കൊച്ചി
നഷ്ടത്തിലേക്ക് കൂപ്പുകുത്തിയതിനുപിന്നാലെ എറണാകുളം ടെലികോം ജില്ലയിലെ 32 ബിഎസ്എൻഎൽ ഉപഭോക്തൃ സേവനകേന്ദ്രങ്ങൾകൂടി സ്വകാര്യവൽക്കരിക്കാൻ കേന്ദ്രസർക്കാർ നീക്കം. എറണാകുളം, ഇടുക്കി, ലക്ഷദ്വീപ് ഉൾപ്പെടുന്ന ടെലികോം ജില്ലയിൽ എറണാകുളം 15, ഇടുക്കി എട്ട്, ലക്ഷദ്വീപ് ഒമ്പതുവീതം സേവനകേന്ദ്രങ്ങളുടെ പുറംകരാർ നടപടികൾ പുരോഗമിക്കുകയാണ്. 15–-20 ലക്ഷം രൂപ വരുമാനമുള്ളവയാണ് പലതും. ഇതോടെ ടെലികോം ജില്ലയിൽ ബിഎസ്എൻഎൽ നേരിട്ട് നടത്തുന്നത് 10 സേവനകേന്ദ്രങ്ങൾമാത്രമാകും.
കഴിഞ്ഞവർഷം 30 സേവനകേന്ദ്രങ്ങൾ പുറംകരാർ നൽകിയിരുന്നു. ഏറ്റെടുത്തവർ ഒരു കരാർ തൊഴിലാളിയെ നിയമിച്ച് കേന്ദ്രങ്ങൾ പ്രവർത്തിപ്പിച്ചെങ്കിലും കൃത്യമായി ശമ്പളം നൽകാതായതോടെ പലതും പൂട്ടി. ഇവ ഉൾപ്പെടെയാണ് ഇക്കുറി സ്വകാര്യവൽക്കരിക്കാൻ ഒരുങ്ങുന്നത്. ഇതോടെ എറണാകുളം ജില്ലയിൽ എട്ട് സേവനകേന്ദ്രങ്ങളാകും ബിഎസ്എൻഎൽ നേരിട്ട് നടത്തുക. ഇടുക്കിയിൽ മൂന്നാർ, തൊടുപുഴ കേന്ദ്രങ്ങളും. ലക്ഷദ്വീപിൽ ഒന്നുപോലും ഉണ്ടാകില്ല. അവിടെയുള്ളവർ സേവനങ്ങൾക്ക് എറണാകുളത്തെ ആശ്രയിക്കണം.
വരുമാനം നാലിലൊന്നായി ചുരുങ്ങി
കഴിഞ്ഞവർഷം പുറംകരാർ നൽകിയ കേന്ദ്രങ്ങളിലെ വരുമാനം ഒരുവർഷത്തിനുള്ളിൽ നാലിലൊന്നായി കുറഞ്ഞതായാണ് കണക്ക്. പിറവം കേന്ദ്രത്തിൽ 8–-10 ലക്ഷം രൂപ വരുമാനമുണ്ടായിരുന്നത് നാലുലക്ഷമായി ചുരുങ്ങി. ഇന്ത്യയിൽ ഏറ്റവും അധികം വരുമാനമുണ്ടാക്കുന്ന മൂന്നാമത്തെ ബിസിനസ് ഏരിയയാണ് എറണാകുളം ടെലികോം ജില്ല. 250 കോടി രൂപയിലധികം വരുമിത്. എന്നാൽ, സ്വകാര്യവൽക്കരണത്തിലൂടെ ഇവിടങ്ങളിലെ വരുമാനം കുത്തനെ ഇടിയും. ബിഎസ്എൻഎൽ നേരിട്ട് നടത്തുന്ന കേന്ദ്രങ്ങളിൽ ലഭിക്കുന്ന പല സേവനങ്ങളും പുറംകരാർ കേന്ദ്രത്തിൽ ലഭിക്കാത്തതാണ് കാരണം. സർക്കാർ–-അർധസർക്കാർ സ്ഥാപനങ്ങളുടെ ചെക്ക് ഉപയോഗിച്ചുള്ള പണമിടപാടുകൾ പുറംകരാർ കേന്ദ്രങ്ങളിൽ സാധിക്കില്ല. പോസ്റ്റ്പെയ്ഡ് മൊബൈൽ കണക്ഷൻ നൽകാനും കഴിയില്ല. ഒരു കുടുംബത്തിലെ ഒരാളുടെ ഫോൺ നമ്പർ മാറാതെ ആ കുടുംബത്തിലെ മറ്റൊരാളുടെ പേരിലേക്ക് കണക്ഷൻ മാറണമെങ്കിൽ ബിഎസ്എൻഎൽ നേരിട്ട് നടത്തുന്ന കേന്ദ്രത്തിലെത്തണം.
സ്വകാര്യവൽക്കരിക്കുന്നവ
പനമ്പിള്ളി നഗർ, മട്ടാഞ്ചേരി, ഇടപ്പള്ളി, കളമശേരി, തൃക്കാക്കര, മുളന്തുരുത്തി, കോലഞ്ചേരി, പിറവം, പാമ്പാക്കുട, കൂത്താട്ടുകുളം, ചെറായി, ഞാറക്കൽ, വരാപ്പുഴ, കാലടി, കിഴക്കമ്പലം, ഇടുക്കി, കരിമണ്ണൂർ, കട്ടപ്പന, കുമളി, മുട്ടം, നെടുങ്കണ്ടം, വണ്ണപ്പുറം, പീരുമേട്, അഗത്തി, അമിനി, ആന്ത്രോത്ത്, ചെറ്റ്ലത്ത്, കടമത്ത്, കൽപ്പേനി, കവരത്തി, കിൽതാൻ, മിനിക്കോയി.
