മൗണ്ട് മൗംഗനൂയ്
ബംഗ്ലാ ഗർജനത്തിൽ കിവികൾ വിറച്ചു. ന്യൂസിലൻഡിനെ അവരുടെ തട്ടകത്തിൽ മലർത്തിയടിച്ച് ബംഗ്ലാദേശ് ടെസ്റ്റ് ക്രിക്കറ്റിൽ പുതിയ ചരിത്രമെഴുതി. ആദ്യടെസ്റ്റിൽ എട്ട് വിക്കറ്റിനാണ് ബംഗ്ലാദേശ് ലോക ചാമ്പ്യൻമാരെ തകർത്തത്. ന്യൂസിലൻഡിനെതിരായ ആദ്യടെസ്റ്റ് ജയം. കിവികളുടെ മണ്ണിൽ ക്രിക്കറ്റിലെ ഏതെങ്കിലുമൊരു വിഭാഗത്തിൽ ജയം നേടുന്നതും ആദ്യം. വിദേശമണ്ണിലെ ആറാംജയം.
എബദോത് ഹുസെെന്റെ തകർപ്പൻ ബൗളിങ്ങിനുമുന്നിൽ ന്യൂസിലൻഡ് തകരുകയായിരുന്നു. രണ്ടാം ഇന്നിങ്സിൽ 169ന് ന്യൂസിലൻഡ് പുറത്തായി. എബദോത് ആറ് വിക്കറ്റ് വീഴ്ത്തി. 40 റൺ ലക്ഷ്യവുമായി ഇറങ്ങിയ ബംഗ്ലാദേശ് രണ്ട് വിക്കറ്റ് നഷ്ടത്തിൽ ജയം നേടി. രണ്ട് ഇന്നിങ്സിലുമായി ഏഴ് വിക്കറ്റെടുത്ത എബദോതാണ് മാൻ ഓഫ് ദി മാച്ച്.
സ്കോർ: ന്യൂസിലൻഡ് 328, 169; ബംഗ്ലാദേശ് 458, 2–42.
അഞ്ചിന് 147 റണ്ണുമായി അഞ്ചാംദിനം തുടങ്ങിയ ന്യൂസിലൻഡിന് 15 റൺമാത്രമാണ് കൂട്ടിച്ചേർക്കാനായത്. ന്യൂസിലൻഡ് ഇന്നിങ്സിൽ അഞ്ചുപേർ റണ്ണെടുത്തില്ല. ബംഗ്ലാ നിരയിൽ മൂന്ന് വിക്കറ്റുമായി ടസ്കിൻ അഹമ്മദും തിളങ്ങി.
