വൻതോതിലുള്ള ലഹരി ഉപയോഗങ്ങൾക്ക് സാധ്യതയുണ്ടെന്ന ഇൻ്റലിജൻസ് മുന്നറിയിപ്പിൻ്റെ പശ്ചാത്തലത്തിലാണ് പുതുവത്സരാഘോഷങ്ങളുടെ ഭാഗമായി സംഘടിപ്പിക്കുന്ന ഡി.ജെ പാർട്ടികൾക്ക് നിയന്ത്രണം ഏർപ്പെടുത്താൻ പോലീസ് തീരുമാനിച്ചത്. ഡിജെ പാർട്ടികളിൽ പങ്കെടുക്കുന്നവരുടെ വിവരങ്ങൾ പോലീസിന് കൈമാറണം. പത്ത് മണിക്ക് ശേഷവും ഡി.ജെ പാർട്ടികൾ തുടരുന്ന സാഹചര്യമുണ്ടായാൽ പോലീസ് ഇടപെടൽ ഉണ്ടാകും. ഡിജെ പാർട്ടി നടക്കുന്ന ഹോട്ടലുകൾ, മാളുകൾ, റസ്റ്റോറൻ്റുകൾ എന്നിവങ്ങളിലെല്ലാം പരിശോധന നടത്തും. ഡി.ജെ പാർട്ടികളിൽ ലഹരിമരുന്ന് ഉപയോഗം നടക്കുന്നില്ലെന്ന് ഹോട്ടൽ ഉടമകൾ ഉറപ്പുവരുത്തണം.
പുതുവത്സരാഘോഷങ്ങളുടെ ഭാഗമായി പാർട്ടികൾ നടക്കുന്ന ഹോട്ടലുകൾ സ്പെഷ്യൽ ബ്രാഞ്ച് നിരീക്ഷിക്കും. ഡി.ജെ പാർട്ടികൾ നടത്താൻ സജ്ജമാക്കുന്ന ഹോട്ടലുകളിൽ സിസിടിവി കർശനമായി സ്ഥാപിക്കണം. ഇതുവഴി ലഭ്യമാകുന്ന ദൃശ്യങ്ങൾ സൂക്ഷിച്ച് വെക്കണം. ഇക്കാര്യങ്ങൾ വ്യക്തമാക്കിക്കൊണ്ട് ഡി.ജെ പാർട്ടികൾ സംഘടിപ്പിക്കുന്ന ഹോട്ടലുകൾക്ക് നോട്ടീസ് നൽകും.
സംസ്ഥാനത്ത് ലഹരിമരുന്ന് ഉപയോഗം വ്യാപകമായ പശ്ചാത്തലത്തിലാണ് പുതുവത്സരാഘോഷങ്ങളുടെ ഭാഗമായി നടത്തുന്ന ഡി.ജെ പാർട്ടികൾക്ക് നിയന്ത്രണം ഏർപ്പെടുത്താൻ പോലീസ് തീരുമാനിച്ചത്. സംസ്ഥാനത്തെ പല ഹോട്ടലുകളിൽ ലഹരിമരുന്ന് ഉപയോഗം നടക്കുന്നുണ്ടെന്ന കണ്ടെത്തലും ഈ തീരുമാനത്തിന് കാരണമായി.
കൊച്ചിയിലെ മോഡലുകളുടെ അപകട മരണത്തിൽ പിന്നാലെ നടന്ന അന്വേഷണത്തിൽ ലഹരിമരുന്ന് ഉപയോഗവുമായി ബന്ധപ്പെട്ട കണ്ടെത്തലുകൾ പോലീസ് പുറത്തുകൊണ്ടുവന്നിരുന്നു. ലക്ഷ്യമാക്കി വിൽപ്പനയ്ക്കായി എത്തിച്ച രണ്ടക്കിലോ എം ഡി എം എ ആലുവയിൽ നിന്നും പിടികൂടി. ആലുവ റെയിൽവേ സ്റ്റേഷന് മുന്നിൽ നിന്നാണ് എംഡിഎംഎ പിടികൂടിയത്. തിരുവനന്തപുരം പൂവാറിലെ റിസോർട്ടിൽ നടന്ന ഡി.ജെ പാർട്ടിക്കിടെ ലഹരിമരുന്ന് ശേഖരം പിടിച്ചെടുത്തിരുന്നു. അതിർത്തികൾ വഴിയുള്ള ലഹരി മരുന്നിൻ്റെ ഒഴുക്ക് തടയാൻ കേരള – തമിഴ്നാട് സംസ്ഥാനങ്ങൾ സംയുക്ത പരിശോധന നടത്തുകയാണ്. ഇടുക്കി ജില്ലയുടെ അതിർത്തി ചെക്ക് പോസ്റ്റുകളായ കുമളി, കമ്പംമേട്ട്, ചിന്നാർ ചെക്ക് പോസ്റ്റുകളിലാണ് കർശന പരിശോധന നടക്കുന്നത്.
