പുതുവർഷാഘോഷവുമായി ബന്ധപ്പെട്ട് ഏർപ്പെടുത്തിയ രാത്രി നിയന്ത്രണം തൽക്കാലം തുടരേണ്ടതില്ലെന്ന് യോഗത്തിൽ തീരുമാനമായി. കല്യാണം, മരണാനന്തര ചടങ്ങുകള്‍, മറ്റു സാമൂഹ്യ രാഷ്ട്രീയ സാംസ്കാരിക, സാമുദായിക പൊതുപരിപാടികള്‍ എന്നിവ നടക്കുന്ന ഹാളുകളിൽ നിയന്ത്രണം ഏർപ്പെടുത്തി.
ഹാളുകളിൽ നടക്കുന്ന പരിപാടികളിൽ പങ്കെടുക്കുന്നവരുടെ എണ്ണത്തിൽ കുറവ് വരുത്തി. പുതിയ തീരുമാനപ്രകാരം 75 പേർക്ക് മാത്രമാണ് ഹാളുകളിലെ പരിപാടികൾക്ക് അനുമതിയുണ്ടാകുക. മുൻപ് 100 പേർക്കായിരുന്നു അനുമതി. തുറസായ സ്ഥലങ്ങളിൽ നടക്കുന്ന പരിപാടികളിൽ 150 പേർക്ക് പങ്കെടുക്കാം. നിലവിൽ അനുവദനീയമായ എണ്ണം 200 ആണ്.
കൊവിഡ് കേസുകളിൽ വർധനയുള്ളതിനാൽ വിദേശരാജ്യങ്ങളിൽ നിന്ന് എത്തുന്നവരിൽ പരിശോധന ശക്തമാക്കും. കുട്ടികൾക്കുള്ള കൊവിഡ് പ്രതിരോധ വാക്സിനേഷൻ വേഗത്തിലാക്കാനും മുഖ്യമന്ത്രിയുടെ അധ്യക്ഷതയിൽ ചേർന്ന കൊവിഡ് അവലോകന യോഗത്തിൽ തീരുമാനമായി. ഇതുവരെ കൊവിഡ് മരണ ധനസഹായത്തിന് അപേക്ഷിക്കാത്തവർ ഉടൻ തന്നെ അപേക്ഷിക്കണം. കയ്യിൽ കിട്ടിയ അപേക്ഷകളിൽ നടപറ്റി താമസിപ്പിക്കരുതെന്ന് ഉദ്യോഗസ്ഥർക്ക് മുഖ്യമന്ത്രി നിർദേശം നൽകി.
