കോട്ടയം: കോട്ടയം മെഡിക്കൽ കോളേജിൽനിന്ന് കഴിഞ്ഞ ദിവസം കുട്ടിയെ തട്ടിക്കൊണ്ട് പോയ കേസിൽ പിടിയിലായ നീതുവിന്റെ കാമുകൻ ഇബ്രാഹിം ബാദുഷ അറസ്റ്റിലായി. വഞ്ചന, ബാലനീതി വകുപ്പ് പ്രകാരമുള്ള വകുപ്പുകൾ ചുമത്തി ഇയാൾക്കെതിരെ പോലീസ് കേസെടുത്തു. കാമുകി നീതുരാജിനേയും അവരുടെ കുട്ടിയേയും ഇബ്രാഹിം മർദിച്ചെന്ന് പോലീസ് കണ്ടെത്തിയിരുന്നു. നീതുവിൽനിന്ന് ഇയാൾ ലക്ഷങ്ങൾ തട്ടിയതായും വ്യക്തമായിട്ടുണ്ട്.
കോട്ടയം മെഡിക്കൽ കേളേജിൽനിന്ന് രണ്ടു ദിവസം പ്രായമായ കുഞ്ഞിനെ നീതു തട്ടിയെടുത്തതിന് അറസ്റ്റിലായതോടെയാണ് മർദന വിവരങ്ങൾ പുറത്തുവന്നത്. നീതുവിന്റെ പരാതിയിലാണ് ഇബ്രാഹിംബാദുഷയുടെ അറസ്റ്റ് പോലീസ് രേഖപ്പെടുത്തിയിരിക്കുന്നത്.
അതേ സമയം കുട്ടിയെ തട്ടിയെടുത്ത കേസിൽ ഇബ്രാഹിം ബാദുഷയ്ക്ക് ബന്ധമില്ല. തന്റെ കാമുകനായ ഇയാളെ കബളിപ്പിക്കുന്നതിന് വേണ്ടിയാണ് നീതു കുട്ടിയെ തട്ടിയെടുത്തതെന്നാണ് പോലീസ് പറയുന്നത്.
നീതു ഗർഭിണിയായ വിവരം ഇബ്രാഹിമിനും വിദേശത്തുള്ള ഭർത്താവിനും അറിയാമായിരുന്നു. എന്നാൽ ഗർഭം അലസിപ്പിച്ച കാര്യം ഇബ്രാഹിമിൽനിന്ന് മറച്ചുവയ്ക്കുകയായിരുന്നു. ഇതിനിടെയാണ് ഇബ്രാഹിം മറ്റൊരു വിവാഹത്തിന് തയ്യാറെടുത്തത്. ഇതിൽ നിന്ന് പിന്തിരിപ്പിക്കാനാണ് ഇബ്രാഹിമിന്റെ കുഞ്ഞാണെന്ന് ചിത്രീകരിക്കാൻ കോട്ടയം മെഡിക്കൽ കോളേജിൽ എത്തി കുട്ടിയെ തട്ടിക്കൊണ്ട് പോയത്. ഇതിനായി വിശദമായ ആസൂത്രണം തന്നെ നീതു നടത്തിയിരുന്നു.
തട്ടിയെടുത്ത കുഞ്ഞ് ഇബ്രാഹിമിന്റേതാണെന്ന് വിശ്വസിപ്പിച്ച് വരുതിയിലാക്കാനായിരുന്നു ശ്രമം. പലപ്പോഴായി ഇബ്രാഹിം തന്റെ പക്കൽ നിന്ന് പണവും സ്വർണവും കൈക്കലാക്കിയിട്ടുണ്ടെന്നും നീതു പോലീസിനോട് പറഞ്ഞു. പണം കിട്ടിയിലെങ്കിൽ തന്നെ കുട്ടിയേയും മർദിച്ചിരുന്നുവെന്നും ഇവർ മൊഴി നൽകി. ഇതിന്റെ അടിസ്ഥാനത്തിൽ കസ്റ്റഡിയിലുണ്ടായിരുന്ന ഇബ്രാഹിം ബാദുഷയെ ചോദ്യം ചെയ്തപ്പോൾ മർദന വിവരം ഇയാൾ പോലീസിനോട് സമ്മതിച്ചു. വിവിധ വകുപ്പുകൾ പ്രകാരം കേസെടുത്ത ഇബ്രാഹിം ബാദുഷയെ നാളെ കോടതിയിൽ ഹാജരാക്കും.
ഒന്നര വർഷംമുൻപ് ടിക് ടോക് വഴിയാണ് നീതു ഇബ്രാഹിമിനെ പരിചയപ്പെട്ടത്.നീതുവിന്റെ ഭർത്താവ് വിദേശത്താണ് ജോലി ചെയ്തിരുന്നത്.ഇക്കാര്യം ഇവർ ഇബ്രാഹിമിൽനിന്ന് മറച്ചുവെച്ചു. താൻ വിവാഹമോചിതയാണെന്നാണ് ഇബ്രാഹിമിനെ നീതു വിശ്വസിപ്പിച്ചിരുന്നത്.ഇരുവരും തമ്മിൽ അടുപ്പത്തിലാകുകയും ചെയ്തത് ഇതിന് ശേഷമാണ്.
ഭർത്താവ് വിദേശത്തുനിന്ന് അവധിക്ക് വരുമ്പോൾ തന്റെ അച്ഛനും അമ്മയും വരുന്നുണ്ടെന്ന് പറഞ്ഞാണ് നീതു ഇബ്രാഹിമിനെ വിട്ടുപോകാറുള്ളതെന്നാണ് വിവരം.
content highlights:Abduction case: Neetus Boyfriend Ibrahim Badusha arrested
