പിണറായി
കേരളത്തിൽ കമ്യൂണിസ്റ്റ് പാർടിയുടെ പരസ്യപ്രവർത്തനം വിളംബരംചെയ്ത പിണറായി പാറപ്രം സമ്മേളനത്തിന്റെ 82–ാം വാർഷികാഘോഷ പരിപാടികൾക്ക് സമാപനം. സമാപന സമ്മേളനം പാറപ്രത്ത് സിപിഐ എം പൊളിറ്റ്ബ്യൂറോ അംഗവും മുഖ്യമന്ത്രിയുമായ പിണറായി വിജയൻ ഉദ്ഘാടനംചെയ്തു. കെ കെ രാജീവൻ അധ്യക്ഷനായി. ജില്ലാ സെക്രട്ടറി എം വി ജയരാജൻ, സംസ്ഥാന കമ്മിറ്റി അംഗം പി ജയരാജൻ, ജില്ലാ കമ്മിറ്റി അംഗങ്ങളായ കെ മനോഹരൻ, കെ ശശിധരൻ, ടി ഷബ്ന, മുഖ്യമന്ത്രിയുടെ മണ്ഡലം പ്രതിനിധി പി ബാലൻ, ടി അനിൽ, കെ കെ രാജീവൻ, വി ലീല, കെ കെ രാഘവൻ എന്നിവർ സംസാരിച്ചു.
പിണറായി ആർ സി അമല സ്കൂളിൽനിന്ന് ആരംഭിച്ച ബഹുജന പ്രകടനത്തിൽ 82–-ാം വാർഷികത്തെ ഓർമിപ്പിച്ച് 82 വനിതകൾ കേരളീയവസ്ത്രത്തിൽ പാർടി പതാകയേന്തി അണിനിരന്നു. കമാനവും പ്രചാരണ ബോർഡുകളും കൊടിതോരണങ്ങളുമായി പിണറായി അമ്പലഭാഗം മുതൽ പാറപ്രത്തെ സമ്മേളനനഗരിവരെ റോഡിനിരുവശവും ചുവപ്പണിഞ്ഞു. ജങ്ഷനുകൾ കേന്ദ്രീകരിച്ച് സ്തൂപങ്ങളും പാർടി ബ്രാഞ്ചുകളുടെ നേതൃത്വത്തിൽ മത്സരാടിസ്ഥാനത്തിൽ ചെമ്പതാകയും ചുവന്ന തോരണങ്ങളും വൈദ്യുത ദീപാലങ്കാരങ്ങളും കുരുത്തോലയും നിറഞ്ഞു. സമാപന സമ്മേളനത്തിനുശേഷം പ്രാദേശിക കലാകാരന്മാരുടെ പരിപാടികളും അരങ്ങേറി. വാർഷികാഘോഷത്തിന്റെ ഭാഗമായി വിവിധ കേന്ദ്രങ്ങളിൽ കുടുംബസംഗമങ്ങൾ സംഘടിപ്പിച്ചിരുന്നു.
