ലണ്ടൻ
മാഞ്ചസ്റ്റർ സിറ്റിയുമായി കിരീടപ്പോരാട്ടത്തിലുള്ള ലിവർപൂളിന് ഇംഗ്ലീഷ് പ്രീമിയർ ലീഗിൽ അപ്രതീക്ഷിത തിരിച്ചടി. ലെസ്റ്റർ സിറ്റിയോട് ഒരു ഗോളിന് യുർഗൻ ക്ലോപ്പിന്റെ സംഘം തോറ്റു. ഇതോടെ ഒന്നാമതുള്ള സിറ്റിയെക്കാൾ ആറ് പോയിന്റ് പിന്നിലായി ലിവർപൂൾ. 19 കളി അവസാനിക്കുമ്പോൾ സിറ്റിക്ക് നാൽപ്പത്തേഴും ലിവർപൂളിന് നാൽപ്പത്തൊന്നും പോയിന്റാണ്. മൂന്നാമതുള്ള ചെൽസിക്കും 41 പോയിന്റാണ്.
രണ്ടാംപകുതിയിൽ അഡെമോല ലൂക്മാൻ നേടിയ ഗോളിലാണ് ലെസ്റ്റർ ലിവർപൂളിനെ വീഴ്ത്തിയത്. തുടക്കത്തിൽത്തന്നെ ലിവർപൂളിന് പിഴച്ചു. 16–-ാംമിനിറ്റിൽ സൂപ്പർതാരം മുഹമ്മദ് സലാ പെനൽറ്റി പാഴാക്കി. സലായുടെ കിക്ക് ലെസ്റ്റർ ഗോൾ കീപ്പർ കാസ്പെർ ഷ്മെെച്ചേൽ തട്ടിയകറ്റി. സാദിയോ മാനെ മികച്ച അവസരം പാഴാക്കുകയും ചെയ്തു. പിന്നാലെ ലൂക്മാനിലൂടെ ലെസ്റ്റർ ലീഡ് നേടി. മത്സരത്തിൽ ലെസ്റ്റർ ലക്ഷ്യത്തിലേക്ക് തൊടുത്ത ഏക ഷോട്ടായിരുന്നു അത്.
കഴിഞ്ഞമത്സരത്തിൽ സിറ്റിയോട് 3–6ന് തോറ്റതാണ് ലെസ്റ്റർ. മറ്റു മത്സരങ്ങളിൽ ടോട്ടനം ഹോട്സ്പറിനെ സതാംപ്ടൺ 1–1ന് കുരുക്കി. വെസ്റ്റ്ഹാം യുണെെറ്റഡ് 4–1ന് വാറ്റ്ഫോർഡിനെ തകർത്തു. ക്രിസ്റ്റൽ പാലസ് മൂന്നു ഗോളിന് നോർവിച്ച് സിറ്റിയെയും മറികടന്നു.
