുന്നതിനെ കുറിച്ചും വിവരിച്ചു.കേരളവും അബുദാബിയും തമ്മില് വാണിജ്യ വ്യവസായ മേഖലകളില് മികച്ച സഹകരണത്തിന്റെ സാധ്യതകളാണ് നിലനില്ക്കുന്നതെന്ന് അല് മസ്രോയി പറഞ്ഞു. കേരളത്തിനും കേരളത്തിലെ ജനങ്ങള്ക്കും എമിറാത്തികളുടെ ഹൃദയത്തിലാണ് സ്ഥാനം. അത്രമാത്രം അടുപ്പവും സ്നേഹവുമാണ് ജനങ്ങള് തമ്മിലുള്ളത്. മലയാളികള് സത്യസന്ധരും കഠിനാധ്വാനികളും വിശ്വസ്തരുമാണെന്നും അദ്ദേഹം പറഞ്ഞു.
കേരളത്തിന്റ വികസനത്തിനും പുരോഗതിക്കും നല്കുന്ന പിന്തുണയ്ക്ക് മുഖ്യമന്ത്രി നന്ദി അറിയിച്ചു.വ്യാഴം പകല് യുഎഇ അന്താരാഷ്ട്ര വ്യാപാര വകുപ്പ് മന്ത്രി ഡോ. താനി ബിന് അഹമ്മദ് അല് സിയൂദ്, മാനവവിഭവശേഷി, സ്വദേശിവല്ക്കരണ മന്ത്രി ഡോ. അബ്ദുല് റഹ്മാന് അബ്ദുല് മനാന് അല് അവാര് എന്നിവരുമായും മുഖ്യമന്ത്രി കൂടിക്കാഴ്ച നടത്തി. വ്യാപാര വകുപ്പ് മന്ത്രിയുമായുള്ള കൂടിക്കാഴ്ചയില് വ്യാപാര ബന്ധം കൂടുതല് ദൃഢപ്പെടുത്തണമെന്ന് മുഖ്യമന്ത്രി അഭ്യര്ഥിച്ചു. കേരളത്തിലെ വിപണി സാധ്യതകളും ചര്ച്ച ചെയ്തു.
വ്യവസായ മന്ത്രി പി രാജീവ്, ഇന്ത്യന് അംബാസഡര് സഞ്ജയ് സുധീര്, അബുദാബി ചേംബര് വൈസ് ചെയര്മാന് എംഎ യൂസഫലി, ജോണ് ബ്രിട്ടാസ് എംപി, വ്യവസായ വകുപ്പ് പ്രിന്സിപ്പിള് സെക്രട്ടറി മുഹമ്മദ് ഹനീഷ് എന്നിവരും സംബന്ധിച്ചു.
എക്സ്പോ 2020യിലെ കേരള പവലിയന് നാലിന് വൈകിട്ട് അഞ്ചിന് മുഖ്യമന്ത്രി ഉദ്ഘാടനം ചെയ്യും. കേരള പവലിയനില് നാലു മുതല് 10 വരെ നടക്കുന്ന ‘കേരള വാര’ത്തില് കേരളത്തിലെ ബിസിനസ്സ് സാധ്യതകള്, വ്യത്യസ്ത പദ്ധതികള്, നിക്ഷേപ മാര്ഗങ്ങള്, ടൂറിസം, ഐടി, സ്റ്റാര്ട്ടപ്, വൈദഗ്ധ്യം തുടങ്ങിയവ സംബന്ധിച്ച് അവതരണങ്ങളുണ്ടാകും.
