“ധീരജിന്റെ മരണം നിങ്ങൾ ഇരന്നു വാങ്ങിയ മരണമാണ്, ഇരന്നു വാങ്ങിയ രക്തസാക്ഷിത്വമാണ്. എന്തെന്നറിയാമോ? കഴിഞ്ഞ കുറേ കാലമായി പ്രഫഷണൽ കോളേജുകളിൽ കെ എസ് യു മത്സരിക്കാറില്ല. ഇക്കുറി പ്രഫഷണൽ കോളേജുകളിൽ കെ എസ് യു ശക്തമാണ്.” എന്നായിരുന്നു കെ സുധാകരൻ ആലപ്പുഴയിൽ നടത്തിയ പ്രസ്താവന. ഇക്കുറി രണ്ടുംകൽപ്പിച്ച് എന്റെ കുട്ടികൾ രംഗത്തിറങ്ങിയിരിക്കുകയാണെന്നും സുധാകരൻ പറഞ്ഞു.
‘നിഖിൽ പൈലിയെ പുറത്താക്കില്ല’
മൂന്ന് സെന്റീമീറ്റർ ആഴമുള്ള മുറിവുകൊണ്ട് ധീരജ് എങ്ങനെ മരണപ്പെട്ടുവെന്നാണ് യൂത്ത് കോൺഗ്രസ് നേതാവ് രാഹുൽ മാങ്കൂട്ടത്തിൽ ചോദിക്കുന്നത്. ധീരജിനെ കൊലപ്പെടുത്തിയ നിഖിൽ പൈലി കുറ്റക്കാരനാണെന്ന് തെളിഞ്ഞാൽ മാത്രമേ യൂത്ത് കോൺഗ്രസിൽ നിന്നും പുറത്താക്കൂ എന്നും അദ്ദേഹം മാതൃഭൂമി ചാനൽ സംഘടിപ്പിച്ച ചർച്ചയിൽ പറഞ്ഞു.
“എസ്പിയുടെ റിപ്പോർട്ട് മൂന്ന് സെന്റീമീറ്റർ മാത്രമുള്ള മുറിവ് എന്നാണ്. അങ്ങനെയെങ്കിൽ മൂന്ന് സെന്റീമീറ്റർ ആളമുള്ള മുറിവുകൊണ്ട് എങ്ങനെ മരണമുണ്ടായി?” രാഹുൽ മാങ്കൂട്ടത്തിൽ ചോദിച്ചു.
ധീരജിന്റെ മരണ കാരണം ഹൃദയത്തിലേറ്റ ആഴത്തിലുള്ള മുറവാണെന്നാണ് പോസ്റ്റ്മോർട്ടം റിപ്പോർട്ട്. ആഴത്തിലുള്ള കുത്തിൽ ഹൃദയത്തിൻ്റെ അറകൾ തകർന്നു. തലയിലും ശരീരത്തിലും പരിക്കേറ്റതായും പ്രാഥമിക റിപ്പോർട്ടിൽ പറയുന്നുണ്ട്. അങ്ങനെയിരിക്കെയാണ് രാഹുലിന്റെ ന്യായീകരണം.
‘കർമ്മ’
ധീരജിന്റെ മരണം റിപ്പോർട്ട് ചെയ്തുള്ള ഏഷ്യൻ ന്യൂസ് ഏജൻസിയുടെ ട്വീറ്റ് ക്വോട്ട് ചെയ്തുകൊണ്ട് ‘കർമ്മ’ എന്നാണ് എഐസിസി വക്താവ് ഷമ മുഹമ്മദ് ട്വീറ്റ് ചെയ്തത്. രൂക്ഷമായ വിമർശനമാണ് ഷമയുടെ ട്വീറ്റിനെതിരെ ഉയരുന്നത്.
“സുധാകരനിസം= നോ കോംപ്രമൈസ്” എന്നാണ് എൽദോസ് കുന്നപ്പള്ളിയുടെ പ്രതികരണം. കൊന്നിട്ടും പക തീരാതെ ന്യായീകരിക്കരുതെന്നാണ് എൽദോസിന്റെ പോസ്റ്റിലെ കമന്റുകൾ. കെ സുധാകരൻ കെപിസിസി പ്രസിഡന്റ് ആയതിനു ശേഷമാണ് കോൺഗ്രസ് പ്രവർത്തകർ വീണ്ടും ആയുധമെടുക്കാൻ ഇറങ്ങിത്തിരിച്ചിരിക്കുന്നതെന്ന സിപിഎം നേതാക്കളുടെ വിമർശനത്തിന് പ്രതിരോധം ഒരുക്കുകയായിരുന്നു എൽദോസ്.
