രാവിലെ 6 മണിക്ക് എഴുന്നേൽക്കണോ? ഈ സമയത്ത് കൃത്യമായി ഉറങ്ങിയാൽ മതി

നമ്മളിൽ പലരും നേരിടുന്ന ഒരു പ്രശ്നമാണ് പുലർച്ചെ നേരത്തെ എഴുന്നേൽക്കണം എന്ന് തീരുമാനിക്കുന്നതും പിന്നീട് അലാറം ഓഫ് ചെയ്ത് സുഖമായി കിടന്നുറങ്ങുന്നതും. ആവശ്യത്തിന് ഉറക്കം ലഭിക്കാത്തതാണ് പലരും ഇത്തരത്തിൽ ഉറക്കം നീട്ടുന്നതിന് കാരണമായി പറയുക. അല്ലെങ്കിൽ ഉറങ്ങാൻ വൈകി എന്നതാവും എഴുന്നേൽക്കാനും വൈകിയതിനുള്ള വിശദീകരണം. എന്നാൽ എപ്പോഴെങ്കിലും പുലർച്ചെ നിങ്ങൾ ഉദ്ദേശിച്ച സമയത്ത് തന്നെ എഴുന്നേൽക്കാൻ രാത്രി കൃത്യം എത്ര മണിക്ക് ഉറങ്ങണം എന്ന് ചിന്തിച്ചു നോക്കിയിട്ടുണ്ടോ? ഉദാഹരണത്തിന് പുലർച്ചെ 6 മണിക്ക് എഴുന്നേൽക്കാൻ രാത്രി എത്ര മണിക്ക് ഉറങ്ങണം?

നമുക്ക് എപ്പോൾ എഴുന്നേൽക്കണം എന്നതിനെ അടിസ്ഥാനമാക്കി, ഉറങ്ങാൻ പോകുന്ന സമയം കൃത്യമായി പറയുന്ന ഒരു സ്ലീപ്പ് കാൽക്കുലേറ്റർ ഹോം ആൻഡ് ഡെക്കർ സൈറ്റായ ഹിലാരിസ് നിർമ്മിച്ചിട്ടുണ്ട്. കൂടുതൽ മണിക്കൂറുകൾ ഉറങ്ങുന്നതിനുപകരം ഉറക്കചക്രങ്ങളുമായി ബന്ധപ്പെട്ടാണ് മികച്ച ഉറക്കവും ഒപ്പം കൃത്യ സമയത്ത് എഴുനേൽക്കാനും സാധിക്കുന്നതാണ് ഹിലാരിസ് വ്യക്തമാക്കുന്നത്.

നിങ്ങൾക്ക് പുലർച്ചെ 7 മണിക്ക് എഴുന്നേൽക്കണം എന്നിരിക്കട്ടെ. അങ്ങനെയെങ്കിൽ നിങ്ങൾ രാത്രി 9.46ന് അല്ലെങ്കിൽ 11.16ന് ഉറങ്ങണം എന്നാണ് സ്ലീപ്പ് കാൽക്കുലേറ്റർ പറയുന്നത്. ഇനി അപ്പോൾ ഉറങ്ങാൻ പറ്റിയില്ല എങ്കിലോ? രാത്രി 12.46ന് അല്ലെങ്കിൽ 2.16ന് ഉറങ്ങിയാലും പുലർച്ചെ 7 മണിക്ക് എഴുന്നേൽക്കാവുന്ന വിധത്തിൽ ഉറക്കചക്രം പൂർത്തിയാവും. ശരാശരി 14 മിനിറ്റിനുള്ളിൽ ഒരാൾ സ്വാഭാവികമായി ഉറങ്ങും എന്നതിന്റെ അടിസ്ഥാനത്തിലാണ് സ്ലീപ്പ് കാൽക്കുലേറ്റർ പ്രവർത്തിക്കുന്നത്.

ഇനി രാവിലെ 6 മണിക്ക് എഴുന്നേൽക്കാൻ എത്ര മണിക്ക് ഉറങ്ങണം? സ്ലീപ്പ് കാൽക്കുലേറ്റർ അനുസരിച്ച രാത്രി 8.46, 10.16 അല്ലെങ്കിൽ 11.46 സമയത്ത് ഉറങ്ങണം. ഉറങ്ങാൻ വൈകിയാൽ 1.16 മണിക്ക് ഉറങ്ങിയാലും മതി. പുലർച്ചെ 6 മണിക്ക് സുഖമായി എഴുന്നേൽക്കാം.

ഇനിയൊരുപക്ഷേ നിങ്ങൾക്ക് കാലത്ത് 8 മണിക്ക് എഴുന്നേറ്റാൽ മതി എന്നാണോ? എങ്കിൽ ഉറങ്ങേണ്ടത് രാത്രി 10.46, 12.16, 1.46 എന്നീ സമയങ്ങളിലാണ്. പുലർച്ചെ 3.16ന് ഉറങ്ങിയാലും രാവിലെ 8 മണിക്ക് എഴുനേൽക്കാമത്രേ…