പേര് വെളിപ്പെടുത്തിയിട്ടില്ലാത്ത ഈ യുവാവ് 2015-ലാണ് രാത്രി ഷിഫ്റ്റിൽ ഡാറ്റ എൻട്രി ജോലിയ്ക്ക് കയറിയത്. ഓരോ ഓർഡറിന്റെ വിശദാംശങ്ങൾ അടങ്ങുന്ന ഒരു ഇമെയിൽ യുവാവിന് ലഭിക്കും. ഈ വിവരങ്ങൾ കമ്പനിയുടെ സിസ്റ്റത്തിലേക്ക് ചേർക്കുക എന്ന കംപ്യൂട്ടറിന് മുന്നിലിരിക്കുന്ന ജോലിയാണ് യുവാവിന് ചെയ്യേണ്ടിയിരുന്നത്.
പരിശീലനത്തിനുശേഷം തന്റെ ജോലി ചെയ്ത് തീർക്കാൻ ഒരു കോഡ് തയ്യാറാക്കിയാൽ മതി എന്ന് യുവാവിന് മനസ്സിലായി. കോഡിങ് അറിയാത്തതിനാൽ കോഡ് വികസിപ്പിക്കാൻ ഒരു ഫ്രീലാൻസറെ യുവാവ് ചുമതലപ്പെടുത്തി. ഇയാൾക്ക് രണ്ടാമത്തെ ശമ്പളം നൽകിയാണ് യുവാവ് തരപ്പെടുത്തിയത്. ദിവസങ്ങൾക്കുള്ളിൽ കോഡ് റെഡി. യുവാവിന് ലഭിക്കുന്ന മെയിലിലെ വിവരങ്ങൾ നിമിഷങ്ങൾക്കൊണ്ട് കോഡിങ് വഴി സിസ്റ്റത്തിൽ തനിയെ രേഖപ്പെടുത്തും. യുവാവിന് വെറുതെ ഇരുന്നാൽ മതി.
“ആദ്യ ദിവസം മുതൽ ഞാൻ വീട്ടിൽ നിന്ന് ജോലി ചെയ്യുകയായിരുന്നു. നെറ്റ് ഷിഫ്റ്റായതുകൊണ്ട് യാത്രയ്ക്കായി പണം മുടക്കാൻ കമ്പനി തയ്യാറായിരുന്നില്ല. ഇതാണ് വർക്ക് ഫ്രം ഹോം നൽകാൻ കാരണമായത്”, യുവാവ് ലാഡ്‌ബൈബിളിനോട് പറഞ്ഞു. “ആദ്യത്തെ 2 വർഷത്തേക്ക്, കോഡിന് ചെയ്യാൻ കഴിയാത്ത എന്തെങ്കിലും ഉണ്ടോ എന്ന് ഞാൻ ഇടയ്ക്കിടെ പരിശോധിക്കും. അതിന്‌ വെറും 5 മിനിറ്റ് മതി എനിക്ക്. ബാക്കിയുള്ള സമയം ഞാൻ സിനിമകൾ കാണാനും ഉറങ്ങാനും ഉപയോഗിക്കും” യുവാവ് വ്യക്തമാക്കി.
കഴിഞ്ഞ അഞ്ച് വർഷമായി ഇങ്ങനെ വെറുതെ ഇരുന്നു ശമ്പളം വാങ്ങുകയാണ് യുവാവ്. അതിനിടെ മികച്ച രീതിയിൽ തെറ്റില്ലാതെ ജോലി ചെയ്യുന്നതിന് പ്രമോഷനും ശമ്പള വർദ്ധനവും യുവാവിന് ലഭിച്ചു എന്നതാണ് രസകരമായ കാര്യം. ലീവെടുക്കാത്തതിന് രണ്ടുതവണ ശമ്പളം കൂട്ടിയിട്ടുമുണ്ട്. മികച്ച ജോലി ഓഫറുകൾ പുറമെ നിന്നും ലഭിച്ചെങ്കിലും അവിടെ ചെന്നാൽ ‘ജോലി ചെയ്യേണ്ടി വരും’ എന്നുള്ളതുകൊണ്ട് ഈ ജോലിയിൽ തന്നെ യുവാവ് തുടർന്നു.
അടുത്തിടെയാണ് ഡാറ്റ എൻട്രി ജോലിക്കായി ഓട്ടോമേറ്റഡ് സോഫ്ട്‍വെയർ സംവിധാനം യുവാവ് ജോലി ചെയ്തിരുന്ന കമ്പനി ഏർപ്പെടുത്തിയത്. ഇതോടെ യുവാവിന്റെ ജോലി പോയി. ഇതേ തുടർന്നാണ് എങ്ങനാണ് താൻ വെറുതെ ഇരുന്നു ശമ്പളം വാങ്ങിയത് എന്ന രഹസ്യം യുവാവ് റെഡ്‌ഡിറ്റിൽ വെളിപ്പെടുത്തിയത്.
