കോൺഗ്രസ് കുടിയൊഴിപ്പിക്കപ്പെടുന്ന ജനങ്ങൾക്കൊപ്പമാണെങ്കിൽ തരൂരിനോട് വിശദീകരണം ചോദിക്കാതെ നിലപാട് തിരുത്തിക്കുകയാണ് വേണ്ടത്. നിലപാട് തിരുത്തിയില്ലെങ്കിൽ എന്ത് ചെയ്യാൻ പറ്റുമെന്ന് ജനങ്ങളോട് പറയണമെന്നും മുരളീധരൻ പറഞ്ഞു.
സിൽവർ ലൈൻ പദ്ധതിയുടെ കാര്യത്തിൽ തരൂർ പിണറായി വിജയനെ പ്രശംസിക്കുന്നു. പിണറായി വിജയൻ തരൂരിനെ പ്രശംസിക്കുന്നു. പരസ്പരം പുകഴ്ത്തുകയാണെന്നും മുരളീധരൻ പറഞ്ഞു.
ചില വിഷയങ്ങളിൽ രാഷ്ട്രീയ വ്യത്യാസം മാറ്റിവെച്ച് വളർച്ചയ്ക്കായി മുന്നേറണ്ടതുണ്ടെന്നാണ് തരൂർ പറഞ്ഞത്. മുഖ്യമന്ത്രി പിണറായി വിജയനൊപ്പമുള്ള ചിത്രങ്ങൾ പങ്കിട്ടുകൊണ്ടായിരുന്നു അദ്ദേഹത്തിന്റെ പ്രതികരണം.
അതേസമയം വിഷയത്തിൽ തരൂരിന് താക്കീതുമായി കെപിസിസി പ്രസിഡന്റ് കെ സുധാകരൻ രംഗത്തെത്തി. പാർട്ടിക്ക് അകത്തുള്ളവരാണെങ്കിൽ ആത്യന്തികമായി പാർട്ടിക്ക് വിധേയപ്പെടേണ്ടി വരുമെന്ന് അദ്ദേഹം പറഞ്ഞു.. ഇതാണ് തങ്ങൾ തരൂരിനോടുള്ള അഭ്യർത്ഥനയെന്ന് അദ്ദേഹം വ്യക്തമാക്കി.
വ്യത്യസ്ത കാഴ്ചപ്പാടുള്ളവർ കോൺഗ്രസിൽ ധാരാളമുണ്ട്. ഇതൊക്കെ ജനാധിപത്യ പാർട്ടിയിൽ സ്വാഭാവികമാണ്. എന്നാൽ ആത്യന്തികമായി എല്ലാവരും പാർട്ടിക്ക് വിധേയപ്പെട്ടവരായിരിക്കണം. കെ റെയിലുമായി ബന്ധപ്പെട്ട വിഷയങ്ങളിൽ തരൂരിനോട് വിശദീകരണം തേടിയിട്ടുണ്ടെന്നും നേരിൽ കാണണമെന്ന് ആവശ്യപ്പെട്ടിട്ടുണ്ടെന്നും സുധാകരൻ വ്യക്തമാക്കി.
കേവലം കോൺഗ്രസിന്റെ ചട്ടക്കൂടിൽ ഒതുങ്ങാത്ത ആളാണ് തരൂർ. അദ്ദേഹത്തിന് അദ്ദേഹത്തിന്റേതായ കാഴ്ചപ്പാടുകളുണ്ട്. എന്നാൽ ഒരു പാർട്ടി പ്രവർത്തകൻ പാർട്ടി നയങ്ങളോടൊപ്പം ഒതുങ്ങി നിൽക്കാനും തീരുമാനങ്ങളെ പിന്താങ്ങാനും തയ്യാറാകണം. തരൂർ ലോകം കണ്ട നേതാവാണ്, എന്നാൽ ഇരിക്കുന്നിടം കുഴിക്കാൻ അദ്ദേഹത്തെ അനുവദിക്കില്ലെന്ന് സുധാകരൻ പറഞ്ഞു.
