പോസ്റ്റ്മോർട്ടം നടപടികൾ പൂർത്തിയാക്കിയ ശേഷം രഞ്ജിത്തിന്റെ മൃതദേഹം വണ്ടാനം മെഡിക്കൽ കോളേജിൽ നിന്നും ആലപ്പുഴയിലേക്ക് കൊണ്ടുപോകും. ആലപ്പുഴയിലെ ബാർ അസോസിയേഷൻ ഹാളിലും വെള്ളക്കിണറിലെ വീട്ടിലും പൊതുദർശനത്തിനു വെക്കും. വലിയ അഴീക്കലിലെ വീട്ടിലാണ് മൃതദേഹം സംസ്കരിക്കുക. തിങ്കളാഴ്ചയായിരിക്കും രഞ്ജിത്തിന്റെ മൃതദേഹം പോസ്റ്റ്മോർട്ടം ചെയ്യുക.
എസ്ഡിപിഐ സംസ്ഥാന സെക്രട്ടറി കെ എസ് ഷാനിന്റെ കൊലപാതകത്തിനു പിന്നാലെയാണ് ഒബിസി മോർച്ച നേതാവ് കൊല്ലപ്പെട്ടത്. ശനിയാഴ്ച രാത്രി ഏഴോടെയാണ് ഷാനിന് വെട്ടേറ്റത്. ആശുപത്രിയിൽ എത്തിച്ചെങ്കിലും മരണപ്പെട്ടു. സ്കൂട്ടറിൽ സഞ്ചരിക്കുകയായിരുന്ന ഷാനിനെ കാറിടിച്ച് വീഴ്ത്തിയ ശേഷം വെട്ടുകയായിരുന്നു. നാൽപ്പത് വെട്ടുകളാണ് ഷാനിന്റെ ശരീരത്തിലേറ്റത്. ആക്രമികളെത്തിയ വാഹനത്തിന്റെ ദൃശ്യങ്ങൾ പോലീസിന് ലഭിച്ചു. കാർ കേന്ദ്രീകരിച്ച് നടത്തിയ അന്വേഷണത്തിൽ നമ്പർ വ്യാജമാണെന്ന് കണ്ടെത്തിയിട്ടുണ്ട്.
ഞായറാഴ്ച പുലർച്ചെ അഞ്ച് മണിയോടെയാണ് ഒബിസി മോർച്ച നേതാവിന് വെട്ടേറ്റത്. ആറ് ബൈക്കുകളിലെത്തിയ 12 പേരാണ് കൊലപാതകത്തിനു പിന്നിലെന്നാണ് പോലീസ് കരുതുന്നത്. പുലർച്ചെ വീട്ടിലെത്തിയ പ്രതികൾ വാതിലിൽ മുട്ടുകയും വാതിൽ തുറന്നയുടൻ വീട്ടിൽ കയറി കൊലപാതകം നടത്തുകയുമായിരുന്നു. അമ്മയുടേയും ഭാര്യയുടേയും മുന്നിൽ വെച്ചാണ് അക്രമികൾ കൃത്യം നടത്തിയത്.
ഷാനിന്റെ കൊലയ്ക്കു പിന്നിൽ ബിജെപി-ആർഎസ്എസ് ആണെന്നും രഞ്ജിത്തിനെ കൊലപ്പെടുത്തിയത് എസ്ഡിപിഐ ആണെന്നും ഇരു പാർട്ടികളും ആരോപിച്ചു.
