പാർട്ടിക്ക് മറുപടി കത്ത് നൽകിയതിൻ്റെ അക്നോളജ്മെൻ്റ് രേഖ തൻ്റെ കൈവശമുണ്ട്. രജിസ്റ്റേർഡ് പോസ്റ്റ് ആയി ജില്ല കമ്മിറ്റിക്കാണ് അയച്ചത്. നിലവിലെ ദേവികുളം എംഎൽഎ രാജയെ നിയമസഭാ തെരഞ്ഞെടുപ്പിൽ പരാജയപ്പെടുത്താൻ ഗൂഢാലോചന നടത്തിയെന്ന കണ്ടെത്തൽ അടിസ്ഥാനരഹിതമാണ്. ചായക്കടയിൽ വെച്ച് താൻ ഗൂഢാലോചന നടത്തിയെന്നാണ് ആരോപണം. ചായക്കട എന്താ സ്വന്തമായി എടുത്തിരിക്കുകയാണോ എന്നും രാജേന്ദ്രൻ ചോദിച്ചു.
പാർട്ടിയിൽ ചിലർ തനിക്കെതിരെ പ്രവർത്തിക്കുന്നുണ്ട്. ഇക്കാര്യം ചൂണ്ടിക്കാട്ടി ജില്ലാ നേതൃത്വത്തിന് കത്ത് നൽകിയിരുന്നുവെങ്കിലും ഇതുവരെ നടപടിയുണ്ടായില്ല. മെമ്പർഷിപ്പ് നൽകുന്നതും ഒഴിവാക്കുന്നതുമെല്ലാം പാർട്ടിയുടെ അവകാശമാണ്. ഇക്കാലമത്രയും ആത്മാര്‍ത്ഥമായാണ് പാർട്ടിയിൽ പ്രവർത്തിച്ചതെന്നും എസ് രാജേന്ദ്രൻ വ്യക്തമാക്കി.
സിപിഎം വിട്ട് സിപിഐയിലേക്ക് പോകുമോ എന്ന ചോദ്യത്തിന് ശ്രദ്ധയോടെയാണ് അദ്ദേഹം മറുപടി നൽകിയത്. മോശം പാർട്ടി ഒന്നുമല്ല. ഞങ്ങളുടെ പാർട്ടിക്ക് ഒപ്പം നിൽക്കുന്ന പാർട്ടിയല്ലേ. എന്നാല്‍, 40 വര്‍ഷം അധ്വാനിച്ചത് ഒരു പാര്‍ട്ടിക്കു വേണ്ടിയാണ്. ഇവിടെ അധ്വാനിച്ചിട്ട് വേറൊരു ഓഫീസില്‍ പോയിട്ടാണോ ആനുകൂല്യം പറ്റുകയെന്നും രാജേന്ദ്രൻ ചോദിച്ചു.
ദേവികുളം നിയമസഭാ തെരഞ്ഞെടുപ്പ് വീഴ്ചയുമായി ബന്ധപ്പെട്ട് എസ് രാജേന്ദ്രനെ പാര്‍ട്ടിയിൽ നിന്നു പുറത്താക്കാൻ ജില്ലാ കമ്മിറ്റി കഴിഞ്ഞ ദിവസം ശുപാര്‍ശ ചെയ്തിരുന്നു. പാര്‍ട്ടി നിയോഗിച്ച കമ്മീഷൻ്റെ അന്വേഷണത്തിൽ അദ്ദേഹം കുറ്റക്കാരനാണെന്നു കണ്ടെത്തിയതിനെ തുടര്‍ന്നാണ് നടപടി. ഒന്നോ രണ്ടോ നേതാക്കന്മാരുടെ അടിമയായി ജീവിക്കാന്‍പറ്റില്ലെന്നായിരുന്നു എസ് രാജേന്ദ്രൻ്റെ നിലപാട്.
ബ്രാഞ്ച് തലം മുതലുള്ള പ്രവര്‍ത്തകര്‍ എസ് രാജേന്ദ്രനെതിരെ നല്‍കിയ പരാതിയുടെ അടിസ്ഥാനത്തിലാണ് നടപടി. തെരഞ്ഞെടുപ്പ് പ്രവര്‍ത്തനങ്ങളിൽ മുൻ എംഎൽഎ ആത്മാര്‍ഥത കാണിച്ചില്ലെന്നും പ്രചാരണത്തിൽ നിന്നു വിട്ടു നിന്നെന്നുമാണ് ആരോപണം. കൂടാതെ വോട്ടു ഭിന്നിപ്പിക്കാൻ ശ്രമിച്ചതായും രണ്ടംഗ കമ്മീഷൻ്റെ അന്വേഷണത്തിൽ കണ്ടെത്തിയിട്ടുണ്ട്. ഒരു വര്‍ഷത്തേക്ക് രാജേന്ദ്രനെ സിപിഎമ്മിൽ നിന്നു പുറത്താക്കാൻ ജില്ലാ കമ്മിറ്റി സംസ്ഥാന കമ്മിറ്റിയോടു ശുപാര്‍ശ ചെയ്തെന്നാണ് റിപ്പോര്‍ട്ടിൽ പറയുന്നത്.
അടിമാലി, മറയൂര്‍, മൂന്നാര്‍ ഏരിയാ കമ്മിറ്റി അംഗങ്ങള്‍ അടക്കമുള്ളവര്‍ എസ് രാജേന്ദ്രനെതിരെ പരാതി നല്‍കിയിരുന്നു. ദേവികുളത്തെ എൽഡിഎഫ് സ്ഥാനാര്‍ഥിയായി അഡ്വ. എ രാജയെ തെരഞ്ഞെടുത്തതിനു പിന്നാലെ എസ് രാജേന്ദ്രൻ ഇദ്ദേഹത്തെ പരാജയപ്പെടുത്താനായി പ്രവര്‍ത്തനങ്ങള്‍ നടത്തി എന്നാണ് ആരോപണം. സ്വകാര്യ യോഗങ്ങള്‍ ചേര്‍ന്ന എസ് രാജേന്ദ്രൻ എ രാജയെ തോൽപ്പിക്കാൻ ചിലരോട് ആവശ്യപ്പെട്ടെന്നാണ് ആരോപണം. തുട‍ര്‍ന്ന് ആരോപണങ്ങള്‍ അന്വേഷിക്കാൻ പാര്‍ട്ടി രണ്ടംഗ അന്വേഷണ കമ്മീഷനെ നിയമിക്കുകയായിരുന്നു.
