തൊഴിലാളി സ്നേഹം പറയുന്ന അറസ്റ്റിലായ കിറ്റക്സ് തൊഴിലാളികൾക്കു വേണ്ടി വക്കീലിനെ ഏർപ്പെടുത്താതെ പുറത്തു വന്ന് ചാനലുകളിൽ രാവിലെ മുതൽ വൈകിട്ടു വരെ മുതലക്കണ്ണീർ ഒഴുക്കുകയാണ്. നിരപരാധികളെന്ന് സാബു പറയുന്ന ജീവനക്കാർക്കു വേണ്ടി ഇനിയെങ്കിലും ഒരു വക്കീലിനെ വെച്ച് ജാമ്യം എടുക്കാനുള്ള പണി നോക്കണമെന്ന് ശ്രീനിജൻ പറഞ്ഞു.
തൊഴിലാളികൾ നിരപരാധികൾ ആണെങ്കിൽ എന്തുകൊണ്ട് കിറ്റക്സ് അഭിഭാഷകൻ അവർക്കുവേണ്ടി കോടതിയിൽ ഹാജരായില്ല? അവർക്കു വേണ്ടി ഹാജരായത് ജില്ലാ ലോയേഴ്സ് അതോരിറ്റിയുടെ അഭിഭാഷകനാണ്. തൊഴിലാളി സ്നേഹം പറയുന്ന സാബു ജേക്കബ് എന്തുകൊണ്ട് അഭിഭാഷകനെ ഏർപ്പെടുത്തി നൽകിയില്ലെന്ന് പറയണമെന്നും ശ്രീനിജൻ ആവശ്യപ്പെട്ടു, ട്വന്റിഫോർ ന്യൂസിന്റെ ചർച്ചയ്ക്കിടെയായിരുന്നു ശ്രീനിജന്റെ പ്രതികരണം.
എന്നാൽ ശ്രീനിജന്റെ ചോദ്യത്തിന് മറുപടി പറയാൻ സാബു എം ജേക്കബ് തയ്യാറായില്ല.
അതേസമയം പോലീസ് കസ്റ്റഡിയിലെടുത്ത 164 പേരിൽ 152 പേരെ മാത്രമേ തങ്ങൾക്ക് തിരിച്ചറിയാൻ സാധിച്ചിട്ടുള്ളൂ എന്ന് സാബു പറഞ്ഞു. സംഭവത്തിൽ 164 പേരെ കസ്റ്റഡിയിലെടുത്തെന്നാണ് പോലീസ് പറയുന്നത്. മുഴുവൻ പേരും പ്രതികളാമെന്നാണ് പോലീസ് അവകാശപ്പെടുന്നത്. ഇതിൽ 152 പേരെ മാത്രമേ ഞങ്ങൾക്ക് തിരിച്ചറിയാൻ സാധിച്ചിട്ടുള്ളൂ. ബാക്കിയുള്ളവർ എവിടെനിന്നാണെന്ന് കണ്ടെത്തേണ്ടിയിരിക്കുന്നു. മലയാളികളെ മാറ്റിനിർത്തി ഹിന്ദിക്കാരെ മാത്രമാണ് കൊണ്ടുപോയതെന്നും സാബു ആരോപിച്ചു.
40 പേരിൽ കുറഞ്ഞ ആളുകൾ മാത്രമേ കൃത്യത്തിൽ പങ്കെടുത്തിട്ടുള്ളൂ. പോലീസ് അറസ്റ്റ് ചെയ്ത പ്രതികളുടെ സംസ്ഥാനങ്ങൾ വെറുതേ ഇരിക്കുമെന്ന് കരുതേണ്ട. 10 സംസ്ഥാനങ്ങളിൽ നിന്നുള്ള പ്രതികളെയാണ് അറസ്റ്റ് ചെയ്തത്. അറസ്റ്റിലായവർക്ക് കിറ്റക്സ് നിയമ സഹായം നൽകുമെന്ന് സാബു പറഞ്ഞു.
