മെൽബൺ
ആഷസിൽ ഇംഗ്ലണ്ട് വീണ്ടും പിടയുന്നു. ആദ്യ രണ്ട് ടെസ്റ്റുകളിലെ തോൽവി മായ്ക്കാൻ മെൽബണിൽ എത്തിയ ജോ റൂട്ടും കൂട്ടരും പിന്നെയും കളിമറന്നു. ഓസ്ട്രേലിയയോട് ടോസ് നഷ്ടപ്പെട്ട് ബാറ്റിങ്ങിനിറങ്ങി ഒന്നാംഇന്നിങ്സിൽ 185 റണ്ണിന് കൂടാരം കയറി. 65.1 ഓവറിൽ പുറത്തായി. ആദ്യദിനം മറുപടിയിൽ ഓസീസ് 1–-61 എന്നനിലയിലാണ്. ഓസ്ട്രേലിയക്കായി പന്തെടുത്തവരെല്ലാം തിളങ്ങി. ക്യാപ്റ്റൻ പാറ്റ് കമ്മിൻസും നതാൻ ല്യോണും മൂന്നുവീതം വിക്കറ്റുകൾ നേടി.
റൂട്ടാണ് (50) ഇംഗ്ലണ്ടിന്റെ ഉയർന്ന സ്കോറർ. മറ്റാർക്കും പിടിച്ചുനിൽക്കാനായില്ല. ഓസീസിനായി പേസർ സ്കോട് ബൊളണ്ട് അരങ്ങേറി. മാർക്സ് ഹാരിസും (20) റണ്ണൊന്നുമെടുക്കാതെ ല്യോണുമാണ് ക്രീസിൽ. ഡേവിഡ് വാർണറെയാണ് (38) അവർക്ക് നഷ്ടമായത്.
