ഒരാളുടെ ശരീരത്തിൽ ഏറ്റവും കൂടുതൽ പ്രാണികളുടെ പച്ച കുത്തിയതിനുള്ള ഗിന്നസ് വേൾഡ് റെക്കോർഡ് നേടിയിരിക്കുകയാണ് മൈക്ക് അമോയ. ഗിന്നസ് വേൾഡ് റെക്കോർഡ്‌സ് തന്നെയാണ് ഇക്കാര്യം സമൂഹ മാധ്യമങ്ങളിലൂടെ വ്യക്തമാക്കിയത്. മൈക്ക് അമോയയുടെ ശരീരത്തിൽ പച്ചകുത്തിയിരിക്കുന്ന പ്രാണികളെ പ്രദർശിപ്പിക്കുന്ന ഒരു വീഡിയോയും ഗിന്നസ് വേൾഡ് റെക്കോർഡ്‌സ് പോസ്റ്റ് ചെയ്തിട്ടുണ്ട്.
ഒരു പ്രാണിയുടെ ഇമോട്ടിക്കോണിനൊപ്പം “ഏറ്റവും കൂടുതൽ പ്രാണികളുടെ പച്ച കുത്തിയ വ്യക്തി – മൈക്ക് അമോയ, 864” എന്ന കുറിപ്പോടെയാണ് ഗിന്നസ് വേൾഡ് റെക്കോർഡ്‌സ് വീഡിയോ പോസ്റ്റ് ചെയ്തിരിക്കുന്നത്. “പ്രാണികളല്ലാത്തവ (ചിലന്തികൾ, തേരട്ടകൾ, തേളുകൾ മുതലായവ) അവസാന കണക്കിലുള്ള 864ൽ കണക്കാക്കിയിട്ടില്ല എന്നത് ശ്രദ്ധിക്കേണ്ടതാണ്,” വേൾഡ് റെക്കോർഡ്‌സ് വീഡിയോ പോസ്റ്റ് പറയുന്നു.
ഏറ്റവും രസകമായ കാര്യം മൈക്ക് അമോയയ്ക്ക് പ്രാണികളെ കണ്ണെടുത്താൽ കണ്ടുകൂടാ എന്നതാണ്. “എനിക്ക് പ്രാണികളെ ഇഷ്ടമാണെന്ന് ധാരാളം ആളുകൾ കരുതുന്നത്. യഥാർത്ഥത്തിൽ ഇത് തികച്ചും വിപരീതമാണ്. ഞാൻ പ്രാണികളെ ഭയപ്പെടുന്നു, പ്രാണികളെ ഞാൻ വെറുക്കുന്നു. എന്നാൽ ഇതിന് (പച്ചകുത്തിയതിന്) ഒന്നിലധികം അർത്ഥങ്ങളുണ്ട്, അതുകൊണ്ടാണ് ഞാൻ അവ എന്റെ ശരീരത്തിലുടനീളം വയ്ക്കുന്നത്,” മൈക്ക് പറഞ്ഞു.
‘ഫോർ എ ബ്രൈറ്റ് ഫ്യൂച്ചർ’ എന്ന കുട്ടികളുടെ എൻജിഒയ്ക്കായി പണം സ്വരൂപിക്കുന്നതിനായി വിൽക്കാവുന്ന ഒരു എൻഎഫ്ടി സൃഷ്ടിക്കാൻ തന്റെ റെക്കോർഡ് തകർക്കുന്ന കലാസൃഷ്ടികൾ ഉപയോഗിക്കാൻ മൈക്കിന് പദ്ധതിയുണ്ട്. നിരവധി പേരാണ് മൈക്കിനെ അഭിനന്ദിച്ച് വൈറലായ വീഡിയോയ്ക്ക് കീഴെ കമന്റുകളുമായെത്തിയിരിക്കുന്നത്.
