14 ജില്ലകളിലുമായി 410 കേന്ദ്രങ്ങളിലാണ് ഞായറാഴ്ച പോലീസ് പരിശോധന നടത്തിയത്. 161 കേസുകൾ രജിസ്റ്റർ ചെയ്തപ്പോൾ ഇവരുടെ പക്കൽ നിന്നും ലാപ് ടോപ് , മൊബൈൽ തുടങ്ങി 186 ഉപകരണങ്ങൾ പിടിച്ചെടുക്കുകയും ചെയ്തു. ഇവ വിദഗ്ധ പരിശോധനയ്ക്കായി അയക്കുമെന്നാണ് റിപ്പോർട്ട്.
Also Read :
സമൂഹ മാധ്യമങ്ങൾ വഴിയും ഡാർക്ക് നെറ്റിലൂടെയും കുട്ടികൾക്കെതിരെയുള്ള ലൈംഗികാതിക്രമങ്ങളുടെയും അശ്ലീല ചിത്രങ്ങളും കാണുന്നവരെയും ഡൗണ്‍ലോഡ് ചെയ്തും ഷെയര്‍ ചെയ്തും പ്രചരിപ്പിക്കുന്നവരെയും കണ്ടെത്താനായാണ് പരിശോധന നടത്തിയത്. വിദേശത്തു നിന്നുള്ള കുട്ടികളുടെ നഗ്ന ചിത്രങ്ങളായിരുന്നു നേരത്തേ പിടിച്ചെടുത്തതെങ്കിൽ ഇത്തവണ കേരളത്തിൽ നിന്നുള്ള കുട്ടികളുടെ ചിത്രങ്ങളും ഉണ്ടെന്നാണ് പോലീസിനെ ഉദ്ധരിച്ചുള്ള റിപ്പോർട്ട്.
അഞ്ചിനും പതനാറിനും ഇടയിലുള്ള കുട്ടികളുടെ നഗ്ന ചിത്രങ്ങൾ പിടിച്ചെടുത്തവയിൽ ഉണ്ട്. വാട്‌സാപ്പ്, ടെലഗ്രാം വഴിയാണ് കൂടുതല്‍ പ്രചരണം നടക്കുന്നത്. കഴിഞ്ഞ വർഷങ്ങളിലും ഓപ്പറേഷന്‍ പി ഹണ്ടിന്‍റെ ഭാഗമായി കുട്ടികള്‍ക്കെതിരെയുള്ള ലൈംഗികാതിക്രമം തടയാന്‍ പോലീസ് നടപടികള്‍ സ്വീകരിച്ചിരുന്നു. ഈ വർഷത്തെ ആദ്യത്തെ സംസ്ഥാന വ്യാപക പരിശോധനയാണ് ഇന്നലെ നടന്നത്.
Also Read :
കേരള പോലീസിന് കീഴിലുള്ള കൗണ്ടറിംഗ് ചൈല്‍ഡ് സെക്ഷ്വല്‍ എക്‌സ്‌പ്ലോയിറ്റേഷന്‍ സെന്ററാണ് ഇക്കാര്യം നിരീക്ഷിച്ചുകൊണ്ടിരിക്കുന്നത്. ജില്ലാ പോലീസ് മേധാവിയുടെ നേതൃത്വത്തിലായിരുന്നു എല്ലാ ജില്ലകളിലെയും പരിശോധന. കണ്ണൂര്‍ സിറ്റി പൊലീസ് പരിധിയിലെ 23 ഇടങ്ങളില്‍ ഓപറേഷന്‍ പി ഹണ്ടിന്‍റെ ഭാഗമായി റെയ്ഡ് നടത്തി. ഒരു കേസ് രജിസ്റ്റർ ചെയ്തു. ഇയാൾ അശ്ലീല വെബ്സൈറ്റുകള്‍ സന്ദര്‍ശിച്ചതിനും വീഡിയോ ഡൗണ്‍ലോഡ് ചെയ്തതിനുമുള്ള തെളിവുകള്‍ പോലീസ് ശേഖരിച്ചിട്ടുണ്ട്.
കോട്ടയം ജില്ലയിൽ രണ്ട് കേസ് രജിസ്റ്റർ ചെയ്തപ്പോൾ 16 പേർക്കെതിരെ കോടതിയിൽ റിപ്പോർട്ട് നൽകി. ആലുവയിൽ 18 പേർക്കെതിരെയാണ് കോടതിയിൽ റിപ്പോർട്ട് നൽകിയത്. കൊല്ലം ജില്ലയിലെ 16 സ്ഥലങ്ങളിൽ പരിശോധന നടത്തിയപ്പോൾ ഒമ്പത് മൊബൈലുകൾ പിടിച്ചെടുത്തു. മൂന്ന് കേസുകളാണ് ഇവിടെ രജിസ്റ്റർ ചെയ്തത്.
