‘ഗവർണർ ചാൻസലർ പദവിയിൽ വേണ്ട’; ഉമ്മൻ ചാണ്ടി കേന്ദ്രത്തിനയച്ച കത്ത് പുറത്ത്

തിരുവനന്തപുരം: ഗവർണർ സർവകലാശാല പദവി വഹിക്കേണ്ടതില്ലെന്ന് വ്യക്തമാക്കിക്കൊണ്ട് യുഡിഎഫ് സർക്കാർ കേന്ദ്രത്തിന് അയച്ച കത്ത് പുറത്ത്. 2015 ഓഗസ്റ്റ് 26 ന് സർക്കാരിന്റെ കാലത്ത് അന്നത്തെ ചീഫ് സെക്രട്ടറി ജിജി തോംസണാണ് കേന്ദ്രത്തിന് കത്ത് നൽകിയത്. മദൻ മോഹൻ പൂഞ്ചി കമ്മീഷന്റെ റിപ്പോർട്ട് ഉദ്ധരിച്ചാണ് കത്ത്.

2007 ലാണ് കേന്ദ്രം ജസ്റ്റിസ് എം എം പൂഞ്ചി കമ്മീഷനെ നിയോഗിച്ചത്. കേന്ദ്ര സംസ്ഥാന ബന്ധങ്ങളെക്കുറിച്ച് പഠിക്കുകയായിരുന്നു ലക്ഷ്യം. 2010-ൽ കമ്മീഷൻ റിപ്പോർട്ട് സമർപ്പിച്ചു. സർവ്വകലാശാല ചാൻസലർ പദവികളിൽ നിന്നും ഗവർണറെ ഒഴിവാക്കണമെന്നായിരുന്നു റിപ്പോർട്ടിലെ ഒരു ശുപാർശ. വിഷയത്തിൽ കേന്ദ്രം എല്ലാ സംസ്ഥാനങ്ങളോടും അഭിപ്രായം തേടി. ഇതിനുള്ള പ്രതികരണമായാണ് ഗവർണർ ചാൻസലർ പദവിയിൽ വേണ്ടെന്ന നിലപാട് ഉമ്മൻ ചാണ്ടി സർക്കാർ കേന്ദ്രത്തെ അറിയിച്ചത്.

ഭരണഘടനാപരമായ പദവിയുള്ള ഗവർണർക്ക് മറ്റ് അധികാരങ്ങൾ നൽകേണ്ടതില്ല. ചാൻസലർ പദവി ഗവർണർക്കു നൽകിയ തീരുമാനത്തിൽ കാലാനുസൃതമായി മാറ്റം വരുത്തണം തുടങ്ങിയ കാര്യങ്ങളാണ് കത്തിൽ പറയുന്നത്- റിപ്പോർട്ടർ ടിവി റിപ്പോർട്ട് ചെയ്തു.

അതേസമയം സർവകലാശാല ചാൻസലർ പദവി മുഖ്യമന്ത്രി ഏറ്റെടുക്കണമെന്ന് എസ്എഫ്ഐ ആവശ്യപ്പെട്ടു. ഗവർണർ ചാൻസലർ പദവി ഒഴിയുകയാണെങ്കിൽ ഒഴിയട്ടേയെന്ന് എസ്ഫ്ഐ അഖിലേന്ത്യ സെക്രട്ടറി വിപി സാനു പ്രതികരിച്ചു. ഗവർണർ ചാൻസലർ പദവി ഒഴിയുന്നത് ഉന്നത വിദ്യാഭ്യാസ മേഖലയ്ക്ക് ഗുണമാകുമെന്നും അദ്ദേഹം പറഞ്ഞു.

ചാൻസലർ പദവിയിൽ നിന്ന് മാറ്റാനുള്ള സാഹചര്യം ഗവർണറായിട്ട് ഉണ്ടാക്കരുതെന്ന് സിപിഐ സംസ്ഥാന സെക്രട്ടറി കാനം രാജേന്ദ്രൻ വ്യക്തമാക്കി. നിയമസഭ പാസാക്കുന്ന ഒരു നിയമത്തിൻ്റെ അടിസ്ഥാനത്തിലാണ് സംസ്ഥാനത്തെ സർവകലാശാലകളുടെ ചാൻസലറായി ഗവർണറെ നിയമിക്കുന്നത്. വേണമെങ്കിൽ ആ ചാൻസലർ പദവി വേണ്ടെന്ന് വെക്കാൻ നിയമസഭയ്ക്ക് സാധിക്കും. അതിന് ഞങ്ങളെ നിർബന്ധിക്കരുതെന്നും കാനം പ്രതികരിച്ചു.