അച്ഛനെ വിളിച്ച് വാവിട്ട് കരഞ്ഞ് മക്കൾ; രഞ്ജിത്തിന്‍റെ മൃതദേഹം വീട്ടിലെത്തിച്ചു

ആലപ്പുഴ: ആലപ്പുഴയിൽ കൊല്ലപ്പെട്ട പ്രവർത്തകൻ രഞ്ജിത്തിന്‍റെ മൃതദേഹം വീട്ടിലെത്തിച്ചു. രഞ്ജിത്തിന്‍റെ അമ്മയും ഭാര്യയും മക്കളും ഉൾപ്പെടുന്ന കുടുംബത്തിന്‍റെ നിലവിളി കണ്ടു നിൽക്കാൻ കഴിയാതെ നാട്ടുകാരൊന്നാകെ വിതുമ്പുന്ന കാഴ്ചയ്ക്കാണ് നാട് സാക്ഷ്യം വഹിച്ചത്.

അമ്മയുടെയും ഭാര്യയുടെയും മകളുടെയും കൺമുന്നിലിട്ടായിരുന്നു രഞ്ജിത്തിനെ വെട്ടിക്കൊന്നത്. ഞായറാഴ്ച രാവിലെ 6.30നായിരുന്നു കൃത്യം നടന്നത്. ഒൻപതാം ക്ലാസിൽ പഠിക്കുന്ന മൂത്തമകൾ ഭാഗ്യ ട്യൂഷൻ ക്ലാസിലേയ്ക്ക് പോയതിന് പിന്നാലെയായിരുന്നു കൃത്യം. രഞ്ജിത്തിന്‍റെ അമ്മ അമ്പലത്തിലേക്കും പോയിരുന്നതിനാൽ വീടിന്‍റെ വാതിൽ അടച്ചിരുന്നില്ല. അച്ഛന്‍റെ മരണ വാർത്ത അറിഞ്ഞതിന് പിന്നാലെ ഭാഗ്യയെകെട്ടിപ്പിടിച്ചുള്ള സഹോദരി ഹൃദ്യയുടെ കരച്ചിൽ കണ്ടുനിന്നവരെയും കണ്ണീരിലാഴ്ത്തിയിരുന്നു.

Also Read :
ഇന്ന് രാവിലെ 10.15 ഓടെയാണ് രഞ്ജിത്തിന്‍റെ പോസ്റ്റ്മോർട്ടം നടപടികൾ പൂർത്തിയായത്. തുടർന്ന് മൃതദേഹം വിലാപയാത്രയായി ആലപ്പുഴയിലെത്തിച്ചു. ആലപ്പുഴ ജില്ലാ കോടതിയ്ക്ക് മുന്നിൽ ബാർ അസോസിയേഷൻ ഹാളിൽ പൊതുദർശനത്തിന് ശേശമാണ് കുടുംബവീട്ടിലേക്ക് മൃതദേഹം കൊണ്ടുപോയത്. കേന്ദ്ര ആഭ്യന്തര സഹമന്ത്രി നിത്യാനന്ദ റായി രഞ്ജിത്ത് ശ്രീനിവാസന്‍റെ വീട്ടിലെത്തി കുടുംബാംഗങ്ങളെ കണ്ടു.

Also Read :

അതേസമയം ഇന്ന് മാറ്റിവെച്ച സർവകക്ഷിയോഗം നാളെ നടക്കും. ജില്ലാകളക്ടർ വിളിച്ച് ചേർത്ത യോഗത്തിൽ ബിജെപി നേതാക്കളും പങ്കെടുക്കും. നേരത്തെ രഞ്ജിത്തിന്‍റെ മൃതദേഹത്തോട് അനാദരവ് കാണിച്ചെന്നാരോപിച്ച് ബിജെപി യോഗം ബഹിഷ്ക്കരിച്ചതിനാലായിരുന്നു ഇന്ന് വൈകിട്ട് നടക്കേണ്ടിയിരുന്ന യോഗം നാളത്തേക്ക് മാറ്റിയത്. രഞ്ജിത്തിന്‍റെ മൃതദേഹത്തോട് അനാദരവ് കാണിച്ചെന്നും പോസ്റ്റ്മോർട്ടം നടപടികൾ ഇന്നത്തേക്ക് മനപ്പൂർവം മാറ്റിയെന്നുമാണ് ബിജെപി ആരോപണം.