തിരുവനന്തപുരം> പാര്ട്ടിക്ക് അകത്തുള്ളവരാണെങ്കില് ആത്യന്തികമായി പാര്ട്ടിക്ക് വിധേയരാകേണ്ടി വരുമെന്നും ശശി തരൂരിനോട് തങ്ങള്ക്കുള്ള അഭ്യര്ഥന അതാണെന്നും കെപിസിസി പ്രസിഡന്റ് കെ സുധാകരന്. തിരുവനന്തപുരത്ത് മാധ്യമങ്ങളെ കാണുകയായിരുന്നു അദ്ദേഹം.
പാര്ട്ടി നയത്തോടൊപ്പം ഒതുങ്ങി നില്ക്കാനും പാര്ട്ടിയുടെ തീരുമാനത്തിനൊപ്പം നില്ക്കാനും സാധിക്കണം. കോണ്ഗ്രസിന്റെ വൃത്തത്തില് ഒതുങ്ങാത്ത ലോകം കണ്ട മനുഷ്യനാണ് തരൂര്. അദ്ദേഹത്തിന് അദ്ദേഹത്തിന്റേതായ കാഴ്ചപാടുകള് പ്രകടിപ്പിക്കുന്നതിലും പറയുന്നതിലും തെറ്റില്ലെന്നും സുധാകരന് വ്യക്തമാക്കി.
ശശി തരൂരിന്റെ പ്രതികരണം ലഭിച്ച ശേഷമേ കൂടുതല് പ്രതികരിക്കൂ. കെ റെയില് വിഷയത്തില് ആഴത്തില് പഠിച്ചാണ് നിലപാട് എടുത്തത്. ആ തീരുമാനത്തില് പിഴവില്ല എന്നതാണ് പാര്ട്ടിയും മുന്നണിയും വിശ്വസിക്കുന്നത്. അതിനെ മറികടക്കാനുള്ള വാദം ശശി തരൂരിനുണ്ടോ ഇല്ലയോ എന്നത് നമുക്ക് നോക്കാം. അങ്ങനെ ഉണ്ടെങ്കില് തെറ്റ് തിരുത്തുന്നതിന് പ്രശ്നമില്ലല്ലോയെന്നും സുധാകരന് ചോദിച്ചു.
തരൂര് ലോകം കണ്ട നേതാവാണ് എന്നതൊക്കെ ശരിവെക്കുമ്പോള് തന്നെ ഇരിക്കുന്നിടം കുഴിക്കുന്നത് അനുവദിക്കില്ലെന്നും അദ്ദേഹം കൂട്ടിച്ചേര്ത്തു.
