ഒരാളെപ്പോലും മകന് ഉപദ്രവിക്കാൻ കഴിയില്ലെന്നും എല്ലാവരോടും ദയയോടെ പെരുമാറുന്ന രീതിയാണ് ഷാനിനുള്ളതെന്നും സലീം പറഞ്ഞു. “ഞാനവനെ കഷ്ടപ്പെട്ട് വളർത്തിയതാ. എനിക്ക് എൻ്റെ മകനെ നഷ്ടപ്പെട്ടു. എന്നെപ്പോലെ കഷ്ടപ്പെട്ട് അച്ഛന്മാർ കുട്ടികളെ വളർത്തിക്കൊണ്ടുവന്ന്, അവർ ഒരു ആശയത്തിൽ വിശ്വസിക്കുമ്പോൾ അതിൻ്റെ പേരിൽ അവരെ കൊലപ്പെടുത്തുന്നത് വേദനാജനകമാണ്. ഇതുപോലെ ഇനിയും കൊലപാതകങ്ങൾ ഉണ്ടായാൽ ഇനിയും കുടുംബങ്ങളിൽ കുഞ്ഞുങ്ങൾ വഴിയാധാരമാകുന്ന സ്ഥിതിയുണ്ടാകും. രക്തം കുടിക്കുന്ന കാപാലികർക്ക് ആരുടെയെങ്കിലും രക്തം കുടിച്ചാൽ മതി. മറ്റുള്ളവരുടെ വേദന അവർക്കറിയേണ്ട. അങ്ങനെയൊരു സമൂഹം ഇവിടെ വളർന്നുവരുന്നുണ്ട്. അതിൻ്റെ ഫലമാണ് മകനെ നഷ്ടമായത്” – എന്നും സലീം വ്യക്തമാക്കി.
ഷാനിൻ്റെ മരണത്തോടെ രണ്ട് കുഞ്ഞുങ്ങളാണ് വഴിയാധാരമായത്. വാർധക്യത്തിലെത്തിയ എനിക്ക് എത്രനാൾ ഈ ചെറിയ മക്കളെ സഹായിക്കും വളർത്തുവാനും കഴിയുമെന്നും അദ്ദേഹം ചോദിച്ചു. ഈ ക്രൂരത കാണിക്കുവാൻ അവർക്കുണ്ടായ മനസ് പോലും എന്തിനാണെന്ന് മനസിലാകാത്ത അവസ്ഥയിലാണ് ഞാനും കുടുംബവുമുള്ളതെന്ന് സലീം കൂട്ടിച്ചേർത്തു.
എൽഎൽബി ബിരുദധാരിയായ ഷാൻ ആലപ്പുഴയിലെ പൊന്നാടാണ് താമസം. കർട്ടൻ തുന്നുന്ന ഒരു കട നടത്തിയാണ് കുടുംബം പുലർത്തിയിരുന്നത്. ഭാര്യയും രണ്ട് കുട്ടികളുമാണ് വീട്ടിലുള്ളത്.
12 മണിക്കൂറിനിടെ ആലപ്പുഴ ജില്ലയിൽ രണ്ട് രാഷ്ട്രീയ കൊലപാതകങ്ങളാണ് നടന്നത്. എസ്ഡിപിഐ സംസ്ഥാന സെക്രട്ടറി കെ എസ് ഷാനും ഒബിസി മോർച്ച സംസ്ഥാന സെക്രട്ടറി രഞ്ജിത് ശ്രീനിവാസനുമാണ് കൊല്ലപ്പെട്ടത്. സംഭവത്തിൽ ഇരുവിഭാഗങ്ങളിലുമായി അമ്പതോളം പേർ കസ്റ്റഡിയിലായി. എസ്ഡിപിഐ സംസ്ഥാന സെക്രട്ടറിയുടെ കൊലയ്ക്ക് പിന്നാലെയാണ് ഒബിസി മോര്‍ച്ച സംസ്ഥാന സെക്രട്ടറി രഞ്ജിത് ശ്രീനിവാസൻ കൊല്ലപ്പെട്ടത്. ആലപ്പുഴ വെള്ളക്കിണറിലെ വീട്ടിൽ വെച്ചാണ് കൊലപാതകം. പുലർച്ചെ പ്രഭാത സവാരിക്ക് തയ്യാറെടുക്കുന്നതിനിടെ അക്രമി സംഘം വീട്ടിൽ കയറി രഞ്ജിത്തിനെ ആക്രമിക്കുകയായിരുന്നു. ആലപ്പുഴ നിയോജകമണ്ഡലത്തിലേക്ക് മത്സരിച്ച നേതാവാണ് കൊല്ലപ്പെട്ട രഞ്ജിത് ശ്രീനിവാസന്‍.
