മൂന്നാറിലെ ദരിദ്രരായ തോട്ടം തൊഴിലാളികളുടെ സങ്കടങ്ങൾ ഇല്ലാതാക്കാൻ സമരം ചെയ്താണ് ഗോമതി അഗസ്റ്റിൻ പൊതുരംഗത്ത് സജീവമാവുന്നത്. തൊഴിലാളികൾക്ക് മനുഷ്യരെ പോലെ ജീവിക്കാൻ വേണ്ട അവകാശങ്ങൾക്കായി പൊമ്പിളൈ ഒരുമൈയുടെ നേതൃത്വത്തിൽ 2015ൽ നടന്ന ഐതിഹാസിക സമരം ഇന്ത്യ മുഴുവൻ ചർച്ച ചെയ്യപ്പെട്ടു. കരുത്തരായ തോട്ടം ഉടമകളെയും അവരുടെ താൽപര്യങ്ങൾ സംരക്ഷിക്കുന്ന രാഷ്ട്രീയ പാർട്ടികളെയും തൊഴിലാളി സംഘടനകളെയും നേരിട്ടാണ് ഗോമതിയും പൊമ്പിളൈ ഒരുമൈയും സമരം ചെയ്തത്.
പിന്നീട് 2021 മാർച്ചിൽ അവർ വെൽഫെയർ പാർട്ടിയിൽ ചേർന്നു. പക്ഷേ, ഒമ്പത് മാസമാവുമ്പോഴേക്കും അവർ പാർട്ടി വിട്ടു. ”വെൽഫെയർ പാർട്ടിയിൽ നിന്നും ഞാൻ രാജി വയ്ക്കുന്നു. എന്നെ പോലെ സമരങ്ങളിലൂടെ കടന്നു വന്ന ഒരു സ്ത്രീക്ക് പ്രവർത്തിക്കാൻ കഴിയുന്ന ഒരു പാർട്ടിയല്ല വെൽഫെയർ പാർട്ടി എന്ന് മനസ്സിലാക്കിയാണ് ഞാൻ രാജി വെക്കുന്നത്. ഒരുപാട് സങ്കടങ്ങൾ നിങ്ങളോട് പറയാനുണ്ട്….” –ഗോമതിയുടെ ഡിസംബർ 15ലെ ഫേസ്ബുക്ക് പോസ്റ്റ് പറയുന്നു.
ഗോമതിയുടെ സങ്കടങ്ങൾ
മൂന്നാർ സമരത്തിന് ശേഷം കേരളത്തിന്റെ വിവിധഭാഗങ്ങളിൽ നടക്കുന്ന സമരങ്ങളിൽ പങ്കെടുക്കുമ്പോൾ വെൽഫെയർ പാർട്ടിയുടെ സാന്നിധ്യം ശ്രദ്ധയിൽ പെട്ടിരുന്നതായി ഗോമതി
സമയം പ്ലസിനോട് പറഞ്ഞു. ”ഏതു സമരങ്ങളിൽ പങ്കെടുക്കുമ്പോളും അവിടെയെല്ലാം വെൽഫെയർ പാർട്ടിയുടെയും ബഹുജന സംഘടനകളുടെയും സാന്നിധ്യമുണ്ടായിരുന്നു. വെൽഫെയർ പാർട്ടി ഒരു സമര പാർട്ടിയാണെന്ന ധാരണയാണ് അതിൽ ചേരാൻ കാരണമായത്.”
സംസ്ഥാനത്ത് നടക്കുന്ന എല്ലാ ജനകീയ സമരങ്ങളിലും പങ്കെടുക്കണമെന്നും പുതിയ സമരങ്ങൾ കെട്ടിപ്പടുക്കണമെന്നുമാണ് പാർട്ടി ആദ്യം ഗോമതിയോട് ആവശ്യപ്പെട്ടിരുന്നത്. പക്ഷെ, മൂന്നാറിലെ തോട്ടം തൊഴിലാളികൾക്ക് ബോണസ് ലഭിക്കാത്തതിൽ പ്രതിഷേധിച്ച് നോട്ടീസ് തയ്യാറാക്കണമെന്ന ആവശ്യം പോലും തള്ളപ്പെടുകയാണുണ്ടായത്. ” 2015ലെ സമരത്തിൽ വാഗ്ദാനം ചെയ്ത ബോണസ് ഇപ്പോഴും തോട്ടം തൊഴിലാളികൾക്ക് ലഭിച്ചിട്ടില്ല. അതിൽ സമരം ചെയ്യണമെന്ന് ആവശ്യപ്പെട്ടെങ്കിലും നോട്ടീസ് പോലും തയ്യാറാക്കാൻ പാർട്ടി നേതൃത്വം തയ്യാറായില്ല. മൂന്നാറിൽ ഭൂസമരം നടത്താമെന്ന് വാഗ്ദാനം ചെയ്തിരുന്നെങ്കിലും അതിനെ കുറിച്ചും അവർ മൗനം പാലിച്ചു. മൂന്നാറിൽ സ്ത്രീകളും കുട്ടികളും എന്തെങ്കിലും പ്രശ്‌നങ്ങൾ നേരിട്ടാൽ സമരം ചെയ്യാതെ വീട് സന്ദർശിച്ച് റിപ്പോർട്ട് തയ്യാറാക്കി സംസ്ഥാന സമിതിക്ക് നൽകിയാൽ മതിയെന്നും അവർ നിർദേശിച്ചു.”–ഗോമതി പറയുന്നു.
ദീപയുടെ സമരവും ഗോമതിയുടെ നിരാഹാരസമരവും
മഹാത്മാഗാന്ധി സർവ്വകലാശാലക്കു കീഴിലെ ഇന്റർനാഷണൽ ആന്റ് ഇന്റർ യൂണിവേഴ്സിറ്റി സെന്റർ ഫോർ നാനോ സയൻസ് ആന്റ് നാനോ ടെക്നോളജിയിലെ ജാതി വിവേചനത്തിന് എതിരെ ദീപ പി മോഹനൻ നടത്തിയ സമരത്തിൽ പങ്കെടുത്തത് പാർട്ടിക്ക് വിയോജിപ്പുണ്ടാവാൻ കാരണമായെന്നാണ് ഗോമതി കരുതുന്നത്. ”ദീപ പി മോഹനന്റെ സമരത്തോട് ഐക്യദാർഡ്യം പ്രഖ്യാപിച്ച് ഞാനും നിരാഹാര സമരം നടത്തിയിരുന്നു. പൊമ്പിളൈ ഒരുമൈ നേതാവ് ഗോമതി സമരത്തിലാണെന്നാണ് സമരസമിതിയുടെ പോസ്റ്ററുകൾ പറഞ്ഞിരുന്നത്. വെൽഫെയർ പാർട്ടി നേതാവാണെന്ന് പോസ്റ്ററുകളിൽ ഉണ്ടായില്ല. അതിനാൽ, ആദ്യകാലത്ത് ദീപയുടെ സമരത്തിൽ സജീവമായിരുന്ന വെൽഫെയർപാർട്ടിക്കാർ പിന്നീട് സമരത്തെ തിരിഞ്ഞു നോക്കിയില്ല.”– ഗോമതി നിരീക്ഷിക്കുന്നു.
ദീപയുടെ സമരത്തിൽ പങ്കെടുത്തതിന് ശേഷം നേതാക്കൾ ഫോൺ വിളികൾ പോലും ഒഴിവാക്കി. നിരന്തരമായ അവഗണന മൂലം പാർട്ടിയുടെ വാട്ട്‌സാപ്പ് ഗ്രൂപ്പിൽ നിന്ന് പുറത്തുപോയി. അതിന് ശേഷം ഒരാൾ മാത്രമാണ് പാർട്ടിയിൽ നിന്ന് വിളിച്ചതത്രെ.
പാർട്ടിയുടെ നാല് നിർദേശങ്ങൾ
വെൽഫെയർ പാർട്ടിയിൽ പ്രവർത്തിക്കുന്നതിന് നാല് നിർദേശങ്ങളാണ് പാർട്ടി നൽകിയിരുന്നതെന്ന് ഗോമതി പറയുന്നു.
1) വെൽഫെയർ പാർട്ടിയുടെ സംസ്ഥാന വൈസ് പ്രസിഡന്റ് സ്ഥാനത്ത് നിന്ന് രാജിവെച്ച് പുറത്തുപോയ ശ്രീജ നെയ്യാറ്റിൻകരയുമായി സംസാരിക്കരുത്.
2) പാർട്ടിയിൽ ഗോമതി പടിപടിയായി വളരണം.
3) ആരൊക്കെ ഏതൊക്കെ സമരത്തിൽ പങ്കെടുക്കണം, എവിടെയൊക്കെ പോവണം എന്നു തീരുമാനിക്കുക പാർട്ടിയാണ്.
4) എന്തെങ്കിലും പ്രശ്‌നങ്ങൾ ശ്രദ്ധയിൽ പെട്ടാൽ പാർട്ടിക്ക് റിപ്പോർട്ട് നൽകി കാത്തിരിക്കണം.
സ്‌റ്റേജിലെ സ്ഥാനവും കണ്ണിറുക്കലും
വിമൻ ജസ്റ്റീസ് മൂവ്‌മെന്റ് തിരുവനന്തപുരത്ത് നടത്തിയ ഒരു സംഘടനാ പരിപാടിയിൽ അപമാനകരമായ അനുഭവം ഗോമതി നേരിട്ടു. ”ഞാൻ സ്‌റ്റേജിൽ കയറുന്ന സമയത്ത് സ്‌റ്റേജിൽ മറ്റാരുമുണ്ടായിരുന്നില്ല. സംസ്ഥാന പ്രസിഡന്റ് ജബീന ഇർഷാദ് ഓരോരുത്തരെ വിളിച്ചു കയറ്റുകയായിരുന്നു. ഞാൻ സ്‌റ്റേജിൽ കയറുന്ന സമയത്ത് എന്നോട് പുറകിൽ ഇരിക്കാൻ കണ്ണിറുക്കി നിർദേശം നൽകി. എന്താണ് സംഭവിക്കുന്നതെന്ന് മനസിലായില്ല. ആ വിവേചനത്തിൽ എനിക്ക് വലിയ സങ്കടമുണ്ടായി. പടിപടിയായി വളരണമെന്നും പിന്നീട് നിർദേശം വന്നു. സാരി ധരിക്കുന്നവരെ നേതാവായി ജനങ്ങൾ കാണാമെന്നതിനാൽ അടുത്ത ദിവസം ഞാൻ ചുരിദാർ ധരിച്ചാണ് പോയത്.”–ഗോമതി ഓർക്കുന്നു.
ഞാൻ ഇല്ലാതാവുമോ?
സമരം ചെയ്യലാണ് ജീവിതമെന്ന് കരുതുന്ന ഗോമതിക്ക് വെൽഫെയർ പാർട്ടിയിൽ നിന്നുള്ള രാജിയും അന്തസോടെ ജീവിക്കാനുള്ള സമരത്തിന്റെ ഭാഗമാണ്. ”ജനങ്ങളുടെ അവകാശങ്ങൾക്കായി സമരം ചെയ്യലാണ് എന്റെ ജീവിതത്തിന്റെ ലക്ഷ്യം. ഇപ്പോൾ എനിക്ക് 43 വയസുണ്ട്. പടിപടിയായി പാർട്ടിയിൽ വളരാൻ ആണ് അവർ പറയുന്നത്. വലിയ സമരങ്ങളിൽ പങ്കെടുത്ത ഞാൻ പടിപടിയായി വളരണമെന്നാണ് പാർട്ടി ആവശ്യപ്പെട്ടത്. വളരാൻ വേണ്ടിയല്ല പാർട്ടിയിൽ പ്രവർത്തിക്കുന്നത്. വെൽഫെയർ പാർട്ടിയിൽ ചേർന്ന ശേഷം എന്റെ അന്തസത്ത തന്നെ ഇല്ലാതാവുന്ന അവസ്ഥയാണ് രൂപപ്പെട്ടിരിക്കുന്നത്. യഥാർത്ഥ നിലപാട് ആദ്യമേ പറഞ്ഞിരുന്നെങ്കിൽ ഞാൻ ആ പാർട്ടിയിൽ ചേരില്ലായിരുന്നു. എന്റെ ജനങ്ങൾക്കൊപ്പം നിന്ന് സമരം ചെയ്യാനാണ് ഞാൻ ജീവിക്കുന്നത്. അത് നടന്നില്ലെങ്കിൽ പിന്നെ ഞാനില്ല.”– ഗോമതി നിലപാട് വ്യക്തമാക്കി.
ദീപയുടെ സമരത്തിന് ശേഷം പാലക്കാട് മുതലമടയിലും കൊച്ചിയിലും നടന്ന രണ്ടു സമരങ്ങളിലാണ് പങ്കെടുത്തത്. സമരസമിതിയുടെ ആവശ്യപ്രകാരമാണ് ആ സമരങ്ങളിൽ പങ്കെടുത്തത്.
ഭാവി പ്രവർത്തനങ്ങൾ
മൂന്നാറിലെയും വയനാട്ടിലെയും പീരുമേട്ടിലെയും അട്ടപ്പാടിയിലെയും അഗളിയിലെയും ആദിവാസി പ്രശ്‌നങ്ങളിൽ സജീവമായി ഇടപെടണമെന്നാണ് ഗോമതി ആഗ്രഹിക്കുന്നത്. വെൽഫെയർ പാർട്ടിയിൽ നിൽക്കുന്നത് അതിനെല്ലാം തടസമാണ്. വെൽഫെയർ പാർട്ടിയിൽ ചേർന്നപ്പോൾ തന്നെ വളരെ അടുപ്പമുള്ള, സ്വതന്ത്ര രാഷ്ട്രീയ നിലപാടുള്ള നിരവധി പേർ മുന്നറിയിപ്പ് നൽകി പിൻമാറിയിരുന്നു. ഇനി അവരെല്ലാം തിരിച്ചു വരുമെന്നാണ് പ്രതീക്ഷിക്കുന്നത്.
ഫേസ്ബുക്ക് പോസ്റ്റിന് ശേഷം
ഫേസ്ബുക്ക് പോസ്റ്റിട്ട ശേഷം ഒരു പാർട്ടി നേതാവ് വിളിച്ചു ഗോമതിയെ വിളിച്ചു സംസാരിച്ചിരുന്നു. പക്ഷെ, പോസ്റ്റിന് താഴെ നിരവധി പേർ ഗോമതിക്കെതിരെ ആരോപണങ്ങൾ ഉന്നയിക്കാൻ തുടങ്ങിയിട്ടുണ്ട്. സാമ്പത്തിക നേട്ടമില്ലാത്തതിനാൽ പാർട്ടി വിട്ടെന്നാണ് ചിലർ ആക്ഷേപിക്കുന്നത്. ”സാമ്പത്തിക നേട്ടമുണ്ടാക്കാൻ വെൽഫെയർ പാർട്ടിയിൽ പ്രവർത്തിക്കേണ്ട കാര്യമുണ്ടോ?.”– ഗോമതി ചോദിക്കുന്നു. ആരോപണങ്ങൾ ഉന്നയിക്കുന്നവർക്ക് മതിയായ മറുപടി നൽകാനും ഗോമതി തീരുമാനിച്ചിട്ടുണ്ട്.
സ്വതന്ത്ര അഭിപ്രായമുള്ളവർക്ക് നിൽക്കാനാവില്ല: ശ്രീജ നെയ്യാറ്റിൻകര
സ്വതന്ത്രരാഷ്ട്രീയ അഭിപ്രായമുള്ളവർക്ക് വെൽഫെയർ പാർട്ടിയിൽ നിൽക്കാനാവില്ലെന്ന് മുൻ സെക്രട്ടറിയും വൈസ് പ്രസിഡന്റുമായിരുന്ന ശ്രീജ നെയ്യാറ്റിൻകര സമയം പ്ലസിനോട് പറഞ്ഞു. ”പാലത്തായ് പോക്‌സോ കേസിൽ അഭിപ്രായം പറഞ്ഞതിനാണ് എന്നെ പാർട്ടി സസ്‌പെൻഡ് ചെയ്തത്. പാർട്ടിയുടെ വനിതാ വിഭാഗത്തിന് മുകളിൽ അഭിപ്രായങ്ങൾ ഉയരേണ്ട എന്ന് പറഞ്ഞാണ് അവർ വിശദീകരണം ചോദിച്ച് സസ്‌പെൻഡ് ചെയ്തത്. പത്ത് വർഷമായി പ്രവർത്തിക്കുന്ന പാർട്ടിയിൽ നിന്ന് അങ്ങനെയാണ് ഞാൻ രാജിവെച്ചത്.”– ശ്രീജ പറയുന്നു.
പൊമ്പിളൈ ഒരുമൈയുടെ മൂന്നാറിലെ സമരത്തിന് ശേഷം ഗോമതിയുമായി അടുത്തബന്ധമാണ് ശ്രീജക്കുള്ളത്. പക്ഷെ, ശ്രീജ വെൽഫെയർ പാർട്ടി വിട്ടതിന് ശേഷമാണ് ഗോമതി പാർട്ടിയിൽ എത്തിയത്. ”ദീപയുടെ സമരത്തിന് ശേഷം ഗോമതി തിരുവനന്തപുരത്ത് എത്തിയപ്പോൾ ഒരു സെൽഫി എടുത്ത് ഫേസ്ബുക്കിൽ പോസ്റ്റ് ചെയ്തിരുന്നു. ആ ഫോട്ടോയാവാം അവരുടെ ഒരു പ്രശ്‌നം. എന്റെ വാക്ക് കേട്ട് എന്തെങ്കിലും തീരുമാനം എടുക്കുന്നവരാണോ ഗോമതിയെ പോലുള്ളവർ ?”– ശ്രീജ ചോദിക്കുന്നു.
വെൽഫെയർ പാർട്ടിയിൽ നിന്ന് രാജിവെച്ച ശേഷം കടുത്ത സൈബർ അധിക്ഷേപമാണ് ശ്രീജ നേരിടേണ്ടി വന്നത്. ” പത്ത് വർഷം അടുത്തുനിന്നവരാണ് സൈബർ ആക്രമണം നടത്തിയത്. അവരുടെ മാന്യതയുടെ മുഖംമൂടി അഴിഞ്ഞുവീണ ആക്രമണമാണ് നടന്നത്. ഞാൻ അതിനെ ശക്തമായി പ്രതിരോധിച്ചു. മോശമായ ഓരോ പോസ്റ്റുകളും കമന്റുകളും സ്‌ക്രീൻഷോട്ട് എടുത്ത് പ്രസിദ്ധീകരിച്ചു. സൈബർ അധിക്ഷേപങ്ങളെ ഗോമതി അക്കയും പ്രതിരോധിക്കേണ്ടി വരും.”– ശ്രീജ വിശദീകരിച്ചു.
****
