ബ്ലേഡ്-മണൽ മാഫിയയുമായി മാത്രം കൂട്ടുകെട്ടുള്ള ആളാണ് സുധാകരൻ എന്ന് അനിൽ കുമാർ ആഞ്ഞടിച്ചു. സിപിഎമ്മിലെത്തിയ ശേഷം സുധാകരനെതിരെ രൂക്ഷ വിമർശനവുമായി അനിൽ കുമാർ സജീവമാണ്. ഇടുക്കിയിൽ എസ്എഫ്ഐ പ്രവർത്തകനായ എഞ്ചിനീയറിങ് വിദ്യാർത്ഥിയെ യൂത്ത് കോൺഗ്രസ് നേതാവ് കുത്തിക്കൊന്നതിനു പിന്നാലെ ധീരജിന്റെ മരണം സിപിഎം ഇരന്നു വാങ്ങിയതാണെന്ന് കെ സുധാകരൻ പ്രസ്താവന നടത്തിയിരുന്നു. ഇതിനോടാണ് അനിൽ കുമാറിന്റെ പ്രതികരണം.
“ധീരജിന്റെ മരണം നിങ്ങൾ ഇരന്നു വാങ്ങിയ മരണമാണ്, ഇരന്നു വാങ്ങിയ രക്തസാക്ഷിത്വമാണ്.” എന്നായിരുന്നു കെ സുധാകരന്റെ പ്രകോപനപരമായ പ്രസ്താവന. രൂക്ഷ വിമർശനമാണ് സുധാകരനെതിരെ സിപിഎമ്മിൽ നിന്നും ഉയരുന്നത്.
കൊലപാതകത്തിന് പ്രോത്സാഹനം നൽകുന്ന രീതിയാണ് കോൺഗ്രസിന്റേതെന്ന് മുഖ്യമന്ത്രി പിണറായി വിജയൻ പറഞ്ഞു. മരണം ഇരന്നു വാങ്ങിയവൻ എന്ന് കോൺഗ്രസ് പറയുന്നു. ഇത്തരം സാഹചര്യങ്ങളിൽ ഇങ്ങനെയാണോ പ്രതികരിക്കേണ്ടതെന്ന് മുഖ്യമന്ത്രി ചോദിച്ചു. സമാധാന അന്തരീക്ഷം തകർക്കുന്നതിൽ കോൺഗ്രസും ഭാഗമായെന്നാണ് ധീരജിന്റെ മരണത്തിലൂടെ നാം കാണേണ്ടതെന്ന് മുഖ്യമന്ത്രി വിമർശിച്ചു.
കെപിസിസി പ്രസിഡന്റ് അടക്കം നിരവധി കോൺഗ്രസ് നേതാക്കളാണ് ധീരജിന്റെ കൊലപാതകത്തെ ന്യായീകരിച്ച് രംഗത്തെത്തിയത്. ഈ പശ്ചാത്തലത്തിലാണ് കെ പി അനിൽ കുമാർ പ്രകോപനപരമായ പ്രസ്താവന നടത്തിയിരിക്കുന്നത്.
