തിരുവനന്തപുരം: ഡ്യൂട്ടിക്കായി വീട്ടിൽ നിന്നും പുലർച്ചെ സുഹൃത്തിന്റെ ബൈക്കിൽ പോകുകയായിരുന്ന പോലീസുദ്യോഗസ്ഥൻ കാറിടിച്ച് മരിച്ചു. നരുവാമൂട് ഇളമാനൂർക്കോണം അർച്ചനയിൽ എസ്.സുരേഷ്കുമാർ (51) ആണ് മരിച്ചത്. ശബരിമല ഡ്യൂട്ടിക്കായി സഹപ്രവർത്തകർക്കൊപ്പം ചേരാനായി പുറപ്പെട്ടതായിരുന്നു ഇദ്ദേഹം. മറ്റൊരു സ്റ്റേഷനിലേക്ക് ഡ്യൂട്ടിക്ക് പുറപ്പെട്ട പോലീസുകാരനും ബന്ധുവും സഞ്ചരിച്ച കാർ സുരേഷ് കുമാറും സുഹൃത്ത് ജയകുമാറും സഞ്ചരിച്ച ബൈക്കിന് പുറകിലിടിക്കുകയായിരുന്നു.
ബൈക്ക് ഓടിച്ചിരുന്ന ജയകുമാറിന് പരിക്കുണ്ട്. കാർ ഓടിച്ചിരുന്ന രഞ്ജിത്തിനെ കരമന പോലീസ് അറസ്റ്റ് ചെയ്ത് ജാമ്യത്തിൽ വിട്ടു. ഇയാൾ കാറിലുണ്ടായിരുന്ന പോലീസുകാരന്റെ ബന്ധുവാണ്.ശനിയാഴ്ച പുലർച്ചെ നാലരയോടെ കരമന-കളിയിക്കാവിള പാതയിൽ കൈമനം ബി.എസ്.എൻ.എൽ. ഓഫീസിന് സമീപമായിരുന്നു അപകടം. പട്ടം സ്റ്റേറ്റ് സ്പെഷ്യൽ ബ്രാഞ്ച് ഹെഡ്ക്വാർട്ടേഴ്സിലെ ഗ്രേഡ് എസ്.ഐ. സുരേഷ്കുമാർ അയൽവാസിയും സുഹൃത്തുമായ ജയകുമാറിന്റെ ബൈക്കിൽ ഓഫീസിലേക്ക് പോകുകയായിരുന്നു.
ബൈക്കിന് പുറകിൽ ഇടിച്ച കാർ നിയന്ത്രണം വിട്ട് നടപ്പാതയിലെ കൈവരിയിലിടിച്ചുനിന്നു. കട്ടപ്പന പോലീസ് സ്റ്റേഷനിലെ പോലീസുകാരനായ പൂവാർ സ്വദേശി സഞ്ചരിച്ചിരുന്നതാണ് കാർ. കട്ടപ്പനയിലേക്ക് പോകാനായി റെയിൽവേ സ്റ്റേഷനിലേക്ക് ബന്ധുവിന്റെ കാറിൽ പുറപ്പെട്ടതായിരുന്നു പോലീസുകാരൻ. പള്ളിച്ചൽ ഫാർമേഴ്സ് സഹകരണ ബാങ്കിലെ ജീവനക്കാരിയായ സിമി സുരേഷാണ് മരിച്ച സുരേഷ്കുമാറിന്റെ ഭാര്യ. മക്കൾ : അർച്ചന സുരേഷ്, അഭിനവ് സുരേഷ്. മരുമകൻ: അരവിന്ദ് എസ്. ദിലീപ്. സഞ്ചയനം വെള്ളിയാഴ്ച രാവിലെ 8ന്.
Content Highlights: policeman died in accident as bike hit by another policeman`s car
