ആന്റിഗ്വ
ഫൈനലിന് മുമ്പൊരു ഫൈനൽ. അതാണ് അണ്ടർ 19 ഏകദിന ക്രിക്കറ്റ് ലോകകപ്പിലെ ഇന്ത്യ–-ഓസ്ട്രേലിയ സെമി. നാലുവട്ടം ജേതാക്കളായ ഇന്ത്യക്ക് ഇത് തുടർച്ചയായ നാലാം സെമിയാണ്. ഓസീസാകട്ടെ, രണ്ടുതവണ ചാമ്പ്യൻമാരായി. ആന്റിഗ്വയിൽ ഇന്ന് വൈകിട്ട് 6.30നാണ് മത്സരം. സ്റ്റാർ സ്പോർട്സിലും ഹോട്സ്റ്റാറിലും കാണാം.
കളിച്ച നാലിലും ജയിച്ചാണ് ഇന്ത്യയുടെ വരവ്. ക്വാർട്ടറിൽ നിലവിലെ ചാമ്പ്യൻമാരായ ബംഗ്ലാദേശിനെ അഞ്ച് വിക്കറ്റിന് മടക്കി യാഷ് ദൂലും സംഘവും. സന്തുലിതമാണ് ടീം.
ആദ്യമത്സരത്തിനുശേഷം കോവിഡ് വ്യാപനംമൂലം ദൂലും വൈസ് ക്യാപ്റ്റൻ ഷെയ്ഖ് റഷീദും പുറത്തിരുന്നിട്ടും പകച്ചുപോയില്ല. ഉശിരൻ ജയങ്ങളുമായി മുന്നേറി.
പാകിസ്ഥാനെ തകർത്താണ് ഓസ്ട്രേലിയ എത്തുന്നത്. പതിനേഴുകാരൻ ഓപ്പണർ ടീഗ് വൈലിയാണ് അവരുടെ സൂപ്പർസ്റ്റാർ.
