ഈ ആറു ഫോണുകള്‍ കേസിലെ നിര്‍ണായക തെളിവുകളാണെന്നാണ് പ്രോസിക്യൂഷൻ വാദിക്കുന്നത്. രാവിലെ പത്തേകാലിനു മുൻപായി ഫോണുകള്‍ രജിസ്ട്രാര്‍ ജനറലിനു മുന്നിൽ ഹാജരാക്കാനാണ് നിര്‍ദേശം. ദിലീപ് മുൻപ് ഉപയോഗിച്ച് രണ്ട് ഐഫോണുകള്‍ അടക്കം മൂന്ന് ഫോണുകള്‍, അനുജൻ അനൂപിൻ്റെ കൈവശമുള്ള രണ്ട് ഫോണുകള്‍, മറ്റൊരു ബന്ധുവിൻ്റെ ഒരു ഫോൺ എന്നിവയാണ് സമര്‍പ്പിക്കേണ്ടത്.
Also Read:
ഫോണുകള്‍ അന്വേഷണസംഘത്തിന് കൈമാറുന്നതിൽ വിമുഖത പ്രകടിപ്പിച്ച ദിലീപ് ഫോണുകള്‍ താൻ സ്വയം ഫോറൻസിക് പരിശോധനകള്‍ക്കായി അയച്ചെന്നു വാദിച്ചിരുന്നു. എന്നാൽ സ്വകാര്യ ഏജൻസിയ്ക്ക് ഫോൺ കൈമാറിയ ദിലീപിൻ്റെ നടപടി ഫോറൻസിക് പരിശോധനയായി കണക്കാക്കാനാകില്ലെന്ന് കോടതി വ്യക്തമാക്കുകയായിരുന്നു. അംഗീകൃത ഏജൻസികള്‍ക്ക് ഫോണുകള്‍ കണ്ടുകെട്ടാനും പരിശോധനയ്ക്ക് വിധേയമാക്കാനും അധികാരമുണ്ടെന്നു കോടതി വ്യക്തമാക്കി. ഇത്തരത്തിൽ മുംബൈയിലേയ്ക്ക് അയച്ച ഫോണുകള്‍ ഇന്നലെ രാത്രിയോടെയാണ് കൊച്ചിയിലെത്തിയത്. ഇന്ന് ഉച്ചയ്ക്ക് 1.45നാണ് കോടതി കേസ് പരിഗണിക്കുന്നത്.
Also Read:
കേസിൽ ദിലീപ് അടക്കമുള്ള പ്രതികളുടെ മുൻകൂര്‍ ജാമ്യാപേക്ഷയും ഇന്ന് ഹൈക്കോടതി സിംഗിള്‍ ബെഞ്ച് പരിഗണിക്കും. നടിയെ ആക്രമിച്ച കേസിലെ മാപ്പുസാക്ഷി വിപിൻ ലാലിലെ ഭീഷണിപ്പെടുത്തിയെന്ന കേസ് കാഞ്ഞങ്ങാട് ഹോസ്ദുര്‍ഗ് ഒന്നാം ക്ലാസ് മജിസ്ട്രേറ്റ് കോടതിയും ഇന്ന് പരിഗണിക്കും.
നടിയെ ആക്രമിച്ച കേസ് അന്വേഷിക്കുന്ന ഉദ്യോഗസ്ഥരെ അപായപ്പെടുത്താൻ കേസിലെ പ്രതികളായ ദിലീപും സഹോദരൻ അനൂപും സഹോദരീഭര്‍ത്താവ് സുരാജും ചേര്‍ന്ന് ഗൂഢാലോചന നടത്തിയെന്നാണ് പ്രോസിക്യൂഷൻ കേസ്. 2017 ഡിസംബറിൽ എറണാകുളം എംജി റോഡിലെ ദിലീപിൻ്റെ ഫ്ലാറ്റിൽ വെച്ചാണ് ഗൂഢാലോചന നടന്നതെന്നും പ്രോസിക്യൂഷൻ വാദിക്കുന്നു. ഇതു സംബന്ധിച്ച തെളിവുകള്‍ ദിലിപ് അടക്കമുള്ള പ്രതികളുടെ ഫോണുകളിൽ ഉണ്ടെന്നാണ് സംശയം. എന്നാൽ മുൻ ഭാര്യ മഞ്ജു വാര്യരുമായുള്ള സ്വകാര്യ സംഭാഷണങ്ങളുണ്ടെന്നും ഈ കാരണം കൊണ്ട് ഫോൺ കൈമാറാൻ സാധിക്കില്ലെന്നായിരുന്നു ദിലീപ് വാദിച്ചത്. ഈ വാദം കോടതി തള്ളിക്കളഞ്ഞു.
