എവി ഗോപിനാഥ് മുഖ്യമന്ത്രിയുമായി കൂടിക്കാഴ്ച നടത്തിയത് ചർച്ചയായതോടെ തങ്ങളുടെ കൂടിക്കാഴ്ചയ്ക്ക് രാഷ്ട്രീയ പ്രാധാന്യമില്ലെന്ന് അദ്ദേഹം പ്രതികരിച്ചു. പെരിങ്ങോട്ടുകുറിശി പഞ്ചായത്തിൽ നിർമ്മിക്കുന്ന ഒളപ്പമണ്ണ സ്മാരകം ഉദ്ഘാടനത്തിന് മുഖ്യമന്ത്രിയെ ക്ഷണിക്കാനാണ് താൻ പോയതെന്നും രാഷ്ട്രീയം ചർച്ച ചെയ്തില്ലെന്നുമാണ് പ്രതികരണം.
പഞ്ചായത്ത് പ്രസിഡന്‍റിന്‍റെ കത്ത് നൽകാനാണ് പോയത്. ജനുവരിയിൽ നടക്കുന്ന പരിപാടിയിൽ സംബന്ധിക്കാമെന്ന് മുഖ്യമന്ത്രിയില്‍ നിന്ന് ഉറപ്പ് കിട്ടിയെന്നും ഗോപിനാഥ് പറഞ്ഞു. സിപിഎം പ്രവേശനത്തെ സംബന്ധിച്ച ചോദ്യത്തോട് പ്രതികരിച്ച അദ്ദേഹം പോകണോ വേണ്ടയോയെന്ന് ഇപ്പോഴും തീരുമാനിച്ചിട്ടില്ലെന്നും പറഞ്ഞു.
സിപിഎം ജില്ലാ സമ്മേളനം നടക്കുന്നതിനിടെയാണു മുഖ്യമന്ത്രിയുമായി എ വി ഗോപിനാഥിന്‍റെ കൂടിക്കാഴ്ച. മുഖ്യമന്ത്രി താമസിക്കുന്ന കെഎസ്ഇബി ഇൻസ്പെക്‌ഷൻ ബംഗ്ലാവിൽ ഇന്നലെ രാത്രി പത്തിനായിരുന്നു സന്ദർശനം.
മുഖ്യമന്ത്രി വരുമ്പോൾ കാണുക എന്നതു സാമാന്യ മര്യാദയാണ്, അതിനപ്പുറം ഒരു രാഷ്ട്രീയമാനം കൂടിക്കാഴ്ചയ്ക്ക് ഇല്ല. പിണറായി വിജയനും താനും ഒരുമിച്ച് എംഎൽഎയായിരുന്നിട്ടുണ്ടെന്നും ഗോപിനാഥ് പറഞ്ഞു. സിപിഎം പ്രവേശനത്തിന് എകെ ബാലൻ ഇടനിലക്കാരനാകുന്നെന്ന പ്രചരണത്തോട് പ്രതികരിച്ച ഗോപിനാഥ് എ കെ ബാലൻ ഇടനിലക്കാരനല്ലെന്നും സിപിഎമ്മിൽ അല്ല കോൺഗ്രസിലാണ് ഇടനിലക്കാരുള്ളത് എന്നും പറഞ്ഞു.
നേരത്തെ കോൺഗ്രസ് വിട്ടശേഷം പെരിങ്ങോട്ടുകുറിശ്ശിയിൽ നടന്ന കെ കരുണാകരൻ അനുസ്മരത്തിൽ ഗോപിനാഥ് പങ്കെടുത്തിരുന്നു. ഇത് ഇദ്ദേഹം പാർട്ടിയിലേക്ക് മടങ്ങുമോയെന്ന അഭ്യൂഹങ്ങൾക്ക് വഴിതെളിയിച്ചെങ്കിലും താൻ പാർട്ടിയ്ക്ക് പുറത്ത് തന്നെയാണെന്നായിരുന്നു ഗോപിനാഥ് നൽകിയ വിശദീകരണം.
